ជាតិ
នយោបាយជាតិ
លោក កឹម សុខា ៖ ខ្ញុំព្យាយាមធ្វើតាមលទ្ធភាព និងស្ថានភាព ទោះបីខ្ញុំមិនទាន់មានសិទ្ធិសេរីភាពពេញលេញក៏ដោយ រូបពីហ្វេសប៊ុកលោក កឹម សុខា មេដឹកនាំអតីតគណបក្សសង្គ្រោះជាតិ
× ភ្នំពេញ៖ មេដឹកនាំអតីតគណបក្សសង្គ្រោះជាតិ លោក កឹម សុខា បានចេញមុខដោះស្រាយបញ្ហាប្រជាពលរដ្ឋតាមមូលដ្ឋានជាញឹកញយ នៅក្នុងអំឡុងពេលគ្រោះទឹកជំនន់ នារយៈពេល១ខែនេះ ។ លោក កឹម សុខា បានធ្វើសកម្មភាពទាំងនេះ ស្របពេលដែលោកកំពុងស្ថិតនៅក្នុងដំណើរការរឿងក្តី ពីបទ «គប់គិតជាមួយបរទេស»។
ទោះបីខ្លួន មិនទាន់មានសេរីភាពពេញលេញក្តី តែមេដឹកនាំអតីតគណបក្សប្រឆាំងដ៏ធំរូបនេះ នៅតែមានចិត្តចង់ជួយសម្រួលបន្ទុកជីវភាពពលរដ្ឋ នៅក្នុងគ្រាលំបាកនេះ។ ដូចពេលមុនដែរ លោក កឹម សុខា បាននាំយកស្រូវពូជចំនួន៤តោន (៤០០០គីឡូក្រាម) ទៅចែកជូនប្រជាកសិករខ្មែរ ១០០គ្រួសារ ដែលរងការខូចខាតស្រូវ ដោយសារទឹកជំនន់ នៅខេត្តកំពង់ឆ្នាំង។ លើសពីនេះ លោក កឹម សុខា ក៏បានយកពូជដូងក្រអូបមួយចំនួន ចែកឱ្យប្រជាពលរដ្ឋដែលរស់នៅលើដីទួលតាមដងផ្លូវជាតិលេខ៥ផងដែរ។ ជំនួយទាំងនេះ គឺលោក កឹម សុខា បានប្រមូលពីសម្បុរសជននៅក្រៅប្រទេស។
បើតាមអ្នកនយោបាយដែលកំពុងជាប់បញ្ហាក្តីក្ដាំរូបនេះ ការជួយប្រជាពលរដ្ឋក្នុងគ្រាលំបាក គឺជារឿងចាំបាច់ដែលត្រូវបំពេញ ប្រសើរជាងគិតរឿងជម្លោះ។ មេដឹកនាំអតីតគណបក្សសង្គ្រោះជាតិរូបនេះ បានសរសេរលើហ្វេសប៊ុកខ្លួន ដោយភ្ជាប់ជាមួយរូបភាពចែកពូជកសិកម្មដល់ពលរដ្ឋនៅខេត្តកំពង់ឆ្នាំង នៅថ្ងៃទី២៦ តុលា ដូច្នេះថា៖«សេចក្តីត្រូវការរបស់មនុស្ស អាចមិនចេះចប់ ក៏ប៉ុន្តែសេចក្តីត្រូវការដើម្បីរស់ គឺជាការចាំបាច់ ដែលយើងជាមនុស្សត្រូវតែរួបរួមគ្នាដើម្បីជួយសង្គ្រោះ ទោះបីតិចឬច្រើនក្តី ដោយមិនគួរមើលបំណាំគ្នា ឬយកជម្លោះមកធ្វើជាឧបសគ្គឡើយ។ ដូចដែលខ្ញុំបានបញ្ជាក់ហើយ អ្វីដែលអាចធ្វើបាន”ដើម្បីខ្មែរ” ខ្ញុំព្យាយាមធ្វើតាមលទ្ធភាព និងស្ថានភាពដែលអាចធ្វើបាន ដោយមិនបំពាន និងដោយអហិង្សា ទោះបីខ្ញុំមិនទាន់មានសិទ្ធិសេរីភាពពេញលេញក៏ដោយ»។
ក្រៅពីចុះចែកអំណោយជាស្បៀង ដូចជា អង្ករ ទឹកត្រី ទឹកស៊ីអ៊ីវ ពូជស្រូវ និងដំណាំកសិកម្មនេះ លោក កឹម សុខា ក៏បានចូលរួមជាវិភាគទាន៥ពាន់ដុល្លារដល់មូលនិធិរដ្ឋាភិបាល សម្រាប់យកទៅប្រើប្រាស់ ក្នុងការជួយដោះស្រាយបញ្ហាពលរដ្ឋ រងគ្រោះដោយសារទឹកជំនន់ដែរ កាលពីថ្ងៃទី១៦ តុលា។
សកម្មភាពរបស់លោក កឹម សុខា នេះ ក៏ទទួលបានការសរសើរពីសម្ដេចនាយករដ្ឋមន្ត្រី ហ៊ុន សែន ។ ប្រមុខរដ្ឋាភិបាល ក៏បានផ្ញើលិខិតមួយទៅកាន់លោក កឹម សុខា ដោយចាត់ទុកសកម្មភាពមេដឹកនាំអតីតបក្សប្រឆាំងដ៏ធំនេះ ជាទង្វើមនុស្សធម៌ និងសាមគ្គីធម៌ ក្នុងការជួយគ្នាទៅវិញទៅមក ក្នុងគ្រាមានអាសន្ន។
មិនតែប៉ុណ្ណោះសម្ដេច ហ៊ុន សែន ក៏បានប្រកាសឱ្យអ្នកនយោបាយទាំងអស់នៅកម្ពុជា ចូលរួមសកម្មភាពមនុស្សធម៌ ក្នុងការជួយសង្គ្រោះពលរដ្ឋរងគ្រោះ ដោយសារទឹកជំនន់នេះ ដោយមិនត្រូវរើសអើង និងគិតពីនិន្នាការនយោបាយឡើយ។
គួរបញ្ជាក់ថា សំណុំរឿង«សន្និដ្ឋិភាពជាមួយបរទេស» លោក កឹម សុខា កំពុងស្ថិតនៅក្នុងដំណើរការស៊ើបសួរបន្ថែមលើវីដេអូមួយកាលពីឆ្នាំ២០១៣ គ្រាដែលលោកបានថ្លែងសារនយោបាយនៅក្នុងប្រទេសអូស្ត្រាលី មុននឹងឈានដល់សវនាការជំនុំជម្រះ។ តុលាការបានបើកដំណើរការជជែកដេញដោលជាមួយមេធាវីចុងចោទ រួមទាំងលោក កឹម សុខា កាលដើមឆ្នាំ២០២០មក។ ប៉ុន្តែដោយសារមានបញ្ហាជំងឺកូវីដ-១៩ រាតត្បាតនៅកម្ពុជា និងលើពិភពលោកនោះ ទើបតុលាការសម្រេចផ្អាកដំណើរស៊ើបសួរនេះសិន តាមសំណើររបស់មេធាវីលោក កឹម សុខា ដោយរង់ចាំស្ថានភាពជំងឺកូវីដ-១៩ ផុតរលត់៕
© រក្សាសិទ្ធិដោយ thmeythmey.com