ជាតិ
សង្គមជាតិ
ព្រះសុខភាពសម្តេច ទេព វង្ស ធូរច្រើន តែមិនទាន់ជា១០០ភាគរយ សម្តេចព្រះសង្ឃរាជ ទេព វង្ស (គង់លើរទេះរុញ) ពេលយាងមកពីសម្រាកព្យាបាលព្រះកាយនៅវៀតណាម ដល់កម្ពុជានៅទី២៣ ខែតុលា ឆ្នាំ២០២០។ រូបពីគណៈសង្ឃនាយក
× សម្តេចព្រះពុទ្ធជ័យមុនី ឃឹម សន ព្រះប្រធានលេខាធិការនៃលេខាធិការដ្ឋានគណៈសង្ឃនាយក និងជាព្រះមេគណរាជធានីភ្នំពេញ ផ្តល់ព័ត៌មានថា ព្រះសុខភាពរបស់សម្តេចព្រះអគ្គមហាសង្ឃរាជាធិបតី ទេព វង្ស បានធូរនិងល្អប្រសើរច្រើនឡើងវិញហើយ តែមិនទាន់ជាសះស្បើយ១០០ភាគរយដូចកាលពីមុនឡើយ។
ក្នុងកិច្ចសម្ភាសជាមួយសារព័ត៌មានថ្មីៗ តាមទូរសព្ទ នៅថ្ងៃទី២៦ ខែតុលា ឆ្នាំ២០២០ សម្តេច ឃឹម សន មានសង្ឃដីកាថា ក្រុមគ្រូពេទ្យនៃប្រទេសវៀតណាម ណែនាំឲ្យសម្តេចព្រះសង្ឃរាជ ឧស្សាហ៍ធ្វើចលនាព្រះហស្ត (ដៃ) ដូចជាលើកចុះឡើង និងធ្វើចលនាព្រះបាទ (ជើង) ដោយសារតែព្រះហស្តនិងព្រះបាទរបស់ព្រះអង្គ ស្ពឹកពិបាកកម្រើក តាំងពីព្រះអង្គចាប់ផ្តើមប្រឈួន។ សម្តេច ឃឹម សន បញ្ជាក់ថា៖«ពេលនេះ ព្រះអង្គ អាចយាងដើរបាន តែត្រូវមានអ្នកទប់ ព្រោះខ្លាចដួល»។
សម្តេច ឃឹម សន បន្តថា ពេទ្យ ពុំបានហាមសម្តេចព្រះសង្ឃរាជ ឲ្យតមចង្ហាន់អ្វីឡើយ។ ព្រះប្រធានលេខាធិការគណៈសង្ឃនាយក មានសង្ឃដីកាថា៖«ចង្ហាន់អី លោក អាចឆាន់បានធម្មតា អត់អីទេ»។
ស្ថានទូតវៀតណាមប្រចាំកម្ពុជា សរសេរលើទំព័រហ្វេសប៊ុករបស់ខ្លួនថា៖«បើតាមព័ត៌មានពីគណៈប្រតិភូអមដំណើរសម្តេច [ព្រះសង្ឃរាជ] ក្រោយរយៈពេលព្យាបាលព្រះសុខភាពនៅប្រទេសវៀតណាម ព្រះសុខភាពរបស់សម្តេចបានល្អឡើងពីមួយថ្ងៃទៅមួយថ្ងៃ ហើយឥឡូវអាចចូលរួមបណ្តាសកម្មភាពជាមួយមហាជននិងប្រជាជនកម្ពុជាដូចធម្មតា»។
ដោយសារតែព្រះសុខភាពចុះខ្សោយ សម្តេច ទេព វង្ស ត្រូវបានបញ្ជូនទៅព្យាបាលនៅមន្ទីរព្យេវៀតណាម កាលពីថ្ងៃទី២១ ខែសីហា។ ក្រោយសម្រាកព្យាបាលព្រះកាយជាង២ខែ សម្តេចព្រះមហាសង្ឃរាជ យាងមកកម្ពុជាវិញ កាលពីថ្ងៃទី៣ ខែតុលានេះ។ បច្ចុប្បន្ន ព្រះអង្គ មានព្រះជន្ម៨៩ព្រះវស្សា៕
© រក្សាសិទ្ធិដោយ thmeythmey.com