ភ្នំពេញ-នៅល្ងាចថ្ងៃចន្ទ ទី២៦ តុលា ឆ្នាំ២០២០ ៖ ក្រសួងកិច្ចការនារី និងក្រុមហ៊ុនកូកា-កូឡាកម្ពុជា បានចុះអនុស្សារណៈយោគយល់គ្នាស្តីពី «ភាពជាដៃគូលើការលើកកម្ពស់ភាពជាអ្នកដឹកនាំ និងការអភិវឌ្ឍសហគ្រិនភាពរបស់ស្ត្រី» ដែលពិធីនេះប្រព្រឹត្តទៅក្រោមអធិបតីភាព លោកជំទាវ គង់ សូរីតា អនុរដ្ឋលេខាធិការ និងតំណាងដ៏ខ្ពង់ខ្ពស់របស់លោកជំទាវ អ៊ឹង កន្ថាផាវី រដ្ឋមន្ត្រី ក្រសួងកិច្ចការនារី និងលោកស្រី ឡាវ ស្រីដែត នាយិកាផ្នែកពាណិជ្ជកម្មប្រចាំប្រទេសរបស់ក្រុមហ៊ុន។
នៅក្នុងពិធីចុះហត្ថលេខា គូភាគីបានប្រកាសពីឆន្ទៈយ៉ាងច្បាស់ ក្នុងការបង្កើនភាពអង់អាចផ្នែកសេដ្ឋកិច្ចដល់ស្ត្រី ភាពជាអ្នកដឹកនាំរបស់ស្ត្រី និងជំរុញឱ្យស្ត្រីប្រើប្រាស់សក្តានុពលរបស់ខ្លួនឱ្យអស់លទ្ធភាព ក្នុងការចូលរួមលើកស្ទួយសេដ្ឋកិច្ច-សង្គមជាតិប្រកបដោយបរិយាប័ន្ន។
តាមរយៈខ្លឹមសារនៃអនុស្សារណៈនេះ គូភាគីនឹងធ្វើកិច្ចសហប្រតិបត្តិការលើ៖
• ពង្រឹងភាពជាអ្នកដឹកនាំរបស់ស្ត្រី ដែលជាថ្នាក់ដឹកនាំ និងបង្កើនចំនួនបុគ្គលិកជាស្ត្រីក្នុងក្រុមហ៊ុនកូកា-កូឡា ដើម្បីឈានទៅសម្រេចគោលដៅ ៥០-៥០% នៅឆ្នាំត្រឹម២០២៥
• អភិវឌ្ឍសហគ្រិនភាពរបស់ស្ត្រី ជាពិសេសអ្នកតំណាងចែកចាយផលិតផល
• រៀបចំផែនការរួម ដើម្បីផ្តល់វគ្គបណ្តុះបណ្តាល និងការគាំទ្រនានាដល់ស្ត្រី ជាម្ចាស់អាជីវកម្មខ្នាតតូច នៅថ្នាក់ជាតិ និងថ្នាក់ក្រោមជាតិ
• អនុវត្តគម្រោងគាំទ្រដល់អាជីវករខ្នាតតូច ជាពិសេសអ្នកលក់ដូរតាមដងផ្លូវក្នុងការបង្កើនគុណភាពចំណីអាហារ អនាម័យ និងអភិវឌ្ឍអាជីវកម្ម
លោកស្រី ឡាវ ស្រីដែត នាយិកាផ្នែកពាណិជ្ជកម្មប្រចាំប្រទេស មានប្រសាសន៍ថា៖ « នៅក្រុមហ៊ុនកូកា-កូឡាកម្ពុជា យើងបានកំណត់គោលដៅជាក់លាក់នៅក្នុងចក្ខុវិស័យ ២០២០-២០២៥ គឺត្រូវអនុវត្តគ្រប់យុទ្ធសាស្ត្រដើម្បីឲ្យមានបុគ្គលិកជាស្ត្រី ៥០% នៃចំនួនបុគ្គលិកសរុបនៅត្រឹមឆ្នាំ២០២៥។ ពិពិធភាព និងបរិយាបន្នរវាងស្ត្រី និងបុរសនៅក្នុងក្រុមហ៊ុន នឹងជម្រុញឲ្យមានភាពច្នៃប្រឌិត នវានុវត្តន៍ ការជជែកគាំទ្រនៅក្នុងក្រុមហ៊ុន ក៏ដូចជាផ្សាភ្ជាប់អាជីវកម្មយើងទៅក្នុងសហគន៍ដែលយើងប្រតិបត្តិការ»។
លោកស្រី បានបន្តទៀតថា៖ «ការចុះអនុស្សារណៈនាថ្ងៃនេះ មិនមែនជាចាប់ផ្តើមកិច្ចសហការលើកដំបូងរវាងក្រសួងកិច្ចការនារី និងក្រុមហ៊ុនកូកា-កូឡានោះទេ តែថ្ងៃនេះគឺសក្ខីភាពនៃការរិតចំណងកិច្ចសហប្រតិបត្តិការរបស់ពួកយើង និងជាការបញ្ជាក់អំពីការប្តេជ្ញារបស់ក្រុមហ៊ុន ក្នុងការចូលរួមជាមួយរាជរដ្ឋាភិបាលលើការបង្កើនភាពអង់អាចដល់ស្ត្រី»។
លោកជំទាវ គង់ សូរីតា អនុរដ្ឋលេខាធិការ ក្រសួងកិច្ចការនារី ក៏បានលើកឡើងថា៖ «សម្រាប់រាជរដ្ឋាភិបាលកម្ពុជា ការលើកកម្ពស់ភាពជាអ្នកដឹកនាំ និងសហក្រិនភាព គឺជាយុទ្ធសាស្ត្រគន្លឹះធំពីរ នៃក្របខណ្ឌការងារបង្កើតភាពអង់អាចដល់ស្ត្រី និងក្មេងស្រី ក្នុងគោលដៅដើម្បីឈានទៅលុបបំបាត់គម្លាតយេនឌ័រនៅកម្ពុជា ជាពិសេសដូចមានកំណត់នៅក្នុងយុទ្ធសាស្ត្រចតុកោណ ដំណាកើកាលទី៤ជាតិ និងអភិវឌ្ឍន៍យុទ្ធសាស្ត្រផែនការ, ផែនការយុទ្ធសាស្ត្រនារីរតនៈទី៥ ឆ្នាំ២០១៩-២០២៣។ កិច្ចសហការនេះ គឺជារូបមន្ត និងសក្ដានុពលថ្មីមួយទៀតក្នុងការពង្រីកដៃគូ ក្នុងការលើកកម្ពស់យេនឌ័រ ជាពិសេសនៅក្នុងវិស័យសេដ្ឋកិច្ច ការអភិវឌ្ឍ៍សហគ្រិនភាព ភាពជាអ្នកដឹកនាំ និងការគាំទ្របរិយាកាសការងារសម្រាប់ស្ត្រីនៅក្នុងវិស័យឯកជន»។
កិច្ចសហប្រតិបត្តិការនេះសបញ្ជាក់ ពីការសហការយ៉ាងស្អិតរមួតរវាងវិស័យសាធារណៈជាមួយ និងវិស័យឯកជន រួមចំណែកផ្តល់ការលើកកម្ពស់ភាពអង់អាចផ្នែកសេដ្ឋកិច្ចដល់ស្ត្រី រួមបញ្ចូលទាំងបណ្តុះស្មារតីជាសហគ្រិនភាព និងភាពជាអ្នកដឹកនាំ ស្របតាមចក្ខុវិស័យរបស់រាជរដ្ឋាភិបាលកម្ពុជា៕
(អត្ថបទពាណិជ្ជកម្ម)