ភ្នំពេញ៖ កម្ពុជា នឹងអាចទទួលភ្ញៀវទេសចរអន្តរជាតិបាន៦,៦លាននាក់វិញនៅក្នុងឆ្នាំ២០២៣ ប្រសិនបើប្រទេសមហាអំណាច ពិសេសប្រទេសចិនមានវ៉ាក់សាំងកូវីដ-១៩(COVID-19)នៅចុងឆ្នាំ២០២០។ នេះជាការព្យាករណ៍យ៉ាងខ្ពស់របស់ក្រសួងទេសចរណ៍ ខណៈក្នុងឆ្នាំ២០២០នេះ កម្ពុជារំពឹងទទួលទេសចរអន្តរជាតិបានត្រឹម១,៣២លាននាក់ប៉ុណ្ណោះ។
កិច្ចប្រជុំបូកសរុបលទ្ធផលការងារទេសចរណ៍រយៈពេល៩ខែដើមឆ្នាំ២០២០ នៅទីស្តីការក្រសួងទេសចរណ៍ កាលពីរសៀលថ្ងៃទី២៦តុលា ក្រសួងទេសចរណ៍ បានបន្ថយរយៈពេលពី៧ឆ្នាំ មកត្រឹមរយៈ៣ឆ្នាំ ឬយ៉ាងយូរបំផុត៥ឆ្នាំប៉ុណ្ណោះ ក្នុងការស្តារ និងលើកស្ទួយវិស័យទេសចរណ៍កម្ពុជាឡើងវិញ ដែលកំពុងរងគ្រោះយ៉ាងធ្ងន់ធ្ងរដោយសារតែ ជំងឺកូវីដ-១៩។
ក្រសួងទេសចរណ៍បានបញ្ជាក់ថា ការប្រើរយៈពេលត្រឹម៣ឆ្នាំ នៃការស្តារ និងលើកស្ទួយវិស័យទេសចរណ៍កម្ពុជាឡើងវិញ ដែលកម្ពុជាអាចទទួលទេសចអន្តរជាតិបាន៦.៦លាននាក់នៅក្នុងឆ្នាំ២០២៣ គឺស្ថិតនៅក្នុងសេណារីយ៉ូទី១ ប្រសិនបើប្រទេសមហាអំណាច ពិសេសប្រទេសចិនមានវ៉ាក់សាំងការពារជំងឺកូវីដ-១៩ នៅចុងឆ្នាំ២០២០។ ក្នុងករណី បើវ៉ាក់សាំងកូវីដ-១៩ មាននៅពាក់កណ្តាលឆ្នាំ២០២១ នោះការស្តារឡើងវិញនូវវិស័យទេសចរណ៍កម្ពុជា ត្រូវទាមទាររយៈពេលយូរបំផុត៥ឆ្នាំ ដែលស្ថិតនៅក្នុងសេណារីយ៉ូទីរបស់ក្រសួងទេសចរណ៍។ ពោលនៅឆ្នាំ២០២៥ ទើបកម្ពុជាអាចទទួលទេសចរអន្តរជាតិបាន៦,៦លាននាក់វិញ។
ទោះជានេះយ៉ាងក៏ដោយ សម្រាប់លោក ថោង ខុន រដ្ឋមន្ត្រីក្រសួងទេសចរណ៍ សង្ឃឹមខ្ពស់ថា កម្ពុជាទាមទារតែរយៈពេលតែ៣ឆ្នាំប៉ុណ្ណោះ ក្នុងស្តារឡើងវិញនៃវិស័យទេសចរណ៍ ដែលរងគ្រោះពីវិបត្តិសកលនៃជំងឺកូវីដ-១៩ ប្រសិនបើអង្គការសុខភាពពិភពលោក(WHO)ទទួលស្គាល់វ៉ាក់សាំងការពារជំងឺកូវីដ-១៩របស់ប្រទេសចិន នៅចុងឆ្នាំ២០២០នេះ។
«យើងឃើញការផលិតវ៉ាក់សាំង[ការពារជំងឺកូវីដ-១៩របស់ប្រទេសចិន] គឺចាប់ផ្តើមមានហើយ។ ហើយនៅពេលដែលចិនមានរ៉ាក់សាំងទទួលស្គាល់ពីអង្គការសុខភាពពិភពលោក នៅថ្ងៃខាងមុខនេះ គឺខ្ញុំគិតថាវ៉ាក់សាំង នឹងអាចមានដល់យើង»។ នេះជាការលើកឡើងរបស់ លោក ថោង ខុន ដោយបន្តរៀបរាប់ថា៖« នៅពេលមានវ៉ាក់សាំង មកដល់យើង គឺប្រជាជនយើង អាចទទួលបានរ៉ាក់សាំង ឬក៏ប្រជាជនចិនចាក់វ៉ាក់សាំងនៅប្រទេសចិន [នោះ] កម្ពុជានឹងក្លាយជាគោលដៅទេសចរណ៍មួយមានសុវត្ថិភាព ហើយទេសចរជនជាតិចិនដែលមកកម្ពុជា ក៏ជាទេសចរមួយមានសុវត្ថិភាពផងដែរ»។
បើតាមរដ្ឋមន្ត្រីក្រសួងទេសចរណ៍រូបនេះ នៅក្នុងឆ្នាំ២០២៣ ដែលស្ថិតនៅក្នុងសេណារីយ៉ូទី១នោះ កម្ពុជាអាចមានលទ្ធភាពខ្ពស់ច្រើន ក្នុងការទទួលបានមកវិញនូវចំនួនទេសចរអន្តរជាតិ៦,៦លាននាក់ ស្មើនឹងចំនួនភ្ញៀវទេសចរអន្តរជាតិ កាលពីឆ្នាំ២០១៩។ លោក ថោង ខុន មានប្រសាសន៍ដូច្នេះ៖«អ្វីជាសង្ឃឹមរបស់យើង[វិស័យទេសចរណ៍កម្ពុជា] គឺប្រហែលថយក្រោយត្រឹម៣ឆ្នាំ»។
គិតត្រឹម៩ខែដើមឆ្នាំ២០២០មកនេះ មូលដ្ឋានអាជីវកម្មក្នុងទេសចរណ៍ទូទាំងប្រទេសកម្ពុជាមានសរុប ២,៨៣៨ទីតាំងបានបិទទ្វារ និងផ្អាកដំណើរការ។ បុគ្គលិកដែលបាត់បង់ការងារក្នុងវិស័យទេសចរណ៍ ដោយរាប់បញ្ជូលទាំងអ្នកបម្រើការងារក្រៅប្រព័ន្ធ មានប្រមាណ១០ម៉ឺន ស្មើនឹង១៥-២០ភាគរយនៃកម្លាំងពលកម្មសរុប។ លើសពីនេះទៅទៀត ក្នុងឆ្នាំ២០២០នេះ កម្ពុជាខាតចំណូលពីភ្ញៀវទេសចរអន្តរជាតិប្រមាណ៣,០០០លានដុល្លារ។ នេះបើតាមរបាយការណ៍របស់ក្រសួងទេសចរណ៍។
កាលឆ្នាំ២០១៩ កម្ពុជាទទួលចំណូលចំនួន៤,៩១៩លានដុល្លារ ពីទេសចរអន្តរជាតិ៦,៦១លាននាក់។ ចំនួននេះ បានរួមចំណែកក្នុងផលិតផលក្នុងស្រុកសរុប (ផសស ឬ GDP) ជាង១២ភាគរយ៕