ជាតិ
សង្គមជាតិ
ទ័ពមួកខៀវកម្ពុជា៧៣នាក់ ត្រូវបញ្ជូនទៅស៊ូដង់ខាងត្បូង ខណៈ៧៣នាក់ ត្រូវមកវិញ
ទ័ពមួកខៀវកម្ពុជា៧៣នាក់ ទៅបំពេញបេសកកម្មរក្សាសន្តិសុខនៅស៊ូដង់ខាងត្បូង នៅយប់ថ្ងៃទី២៥ ខែតុលា ឆ្នាំ២០២០។ រូបពីក្រសួងព័ត៌មាន
×![]()
ដោយ: សារព័ត៌មានថ្មីៗ
ទ័ពមួកខៀវកម្ពុជា៧៣នាក់ (ស្ត្រី២៨នាក់) បានចាកចេញពីកម្ពុជា នៅយប់ថ្ងៃទី២៥ ខែតុលា ឆ្នាំ២០២០ ទៅប្រទេសស៊ូដង់ខាងត្បូង ដើម្បីបំពេញបេសកកម្មរក្សាសន្តិសុខនៅប្រទេសមួយនេះ ក្រោមឆ័ត្រអង្គការសហប្រជាជាតិ។ ទន្ទឹមនេះ ទ័ពមួកខៀវកម្ពុជា៧៣នាក់ ដែលដល់ពេលបញ្ចប់បេសកកម្មនៅស៊ូដង់ខាងត្បូង ត្រូវវិលមកកម្ពុជាវិញ ដែលហៅថាជាការប្តូរវេនគ្នា។ 
អ្នកស្រី កុសល ម៉ាលីនដា អគ្គនាយករងនិងជាអ្នកនាំពាក្យនៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព ប្រាប់សារព័ត៌មានថ្មីៗថា ទ័ពមួកខៀវកម្ពុជាទាំង៧៣នាក់ ដែលបញ្ចប់បេសសកម្មនៅស៊ូដង់ខាងត្បូង ត្រូវមកដល់កម្ពុជា នៅរសៀលថ្ងៃទី២៧ ខែតុលានេះ។ អ្នកស្រី បន្តថា ពេលមកដល់កម្ពុជា ក្រុមគ្រូពេទ្យ នឹងយកសំណាករបស់ពួកគេ ទៅពិនិត្យរកមេរោគកូវីដ-១៩ ហើយពួកគេ នឹងត្រូវយកទៅធ្វើចត្តាឡីស័ក១៤ថ្ងៃ។
អ្នកស្រី បន្ថែមថា ចំពោះកងទ័ពមួកខៀវកម្ពុជា៧៣នាក់ ដែលប្តូរវេនទៅបំពេញបេសកកម្មនៅស៊ូដង់ខាងត្បូង សុទ្ធតែត្រូវបានធ្វើតេស្ត ហើយលទ្ធផល គឺពួកគេ មិនមានជំងឺកូវីដ-១៩នោះទេ។ ជាមួយគ្នានេះ អ្នកស្រី អះអាងថា មួកខៀវកម្ពុជាមួយចំនួន ដែលឆ្លងកូវីដ-១៩កន្លងមក បានជាសះស្បើយអស់ហើយ។
លោកឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកម្លាំងរក្សាសន្តិភាព បានចូលរួមជូនដំណើរកងទ័ពមួកខៀវកម្ពុជាទាំង៧៣នាក់ ដែលទៅបំពេញបេសកកម្មនៅស៊ូដង់ខាងត្បូង។ គេហទំព័រក្រសួងព័ត៌មាន ផ្សាយថា ក្នុងឱកាសនៃការជូនដំណើរនោះ លោក សែម សុវណ្ណនី បានក្រើនរម្លឹកដល់កងទ័ពមួកខៀវកម្ពុជា ដែលចេញទៅបំពេញបេសកកម្មនៅស៊ូដង់ខាងត្បូង និងទ័ពមួកខៀវកម្ពុជា ដែលកំពុងបំពេញបេសកកម្មនៅប្រទេសផ្សេងទៀត ឲ្យថែទាំងសុខភាព ហើយត្រូវអនុវត្តតាមការណែនាំរបស់ក្រសួងសុខាភិបាល តាមការណែនាំរបស់មន្ត្រីអង្គការសហប្រជាជាតិ តាមការណែនាំរបស់សម្តេចនាយករដ្ឋមន្ត្រី ហ៊ុន សែន និងតាមការណែនាំរបស់ក្រសួងការពារជាតិ ដើម្បីបង្ការជំងឺកូវីដ-១៩។
កន្លងមក កងទ័ពមួកខៀវកម្ពុជា១១នាក់ នៅប្រទេសម៉ាលី បានឆ្លងជំងឺកូវីដ-១៩។ ក្នុងចំណោម១១នាក់នោះ មាន១០នាក់ បានជាសះស្បើយវិញ តែជាអកុសល មានម្នាក់ គឺឧត្តមសេនីយ៍ទោ ស សាវី វ័យ៦៣ឆ្នាំ បានទទួលមរណភាព កាលពីចុងខែឧសភា ឆ្នាំ២០២០។
នាយឧត្តមសេនីយ៍ ឈុំ អ្នកនាំពាក្យក្រសួងការពារជាតិ បង្ហាញតួលេខលើទំព័រហ្វេសប៊ុករបស់លោក កាលពីអំឡុងខែមិថុនា ឆ្នាំ២០២០ ថា កងកម្លាំងមួកខៀវកម្ពុជា មាន៥កង ហើយមានចំនួនសរុប៧៨៧នាក់ (នារី៧៦នាក់) ដែលកំពុងបំពេញបេសកកម្មរក្សាសន្តិសុខ នៅប្រទេសទាំង៥ គឺ លីបង់ ស៊ូដង់ ស៊ូដង់ខាងត្បូង ម៉ាលី និង អាហ្វ្រិកកណ្តាល៕
Tag:
ទ័ពមួកខៀវ
© រក្សាសិទ្ធិដោយ thmeythmey.com
