អន្តរជាតិ
អតីតនាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ (ឆ្វេង) និងមេដឹកនាំបក្សប្រឆាំងលោក អាន់វ៉ា អ៊ីប្រាហ៊ីម ។ រូបភាព៖ AFP
×![]()
អតីតនាយករដ្ឋមន្ត្រី ណាជីប រ៉ាហ្សាក់ បានស្នើយោបល់ឲ្យបក្សអង្គការជាតិរួបរួមម៉ាឡេ (UMNO) ដែលជាបក្សកាន់អំណាចធ្វើការជាមួយមេដឹកនាំបក្សប្រឆាំងរបស់លោក អាន់វ៉ា អ៊ីប្រាហ៊ីម ក្នុងលក្ខខណ្ឌដែល ការបោះឆ្នោតថ្នាក់ជាតិមុនអាណត្តិ មិនអាចរៀបចំទៅរួច។ 
លោក អាន់វ៉ា ធ្លាប់ជាមេដឹកនាំសំខាន់មួយក្នុងសម្ព័ន្ធភាពនយោបាយដែលបានផ្ដួលលោក ណាជីប ក្នុងការបោះឆ្នោតជាប្រវត្តិសាស្ត្រក្នុងឆ្នាំ២០១៨។ ចាប់តាំងពីពេលនោះនេះ លោក ណាជីប បានជាប់ក្តីក្ដាំពាក់ព័ន្ធអំពើពុករលួយ ហើយត្រូវបានតុលាការកាត់ទោសឲ្យជាប់ពន្ធនាគារ១២ឆ្នាំទៀតផង។ ប៉ុន្តែបច្ចុប្បន្ន លោកបង់លុយនៅក្រៅឃុំ ហើយបានប្ដឹងតវ៉ាប្រឆាំងសាលក្រមនេះដែរ។
ក្នុងសារដែលត្រូវបានបង្ហោះតាមហ្វេសប៊ុកកាលពីថ្ងៃទី ២៦ ខែតុលា លោក ណាជីប បានប្រតិកម្មចំពោះរបាយការណ៍ដែលថា រូបលោកបានទទូចឲ្យសមាជិកបក្ស UMNO គាំទ្រលោកអាន់វ៉ា ធ្វើនាយករដ្ឋមន្ត្រី។ លោកចាត់ទុកថា របាយការណ៍នេះមិនពិតឡើយ។
ត្រង់ចំណុចនេះ លោកណាជីប អះអាងថា ការស្នើយោបល់ទីមួយរបស់លោកគឺចង់ឲ្យបក្ស UMNO ជំរុញឲ្យមានការរៀបចំការបោះឆ្នោតមុនពេលកំណត់ ក្រោយស្ថានភាពជំងឺកូវីដ-១៩ ស្ថិតក្រោមគ្រប់គ្រង។
ចំណែកការស្នើយោបល់ទីពីរវិញ បើតាមលោកអតីតនាយករដ្ឋមន្ត្រី ណាជីប គឺថា ប្រសិនបើការស្នើសុំទីមួយ ត្រូវបានបដិសេធនោះ បក្សកាន់អំណាច UMNO ត្រូវតែបើកផ្លូវចរចាជាមួយបក្សនយោបាយដទៃ រួមទាំង បក្សរបស់លោក អាន់វ៉ា ផងដែរ។
សូមបញ្ជាក់ថា បក្សអង្គការជាតិរួបរួមម៉ាឡេ បានបើកកិច្ចប្រជុំផ្ទៃក្នុងមួយកាលពីថ្ងៃទី២៦ ខែតុលា ដើម្បីពិភាក្សាថាតើគួរឲ្យលោកនាយករដ្ឋមន្ត្រី Muhyiddin Yassin ចុះចេញពីតំណែង ឬបន្តគាំទ្រសម្ព័ន្ធនយោបាយ Perikatan Nasional ។
ពោលគឺក្រោយសំណើរបស់នាយករដ្ឋមន្ត្រីដើម្បីដាក់ប្រទេសក្នុងគ្រាអាសន្ន ត្រូវបានបដិសេធដោយស្ដេចម៉ាឡេស៊ីកាលពីថ្ងៃទី២៥ ខែតុលា ក្នុងកាលៈទេសៈដែលលោក អាន់វ៉ា ចង់ប្រជែងតំណែងកំពូលនេះពីលោក។ អ្នករិះគន់មួយចំនួនចោទថា លោកនឹងប្រើវិធានការនេះជាលេសដើម្បីបម្រើប្រយោជន៍នយោបាយលោកប៉ុណ្ណោះ។
ការចង់ប្រជែងតំណែងនេះ កើតឡើងក្រោយលោក អាន់វ៉ា កាលពីខែមុន បានអះអាងថា លោកមានការគាំទ្រក្នុងសភាគ្រប់គ្រាន់ក្នុងការទម្លាក់លោក Muhyiddin ចេញពីតំណែងនាយករដ្ឋមន្ត្រី និងអាចបង្កើតរដ្ឋាភិបាលថ្មីបាន។ ក៏ប៉ុន្តែលោកមិនបានបង្ហាញអត្តសញ្ញាណសមាជិកសភាដែលគាំទ្រលោកឡើយ។
វិបត្តិនយោបាយម៉ាឡេស៊ី បានចាប់ផ្ទុះឡើងក្រោយលោក មហាធៀ មហាម៉ាត់ បានសម្រេចលាលែងពីតំណែង បន្ទាប់ពីចលនាផ្ទៃក្នុងនៃសម្ព័ន្ធភាពនៃបក្សកាន់អំណាចប៉ុនប៉ងបង្កើតរដ្ឋាភិបាលទ្វារក្រោយ ដោយរាប់បញ្ចូលបក្សរបស់លោក ណាជីប ផង។ ដ្បិតថា លោកអតីតនាយករដ្ឋមន្ត្រី មហាធៀ ប្រកាសជំហរមួយដោយធ្វើការជាមួយគណបក្សដែលជាប់ពាក់ព័ន្ធនឹងអំពើពុករលួយរបស់លោក ណាជីប ជាដាច់ខាត។ ហើយក្រោយមក លោក Muhyiddin ប្រមូលបានការគាំទ្រក្នុងសភាគ្រប់គ្រាន់ និងឡើងកាន់តំណែងជានាយករដ្ឋមន្ត្រីកាលខែមីនា៕
Tag:
ម៉ាឡេស៊ី
អាន់វ៉ា អ៊ីប្រាហ៊ីម
ណាជីប រ៉ាហ្សាក់
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
