កម្រិតទឹកទំនប់៧មករានៅភ្នំពេញ និងអាងត្រពាំងថ្មនៅបន្ទាយមានជ័យ សុទ្ធតែបន្តស្រកចុះនៅថ្ងៃនេះ

ជាតិ

កម្រិតទឹកទំនប់៧មករានៅភ្នំពេញ និងអាងត្រពាំងថ្មនៅបន្ទាយមានជ័យ សុទ្ធតែបន្តស្រកចុះនៅថ្ងៃនេះ

28, Oct 2020 , 10:47 am

រូបភាព

ក្រុមការងារមន្ទីរធនធានទឹក និងឧតុនិយម ខេត្តបន្ទាយមានជ័យ ចុះពិនិត្យអាងត្រពាំងថ្ម។ រូបថត ក្រសួងធនធានទឹក

ដោយ៖ ស៊ុល រ៉វី

ក្រសួងធនធានទឹក និងឧតុនិយម នាថ្ងៃទី២៨ ខែតុលា ឆ្នាំ២០២០ នេះ បានជូនព័ត៌មានពីការបន្តស្រកចុះកម្រិតទឹកនៅស្ទឹងព្រែកត្នោតត្រង់សំណង់ទ្វារទឹកទំនប់៧មករា ក្នុងភូមិសាស្ត្ររាជធានីភ្នំពេញ និងអាងត្រពាំងថ្ម ក្នុងខេត្តបន្ទាយមានជ័យ។

ទឹកស្ទឹងព្រែកត្នោត នៅសំណង់ទ្វារទឹកទំនប់អាង៧មករា និងកម្ពស់ទឹកខាងមុខទ្វារ បន្តស្រកចុះ ១,៨៧ម៉ែត្រ ធៀបនឹងកម្ពស់ទឹកអតិបរិមា ៦,៦៧ម៉ែត្រ កាលពីថ្ងៃទី ១៤ ខែតុលាកន្លងទៅ។ ក្រសួងបានបញ្ជាក់ថា នៅព្រឹកនេះ កម្ពស់ទឹកស្ទឹងព្រែកត្នោតនៅបន្តស្រកចុះ ០,៥០ម៉ែត្របន្ថែមទៀត។

ជំនន់ទឹកចំណុចទីតាំងព្រែកត្នោតនេះ បានធ្វើឲ្យខេត្តមួយចំនួន និងសង្កាត់ជាច្រើន ក្នុងខណ្ឌដង្កោ រាជធានីភ្នំពេញ ទទួលរងការជន់លិច ដែលមកទល់ពេលនេះ ទឹកនៅទីតាំងខ្លះបានស្រកចុះជាបន្តបន្ទាប់ និងខ្លះទៀតក៏នៅតែបន្តជន់លិចនៅឡើយ។

ដោយឡែកនៅអាងត្រពាំងថ្ម ក្រុមការងារមន្ទីរធនធានទឹក និងឧតុនិយមខេត្តបន្ទាយមានជ័យ ពិនិត្យឃើញកម្រិតទឹកអាងបានស្រកបណ្តេីៗវិញ ពោលគឺស្រក០.១ម៉ែត្រ ដោយបច្ចុប្បន្នក្រុមការងារបានលេីកទ្វារទឹកស្វ័យប្រវត្តិ ០១ ទ្វារវិញ ។

គិតត្រឹមថៃ្ងទី២៨ ខែតុលា កម្រិតទឹកក្នុងអាង ២២០លានម៉ែត្រគូប។ សូមបញ្ជាក់អាងទឹកត្រពាំងថ្មនេះ មានកម្រិតទឹក ១៨០លានម៉ែត្រគូប អាចស្រោចស្រពស្រូវប្រាំងចំនួន ១២ ០០០ហិកតា និងស្រូវវស្សា ២០ ០០០ ទៅ៣០ ០០០ហិកតា៕