អន្តរជាតិ
ឈឺធ្មេញ នារីថៃម្នាក់ទិញថ្នាំលេប ដោយគ្មានវេជ្ជបញ្ជា បណ្តាលឲ្យរលេះរលួយស្បែក
×![]()
ដោយ: ធីតា
នារីថៃអាយុ២៥ឆ្នាំ ម្នាក់ខ្លោចស្បែកពេញខ្លួន ដោយសារតែប្រតិកម្មថ្នាំដែលទិញដោយគ្មានវេជ្ជបញ្ជា។ យោងតាមការផ្សាយរបស់បណ្តាសារព័ត៌មានថៃ កាលពីខែមិថុនា នាង Yothika Kaewkham បានទិញថ្នាំពីឱសថស្ថានមួយកន្លែង ដោយគ្មានវេជ្ជបញ្ញា និងលើសបរិមាណ ទៅលេបដើម្បីបំបាត់ការឈឺធ្មេញ។
Yothika ធ្វើការក្នុងហាងមួយកន្លែងនៅខេត្តឈុនបុរី ប្រទេសថៃ។ នាងបានចាប់ផ្តើមលេបថ្នាំមួយគ្រាប់នៅព្រឹកថ្ងៃទី១៩ ខែឧសភា ហើយលេបមួយគ្រាប់ទៀតនៅពេលថ្ងៃត្រង់។ ប៉ុន្មានម៉ោងក្រោយមក ស្បែករបស់នាងបានចេញស្នាមកន្ទួល និងពងបែកពេញខ្លួន។
ដោយសារពិបាកទ្រាំ និងចុកចាប់យ៉ាងខ្លាំងន Yothika បានឲ្យស្វាមីនាំទៅពេទ្យ ហើយក្រុមវេជ្ជបណ្ឌិតបានបញ្ជូននាងទៅបន្ទប់សង្គ្រោះបន្ទាន់ (ICU) ហើយបន្តព្យាបាលនៅទីនោះ មួយសប្តាហ៍ មុននឹងទៅសម្រាកនៅផ្ទះរបស់ខ្លួនវិញ។
ជាង២សប្តាហ៍ក្រោយមក Yothika ដែលអាចប្រាស្រ័យទាក់ទងបាននោះ ទទួលស្គាល់ថា នេះជាមេរៀនដ៏ធំបំផុតក្នុងជីវិតរបស់ខ្លួន នាងលែងហ៊ានទិញថ្នាំដោយគ្មានវេជ្ជបញ្ជាទៀតហើយ។ តាមការផ្សាយរបស់ The Sun ស្ត្រីវ័យក្មេងរូបនេះ បានអះអាងថា នាងឈឺចេញពីក្នុងខ្លួន ហើយបន្តទៅស្បែកខាងក្រៅ ប៉ុន្តែពេលនេះ នាងមានអាការៈធូរស្រាលច្រើនហើយ។
លោកវេជ្ជបណ្ឌិត Surachoke Tangwiowat លេខារងនៃរដ្ឋបាលចំណីអាហារ និងថ្នាំរបស់ថៃ បានបញ្ជាក់ថា Yothika មានប្រតិកម្មយ៉ាងធ្ងន់ធ្ងរជាមួយ ibuprofen ហើយនេះជាសំណាងដ៏ធំ ដែលនាងមិនរងគ្រោះថ្នាក់ដល់ជីវិត។
លោកបានអះអាងថា៖ «មនុស្សងាយនឹងមានប្រតិកម្មទៅនឹងថ្នាំបំបាត់ការឈឺចាប់អ៊ីប៊ុយប្រូហ្វេន ជាងថ្នាំបំបាត់ការឈឺចាប់ប្រភេទប៉ារ៉ាសេតាមុល។ ករណីធ្ងន់ធ្ងរខ្លអ អាចបណ្តាលឲ្យស្លាប់ ដូច្នេះ វាជារឿងដែលត្រូវយកចិត្តទុកដាក់បំផុត ដោយមិនត្រូវលេបថ្នាំ ដោយគ្មានវេជ្ជបញ្ញានោះឡើយ»។
តាមការស្រាវជ្រាវ សម្រាប់ថ្នាំបំបាត់ការឈឺចាប់មួយប្រភេទឈ្មោះថា Nonsteroidal Anti-inflammatory Drugs (NSAIDS) ដូចជាពពួក Ibuprofen ប្រហែលជាអាចបណ្តាលឲ្យឈឺពោះ ហូរឈាម ដំបៅក្រពះ និងផលវិបាកផ្សេងៗទៀត ជាពិសេសនៅពេលប្រើក្នុងកម្រិតខ្ពស់ ឬរយៈពេលយូរ។
សម្រាប់ថ្នាំគ្មានវេជ្ជបញ្ជាវិញ ដែលអាចព្យាបាលការឈឺក្បាលបាននោះ មិនគួរណាប្រើច្រើនជាង ១០ថ្ងៃក្នុងមួយខែរយៈពេលបីខែ ឬខ្ពស់ជាងនេះឡើយ ព្រោះវាអាចប៉ះពាល់ដល់សុខភាពធ្ងន់ធ្ងរ៕
Tag:
សុខភាព
© រក្សាសិទ្ធិដោយ thmeythmey.com
