UCL៖ Ronaldo គ្មានឈ្មោះលេងក្នុងជំនួប Juventus ទល់ Barca ដោយសារ COVID-19

កីឡាអន្តរជាតិ

អន្តរជាតិ

UCL៖ Ronaldo គ្មានឈ្មោះលេងក្នុងជំនួប Juventus ទល់ Barca ដោយសារ COVID-19

28, Oct 2020 , 4:59 pm

រូបភាព

ដោយ: ទេព ពិទូរ្យ

Cristiano Ronaldo គ្មានឈ្មោះលេងឲ្យក្រុម Juventus ពេលប៉ះ Barcelona ក្នុងការប្រកួតក្របខណ្ឌ Champions League នៅរាត្រីថ្ងៃទី២៨ ខែតុលានេះឡើយ។ នេះមានន័យថា Ronaldo ត្រូវខកខានឱកាសក្នុងការតតាំងជាមួយគូប្រជែង Lionel Messi ដោយសាររូបគេនៅតែមានផ្ទុកជំងឺ COVID-19 នៅឡើយ។

ខ្សែប្រយុទ្ធឆ្នើម វ័យ៣៥ឆ្នាំរូបនេះ បានធ្វើតេស្តវិជ្ជមាន COVID-19 កាលពីដើមខែតុលានេះក្នុងពេលបំពេញកាតព្វកិច្ចឲ្យក្រុមជម្រើសជាតិព័រទុយហ្គាល់ និងខកខានការប្រកួតសរុបចំនួន ៣ លើករួចមកហើយ ដោយមួយប្រកួតជាមួយព័រទុយហ្គាល់ និង២ប្រកួតជាមួយ Juventus។ ក្រោយចត្តាឡីស័កតាមវិធីសារសុខាភិបាលរួចមក Ronaldo បានទទួលការធ្វើតេស្តម្តងទៀត ហើយលទ្ធផលរូបគេនៅតែមានផ្ទុកជំងឺរាតត្បាតនេះដដែល។

សម្រាប់ជំនួបប្រកួតវគ្គសន្សំពិន្ទុពូល G នៅរាត្រីនេះ Ronaldo នឹងខកខានបង្ហាញខ្លួនឲ្យក្រុមសេះបង្កង់នៅកីឡដ្ឋាន Allianz ដែលជាជំនួបដ៏ទាក់ទាញសម្រាប់អ្នកតាមដានកីឡាបាល់ទាត់ នៅពេលរូបគេត្រូវជួបជាមួយតារាឆ្នើម Messi នៅលើទីលានជាថ្មីម្តងទៀតនោះ។

Ronaldo និងប្រធានក្រុមជម្រើសជាតិអាហ្សង់ទីន វ័យ៣៣ឆ្នាំ បានបង្កើតភាពល្បីល្បាញរៀងខ្លួន ក្នុងនាមកីឡាករឆ្នើមពីររូបអំឡុងពេលពួកគេនៅក្របខណ្ឌអេស្ប៉ាញ La Liga។ Ronaldo បានជួយ Real Madrid ឈ្នះពានធំៗជាច្រើន និងឈ្នះកីឡាករល្អដំដាប់ពិភពលោក Ballon d’Or ៥ដង ខណៈ Messi ម្ចាស់ពាន Ballon d’Or ៦សម័យ ក៏បានជួយក្រុមអ្នកមានបុណ្យឈ្នះពានលើសលុបដូចគ្នា។

យ៉ាងណាក៏ដោយ អ្នកទាំងពីរនៅមានឱកាសប៉ះគ្នានៅជំនួបលើកទី២ ក្នុងពូល G នេះម្តងទៀត ដែលនឹងត្រូវធ្វើឡើងនៅទឹក Camp Nou របស់ Barcelona៕

ជំនួបគូដទៃនៅរាត្រីថ្ងៃទី២៨ ខែតុលានេះ៖

ពូល E

FC Krasnodar Vs Chelsea (ម៉ោង ១២:៥៥នាទី)

Sevilla Vs Rennes (ម៉ោង ៣:០០នាទី)

ពូល F

Borussia Dortmund Vs Zenit St. Petersburg (ម៉ោង ៣:០០នាទី)

Club Brugge Vs Lazio (ម៉ោង ៣:០០នាទី)

ពូល G

Ferencvaros Vs Dynamo Kyiv (ម៉ោង ៣:០០នាទី)

ពូល H

Istanbul Basaksehir Vs Paris Saint-Germain (ម៉ោង ១២:៥៥នាទី)