ក្រុមហ៊ុនឱសថចំនួន២ បានបញ្ចេញផែនការផ្តល់វ៉ាក់សាំងCOVID-19 ចំនួន២០០លានដូស នៅពេលដែលវ៉ាក់សាំងនោះប្រើការបាន ទៅឲ្យកម្មវិធីCOVAX ដែលដឹកនាំដោយអង្គការសុខភាពពិភពលោក(WHO) និងសម្ព័ន្ធវ៉ាក់សាំងអន្តរជាតិ(GAVI)។
ក្រុមហ៊ុនឱសថបារាំងSanofi និងអង់គ្លេសGSK បានចុះសន្យាលើ សេចក្តីថ្លែងការណ៍ស្តីពីបំណងក្នុងការផ្តល់វ៉ាក់សាំងCOVID-19 ចំនួន២០០លានដូសដល់កម្មវិធីវ៉ាក់សាំងអន្តរជាតិCOVAX។
COVAX គឺជាកម្មវិធីដែលមានបំណងផ្តល់វ៉ាក់សាំងCOVID-19 ចំនួន២ពាន់លានដូសដល់ប្រទេសទាំងអស់នៅជុំវិញពិភពលោក គិតត្រឹមចុងឆ្នាំ២០២១។ កម្មវិធីនេះមានប្រទេសចំនួន១៨០ចូលរួម ក្រៅពីនេះក៏មានដៃគូចូលរួមពីអង្គការមនុស្សធម៍ ក្រុមហ៊ុន និងអង្គការធ្វើការលើវិស័យសុខាភិបាលផងដែរ។
Sanofi និងGSK កំពុងសហការគ្នាអភិវឌ្ឍវ៉ាក់សាំងCOVID-19។ បើទោះបីជាការអភិវឌ្ឍវ៉ាក់សាំង កំពុងស្ថិតនៅក្នុងតំណាក់កាលដំបូងក្តី ក្រុមហ៊ុនឱសថទាំង២សង្ឃឹមថានឹងទទួលបានលទ្ធផលនៅដើមខែធ្នូ។ ក្រុមហ៊ុនទាំង២នេះ រំពឹងនឹងធ្វើតេស្តលើមនុស្សនៅចុងឆ្នាំ និងការទទួលការអនុញ្ញាតនៅពាក់កណ្តាលឆ្នាំ២០២១។
លោកThomas Triomphe ប្រធានផ្នែកវ៉ាក់សាំងរបស់Sanofi បានលើកឡើងថា៖« ការតាំងចិត្តរបស់យើងថ្ងៃនេះ សម្រាប់កម្មវិធីCOVAX គឺដើម្បីចូលរួមគ្នាទប់ទល់នឹងជំងឺឆ្លងឲ្យកាន់តែប្រសើរ»។ លោកបន្ថែមថា ដើម្បីដោះស្រាយបញ្ហាសុខាភិបាលសកល ចាំបាច់ត្រូវការភាពជាដៃគូដ៏ពិសេសមួយ។នេះយោងតាមសារព័ត៌មានAFP។
ក្រៅតែពីសន្យាផ្តល់វ៉ាក់សាំងដល់កម្មវិធីCOVAX ក្រុមហ៊ុនទាំង២ ក៏បានចុះកិច្ចសន្យាផ្តល់វ៉ាក់សាំង១០០លានដូសដល់អាមេរិកក្នុងតម្លៃ២,១ពាន់លានដុល្លារ។ ចំណែកអង់គ្លេសចុះកិច្ចសន្យាទិញវ៉ាក់សាំង៩០លានដូស និង៣០០លានដូសសម្រាប់សហភាពអឺរ៉ុប។
វ៉ាក់សាំងដែលរួមគ្នាផលិតដោយក្រុមហ៊ុនទាំង២នេះ គឺជាប្រភេទវ៉ាក់សាំងបែបប្រូតេអ៊ីន ប្រើប្រាស់បច្ចេកវិទ្យាដូចទៅនឹងវ៉ាក់សាំងសម្រាប់ជំងឺផ្តាសាយដែលផលិតដោយSanofi រួមផ្សុំជាមួយសារធាតុបង្កើនការឆ្លើយតបនៃប្រព័ន្ធភាពស៊ាំដែលផលិតដោយក្រុមហ៊ុនGSK។
ការទទួលបានវ៉ាក់សាំងCOVID-19 គឺជាបញ្ហាប្រឈមសម្រាប់ប្រទេសដែលមានចំណូលកម្រិតទាបនិងមធ្យម ត្បិតអីប្រទេសមានធនធានបានស្រវាកក់វ៉ាក់សាំងទុកជាមុន ដែលជាហេតុបណ្តាលឲ្យប្រទេសទាំងនោះត្រូវរងចាំរយៈពេលយូរ។ ជាក់ស្តែងរបាយការណ៍របស់Oxfam បានបង្ហាញថាក្រុមប្រទេសអ្នកមាន ដែលតំណាងឲ្យត្រឹមតែ១៣ភាគរយនៃប្រជាជនទូទាំងពិភពលោក បានទិញកក់វ៉ាក់សាំងCOVID-19ចំនួនពាក់កណ្តាល ដែលនឹងត្រូវផលិតនៅពេលអនាគត
ហេតុនេះហើយទើបអគ្គលេខាធិការអង្គការសហប្រជាជាតិ លោក Antonio Guterresលើកឡើងនៅថ្ងៃទី២៥ តុលាថា ពិភពលោកត្រូវការសាមគ្គីភាពរាល់ជំហានដែលខ្លួនដើរ ហើយលោកសង្កត់ធ្ងន់ថា ថ្នាំវ៉ាក់សាំង ត្រូវតែជាផលិតផលសាធារណៈសកល។