អន្តរជាតិ
រូបភាព៖ EPA-EFE
×![]()
ដោយ: ធៀន ភារិន្ទ
អ្នកស្លាប់ដោយសារព្យុះម៉ូឡាវ នៅវៀតណាម បានកើនដល់ ២៥នាក់ហើយ ខណៈប្រជាជនចំនួន ៤០នាក់ កំពុងបាត់ខ្លួន គិតត្រឹមថ្ងៃទី២៩ ខែតុលា។ 
រដ្ឋាភិបាលវៀតណាម បានចេញបញ្ជាឲ្យទាហានជាច្រើននាក់ ដោយមានរថយន្តធុនធ្ងន់ជាជំនួយ ចេញប្រតិបត្តិការស្វែងរកជនរងគ្រោះ ដែលបានបាត់ខ្លួន ដោយសារតែការបាក់ដី។ ដោយសារតែឥទ្ធិពលម៉ូឡាវ ភ្លៀងបានបន្តធ្លាក់យ៉ាងខ្លាំងនៅភាគកណ្តាលនៃប្រទេសវៀតណាម ដែលបង្កឲ្យមានដីបាក់នៅក្នុងខេត្ត Quang Nam។
គ្រោះមហន្តរាយនេះបង្កឲ្យអ្នកស្លាប់កើនឡើងដល់ ២៥នាក់ ហើយអ្នកបាត់ខ្លួនកើនដល់ចំនួន ៤០នាក់ផងដែរ។ ក្នុងចំណោមអ្នកស្លាប់នេះ មានអ្នកនេសាទចំនួន ១២នាក់ ខណៈ ១៤នាក់ផ្សេងទៀត នៅតែបន្តបាត់ខ្លួនដដែល។ ទូកនេសាទចំនួន២ ដែលមានមនុស្សចំនួន ២៦នាក់ បានលិចនៅថ្ងៃទី២៨ ខែតុលា។
តាមរយៈសេចក្តីថ្លែងការណ៍មួយ ឧបនាយករដ្ឋមន្ត្រីវៀតណាម លោកTrinh Dinh Dung បានបញ្ជាក់យ៉ាងដូច្នេះថា៖« យើងអាចព្យាករពីទិសដៅព្យុះ និងកម្រិតទឹកភ្លៀងបាន ប៉ុន្តែយើងមិនអាចព្យាករនៅពេលណា មានដីបាក់បានទេ»។
បើតាមការអះអាងរបស់ឧបនាយករដ្ឋមន្ត្រីវៀតណាមរូបនេះ បើទោះបីជាមានភ្លៀងធ្លាក់ខ្លាំងយ៉ាងណាក៏ដោយ ក្រុមជួយសង្គ្រោះនៅតែចេញប្រតិបត្តិការ ដើម្បីជួយសង្គ្រោះជនរងគ្រោះដដែល។
តាមការចុះផ្សាយរបស់ទីភ្នាក់ងារព័ត៌មានReuters រដ្ឋាភិបាលវៀតណាម បានអះអាងថា ព្យុះម៉ូឡាវ បានធ្វើឲ្យប្រជាជនវៀតណាម កន្លះលាននាក់ គ្មានអគ្គិសនីប្រើប្រាស់ និងផ្ទះប្រមាណ ៥៦០០០ខ្នង ត្រូវបានបំផ្លាញ។
សូមបញ្ជាក់ថា ការព្យាកររបស់ទីភ្នាក់ងារអាកាសធាតុវៀតណាម ព្យុះម៉ូឡាវ ដែលមានកម្រិតទឹកភ្លៀងរហូតដល់ ៧០០មីលីម៉ែត្រនេះ នឹងបន្តមានវត្តមាននៅភាគកណ្តាលរបស់វៀតណាមរហូតដល់ថ្ងៃទី៣១ ខែតុលា៕
Tag:
វៀតណាម
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
