មនុស្សបីនាក់បានស្លាប់បាត់បង់ជីវិតក្នុងការវាយប្រហារមួយដោយជនជ្រុលនិយមប្រដាប់ដោយកាំបិតនៅក្នុងវិហារសាសនាគ្រឹស្តមួយកន្លែង ស្ថិតនៅក្នុងទីក្រុងនីសប្រទេសបារាំងនៅថ្ងៃព្រហស្បតិ៍ទី២៩ខែតុលា។ សន្តិសុខនៅតាមវិហារសាសនា និងសាលារៀនត្រូវបានរឹតបន្តឹងខ្លាំង ខណៈរដ្ឋាភិបាលបារាំង ចាត់ទុកថាសកម្មភាពនេះការវាយប្រហាររបស់ក្រុមឥស្លាមជ្រុលនិយមផង។
ករណីវាយប្រហារដ៏សាហាវមួយកើតឡើងនៅកណ្តាលទីក្រុងនីស នៅថ្ងៃព្រហស្បតិ៍ បានបណ្តាលឲ្យមានមនុស្សស្លាប់រហូតដល់បីនាក់ឯណោះ។ នេះបើតាមទីភ្នាក់ងារព័ត៌មាន AFP ដែលដកស្រង់សម្តី រដ្ឋអាជ្ញាបារាំងដែលទទួលបន្ទុកសំណុំរឿងប្រឆាំងភេរវកម្ម Jean-Francois Ricard ។
ជនរងគ្រោះទាំងបីនាក់នោះរួមមានស្ត្រីវ័យ ៦០ឆ្នាំម្នាក់ ត្រូវជនល្មើសអាបំពង់កស្ទើដាច់។ ចំណែកជន រង គ្រោះទីពីរជាបុរសវ័យ ៥៥ ឆ្នាំ ជាបុគ្គលិកដែលបម្រើការងារក្នុងវិហារគ្រឹស្តតែម្តងហើយលោក មានស្នាម អារនៅលើបំពង់កដូចគ្នា។
ជនរងគ្រោះទីបី គឺជាស្ត្រី វ័យ៤៤ឆ្នាំ ដែលបានស្លាប់ភ្លាមៗ បន្ទាប់ពីព្យាយាមរត់គេចចេញពីវិហារ។ រូបគាត់មានស្នាមរបួសច្រើនពាសពេញខ្លួន។
បើតាមរដ្ឋអាជ្ញាខាងលើ ជនល្មើសដែលធ្វើសកម្មភាពវាយប្រហារនេះមានវ័យ ២១ឆ្នាំ ជាជនអន្តោប្រវេស្តន៍ដែលមានដើមកំណើតពីប្រទេសទុយណេស៊ី។ ក្នុងពេលធ្វើសកម្មភាពជននេះមានកាន់កម្ពីកូអានមួយក្បាល រួមជាមួយកាំបិតចំនួនបីជាប់ខ្លួនផង។ រូបគេត្រូវប៉ូលិសបាញ់ឲ្យរបួស និងត្រូវបញ្ជូនទៅព្យាបាលរួចហើយ។
អ្វីដែលគួរឲ្យកត់សម្កាល់ ជននេះបន្តប្រឹងស្រែកខ្លាំងៗថា៖ «ព្រះគឺអស្ចារ្យលើសគេ» ទាំងក្នុងពេលធ្វើសកម្មភាព និងក្នុងពេលទទួលការព្យាបាលក្នុងមន្ទីរពេទ្យ។
«ការវាយប្រហារយ៉ាងព្រៃផ្សៃនេះក្លាយជាការដាស់តឿនមួយថា មនោគមន៍វិជ្ជាឥស្លាមជ្រុលនិយមគឺនៅតែមានជីវិតនៅឡើយ»។ Jean-Francois Ricard ថ្លែងដូច្នេះ។
ដោយឡែក ប្រធានាធិបតីបារាំងលោក អេម៉ានុយអែល ម៉ាក្រុង ដែលបានធ្វើដំណើរទៅកាន់ទីក្រុងនីសភ្លាមៗក្រោយកើតហេតុ ទទួលស្គាល់ថា បារាំងកំពុងប្រឈមនឹងគ្រោះថ្នាក់ពីការយារយីរដោយចលនាភេរវកម្ម ប៉ុន្តែលោកប្រកាសថា បារាំងមិនចុះញ៉មនឹងការគំរាមកំហែងនេះឡើយទោះក្នុងលក្ខខណ្ឌណាក៏ដោយ។
«វាច្បាស់ណាស់ថា បារាំងគឺកំពុងរងការវវាយប្រហារ។ [ប៉ុន្តែ] យើងបោះបង់ ចោលតម្លៃរបស់យើងឡើយ»។ លោក ម៉ាក្រុង ប្រកាសដូច្នេះ។
ប្រមុខរដ្ឋបារាំងនេះក៏ បានបញ្ជាឲ្យមានការរឹតបន្តឹងសន្តិសុខនៅរាល់វិហារឥស្លាម និងមានពង្រាយកម្លាំងបន្ថែមពី ៣០០០នាក់ដល់ ៧០០០នាក់។ ក្រៅពីវិហារ សន្តិសុខនៅតាមសាលារៀនក៏ ត្រូវបានរឹតបន្តឹងបន្ថែមដូចគ្នាដែរ។
តាមពិតរលកថ្មីនេះចលនាភេរវកម្មកើតឡើង ខណៈដែលបារាំងកំពុងក្លាយជាផ្ទាំងស៊ីបនៃការជះកំហឹងពីបណ្តាប្រទេសឥស្លាមនៅលើពិភពលោក បន្ទាប់ពីលោក ម៉ាក្រុង សន្យាថា បារាំងនឹងប្រយុទ្ធប្រឆាំងនឹងចលនាឥស្លាមជ្រុលនិយម។
សម្តីរបស់មេដឹកនាំនេះធ្វើឡើងក្រោយគ្រូបង្រៀនប្រវត្តិសាស្ត្រនៅបារាំងម្នាក់ត្រូវជនជ្រុលនិយមសម្លាប់ដោយកាត់ក្បាល ដ្បិតតែគ្រូរូបនោះប្រើប្រាស់រូបត្លុករបស់ព្យាការីម៉ូហាម៉ាត់បង្ហាញសិស្សក្នុងម៉ោងរៀន។
ស្របពេលជាមួយគ្នានេះ ខ្លះយល់ថា សម្តីរបស់លោក ម៉ាក្រុង គឺដាក់គោលដៅលើប្រជាជនឥស្លាមប្រមាណចន្លោះពី ប្រាំ ទៅប្រាំមួយលាននាក់ដែលកំពុងរស់នៅក្នុងប្រទេសបារាំងប៉ុណ្ណោះ។
ដោយខឹងនឹងសម្តីរបស់មេដឹកនាំបារាំង ប្រទេសឥស្លាមធំៗជាច្រើនក៏ចាប់ផ្តើមយុទ្ធនាការមួយដែលពហិការាល់ទំនិញរបស់បារាំង ហើយនៅក្នុងប្រទេសខ្លះទៀតដូចជា លីប៊ី ស៊ីរី និងប៉ាគីស្ថាន គេឃើញមានចលនាបាតុកម្មដុតទង់ជាតិបារាំង និងរូបភាពរបស់លោក ម៉ាក្រុង ថែមទៀត។
យ៉ាងណាមិញ លោក ម៉ាក្រុង បានទទូចឲ្យបណ្តាប្រជាជនទាំងអស់ពីគ្រប់មជ្ឈដ្ឋានមិនរើសអើងសាសនារួមសាមគ្គីគ្នាជាធ្លុងមួយដើម្បីតតាំងនឹងបញ្ហាចំពោះមុខនិងព្យាយាមធ្វើយ៉ាងណាការពារមិនឲ្យចរន្តនៃការបែកខ្ញែកគ្នាដឹកមុខបាន៕