ជាតិ
ព័ត៍មានសុខភាព
សម្តេច ហ៊ុន សែន រំឭកអ្នកដើរកម្សាន្តអំឡុងបុណ្យអុំទូក ឲ្យចូលរួមបង្ការការឆ្លងកូវីដ-១៩
× ថ្ងៃទី៣០ តុលានេះ ជាថ្ងៃទី១ នៃព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ។ ក្នុងឱកាសនេះ សម្តេច ហ៊ុន សែន នាយករដ្ឋមន្ត្រី បានរំឭកទៅប្រជាពលរដ្ឋ ដែលដើរកម្សាន្តក្នុងអំឡុងពេលសម្រាកបុណ្យអុំទូកនេះ ឲ្យប្រុងប្រយ័ត្ននិងការពារការចម្លងជំងឺកូវីដ-១៩។ សម្តេចនាយករដ្ឋមន្ត្រី បានសរសេរនៅទំព័រហ្វេសប៊ុករបស់ខ្លួនដូច្នេះ៖«បងប្អូនប្រជាពលរដ្ឋ ត្រូវតែមានការប្រុងប្រយ័ត្នជាប់ជានិច្ច ក៏ដូចជាបង្ការការពារការចម្លងជំងឺកូវីដ១៩ ដោយត្រូវអនុវត្តឲ្យបានខ្ជាប់ខ្ជួននូវការណែនាំរបស់ក្រសួងសុខាភិបាល»។
ទន្ទឹមនឹងដាស់តឿនពលរដ្ឋអ្នកទេសចរ ឲ្យប្រយ័ត្នប្រយែង សម្តេច ហ៊ុន សែន ក៏បន្តអំពាវនាវទៅដល់អាជ្ញាធរ និងសមត្ថកិច្ចគ្រប់ជាន់ថ្នាក់ យកចិត្តទុកដាក់ខ្ពស់ ក្នុងការថែរក្សាសន្តិសុខ សណ្តាប់ធ្នាប់ឱ្យបានល្អ ជូនប្រជាពលរដ្ឋ និងទេសចរបរទេស នៅក្នុងថ្ងៃឈប់សម្រាកក្នុងព្រះរាជពិធីបុណ្យប្រពៃណីជាតិនេះ។
រាជរដ្ឋាភិបាល បានសម្រេចផ្អាកប្រារព្ធ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ឆ្នាំ២០២០នេះ ដើម្បីទប់ស្កាត់ការរាលដាននៃជំងឺកូវីដ-១៩។ គិតត្រឹមថ្ងៃទី៣០ តុលានេះ កម្ពុជាបានរកឃើញវិជ្ជមានជំងឺរាតត្បាតកូវីដ-១៩ ចំនួន ២៩១ករណី ក្នុងនោះមាន២៨៣នាក់ហើយ បានសះស្បើយ និងមិនមានអ្នកបាត់បង់ជីវិតនោះទេ។ តាមក្រសួងសុខាភិបាល អ្នកជំងឺដែលនៅសល់៨នាក់ទៀត កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត៕
Tag:
អុំទូក
ហ៊ុន សែន
ទេសចរណ៍
ទេសចរ
© រក្សាសិទ្ធិដោយ thmeythmey.com