ដោយ៖កង ម៉េងហុង
ប្រធានាធិបតីកូរ៉េខាងត្បូង Moon Jae-in បានប្រកាសថា កូរ៉េខាងត្បូងនឹងព្យាយាមសម្រេចឲ្យបានគោលដៅបញ្ឈប់ការបំភាយឧស្ម័នកាបូនិចលើសកម្រិតនៅត្រឹមឆ្នាំ២០៥០ ។ ការឈានទៅបន្ថយការបំភាយឧស្ម័នកាបូនិចនេះមានចំណែកសំខាន់ក្នុងការប្រយុទ្ធប្រឆាំងការប្រែប្រួលអាកាសធាតុ។
ប្រធានាធិបតីកូរ៉េខាងត្បូង Moon Jae-in បានសន្យាថាប្រទេសរបស់លោកនឹងព្យាយាមធ្វើឱ្យគ្មានការបំភាយឧស្ម័នកាបូនិចលើសកម្រិតឲ្យបានសម្រេចនៅត្រឹមឆ្នាំ ២០៥០។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ក្នុងសុន្ទរកថាទៅកាន់សភា លោក Moon បាននិយាយថា៖« ជាផ្នែកមួយនៃកិច្ចខិតខំប្រឹងប្រែង ដើម្បីឆ្លើយតបយ៉ាងសកម្មចំពោះការប្រែប្រួលអាកាសធាតុ យើងនឹងខិតខំលុបបំបាត់ការបំភាយកាបូននិចលើកម្រិតឲ្យបាននៅឆ្នាំ ២០៥០» ។
យ៉ាងណាក៏ដោយការឈានទៅកាត់បន្ថយការបំភាយឧស្ម័នពុលនេះទាំងស្រុងទៅកាន់បរិយាកាស មិនមែនជារឿងងាយស្រួលសម្រាប់កូរ៉េខាងត្បូងទេ ដ្បិតថា ប្រទេសនេះបន្តពឹងផ្អែកខ្លាំងលើថាមពលធ្យូងថ្ម និងថាមពលនុយក្លេអ៊ែរផងនោះ។
យោងតាមតួលេខពីទីភ្នាក់ងារថាមពលអន្តរជាតិ ធ្យូងថ្មមានចំណែករហូតដល់ ៤០ ភាគរយឯណោះក្នុងថាមពលអគ្គីសនីដែលផលិតបានសរុបក្នុងប្រទេសដែលមានសេដ្ឋកិច្ចធំបំផុតលេខរៀងទី ១២ របស់ពិភពលោក។
ជុំវិញការប្តេជ្ញាចិត្តនេះ ប្រមុខរដ្ឋកូរ៉េខាងត្បូងអះអាងថា រដ្ឋាភិបាលខ្លួននឹងវិនិយោគលុយប្រមាណ ២,៤ ពាន់ពាន់លានវ៉ុន (២,១ ពាន់លានដុល្លារអាមេរិក) នៅឆ្នាំក្រោយ ដើម្បីជំនួសការផលិតថាមពលពីធ្យូងនិងជំនួសមកវិញដោយថាមពលកកើតឡើងវិញ។ រដ្ឋាភិបាលក៏នឹងវិនិយោគលុយ ៤,៣ ពាន់ពាន់លានវ៉ុនផ្សេងទៀត ដើម្បីបង្កើនចំនួនស្ថានីយសាកថ្មសម្រាប់យានយន្តអគ្គិសនី។
ទន្ទឹមជាមួយគ្នានេះ ក្រុងសេអ៊ូលគ្រោងនឹងកាត់បន្ថយរោងចក្រថាមពលនុយក្លេអ៊ែរពីចំនួន២៤ ក្នុងពេលបច្ចុប្បន្ន ដែលជាចំនួនមួយខ្ពស់បំផុតលើពិភពលោកឲ្យនៅត្រឹម១៧ ក្នុងឆ្នាំ ២០៣៤ ខាងមុខ។
ការប្រកាសជំហរបន្ថយការបំពុលបរិយាកាសរបស់មេដឹកនាំកូរ៉េខាងត្បូង ធ្វើឡើងក្រោយពីប្រធានាធិបតីចិនលោក ស៊ី ជីនភីង ប្រកាសថាចិនដែលបច្ចុប្បន្នជាប្រទេសបំពុលពិភពលោកខ្លាំងជាងគេនឹងព្យាយាមបង្កើនកម្រិតបំភាយឧស្ម័នឲ្យដល់កម្រិតបរិមានៅឆ្នាំ ២០៣០ និង ធានាថា គ្មានការបំភាយឧស្ម័ននេះលើសកម្រិតនៅត្រឹមឆ្នាំ ២០៦០។
បន្ទាប់មក គេឃើញនាយករដ្ឋមន្ត្រីជប៉ុនលោក Yoshihide Suga ក៏ចេញមុខប្រកាសដែរនៅសប្តាហ៍នេះថា ជប៉ុននឹងក្លាយជាប្រទេសគ្មានការបំភាយឧស្ម័នកាបូនិចលើសកម្រិតនៅឆ្នាំ ២០៥០។
ខណៈដែលការឈានទៅបន្ថយឧស្ម័នកាបូនិចពឹងផ្អែកលើការផ្លាស់ប្តូរប្រភពថាមពលអគ្គិសនី គេសង្ឃឹមថា កូរ៉េខាងត្បូងនឹងឈានទៅបង្កើនការផលិតថាមពលចេញពី ខ្យល់ ទឹក និង ថាមពលពន្លឺព្រះអាទិត្យតនៅពេលឆាប់ៗ។
លោក Joojin Kim នៃស្ថាប័នដំណោះស្រាយសម្រាប់អាកាសធាតុដែលជាក្រុមតស៊ូមតិលើបញ្ហាបរិស្ថាននោះមានប្រសាសន៍ថា «ការកម្រិតការបំភាយឧស្ម័នកាបូនិចនៅឆ្នាំ ២០៥០» នឹងមិនអាចត្រូវបានសម្រេចដោយគ្មានការផ្លាស់ប្តូរជាមូលដ្ឋាននៅក្នុងគោលនយោបាយថាមពលរបស់កូរ៉េខាងត្បូងទេ។
«កូរ៉េខាងត្បូងត្រូវតែបញ្ឈប់ការសាងសង់រោងចក្រថាមពលធ្យូងថ្មថ្មីជាបន្ទាន់ ហើយចាប់ផ្តើមជំនួសធ្យូងថ្មដែលមានស្រាប់ជាមួយនឹងការផ្គត់ផ្គង់ថាមពលកកើតឡើងវិញ»។ អ្នកជំនាញរូបនេះអះអាងដូច្នេះ៕