ជាតិ
សេដ្ឋកិច្ច
ស្ថិតក្នុងវិបត្តិកូវីដ១០ខែ តែការនាំអង្ករកម្ពុជាទៅក្រៅប្រទេស កើនជាង១៧ភាគរយ រូបពីលោក វេង សាខុន និងរូបវាលស្រូវ ពីគណនីហ្វេសប៊ុករបស់លោក វេង សាខុន។ រូបឡានដឹកស្រូវ ពីសហពន្ធស្រូវអង្ករកម្ពុជា។
× ភ្នំពេញ៖ ក្នុងរយៈពេល១០ខែនៃជួបវិបត្តិជំងឺកូវីដ-១៩ ដោយគិតពីខែមករា ដល់ខែតុលា ឆ្នាំ២០២០ កម្ពុជា នាំចេញអង្ករទៅទីផ្សារបរទេស បានជាង៥៣ម៉ឺនតោន។ នេះបើតាមទិន្នន័យ ដែលបង្ហោះលើគណនីហ្វេសប៊ុករបស់លោក វេង សាខុន រដ្ឋមន្រី្តក្រសួងកសិកម្ម រុក្ខានប្រមាញ់ និងនេសាទ។
តួលេខដែលបង្ហាញដោយ លោក វេង សាខុន បានឲ្យដឹងថា បរិមាណនៃការនាំចេញអង្ករជាង៥៣ម៉ឺនតោន ក្នុងរយៈពេល១០ខែនៃឆ្នាំ២០២០នេះ គឺបានកើនរហូតជាង១៧ភាគរយ បើធៀបនឹងរយៈពេលដូចគ្នា កាលពីឆ្នាំ២០១៩កន្លងមក។ រយៈពេល១០ខែនៃឆ្នាំ២០១៩ កម្ពុជា នាំអង្ករទៅក្រៅប្រទេសបានជាង៤៥ម៉ឺនតោន។
លោក វេង សាខុន ផ្តល់ព័ត៌មានលម្អិតថា ក្នុងចំណោមអង្ករជាង៥៣ម៉ឺនតោន ដែលបាននាំចេញនេះ មានអង្ករក្រអូបគ្រប់ប្រភេទជាង៤២ម៉ឺនតោន អង្ករសចម្រុះគ្រប់ប្រភេទជាង១០ម៉ឺនតោន និង អង្ករចំហ៊ុយជាង៦ពាន់តោន ដោយមាន៦០ប្រទេស បានបញ្ជាទិញ។
បើតាមរដ្ឋមន្ត្រីកសិកម្មដដែល ប្រទេសឬតំបន់ដែលជាទីផ្សារបញ្ជាទិញអង្ករច្រើនជាងគេ ពីកម្ពុជាក្នុងរយៈពេល១០ខែនេះ មានប្រទេសចិន (ហុងកុង ម៉ាកាវ និងតៃវ៉ាន់) បាននាំចូលជាង១៩ម៉ឺនតោន តំបន់សហភាពអឺរ៉ុប បាននាំចូលជាង១៧ម៉ឺនតោន ប្រទេសក្នុងតំបន់អាស៊ាននាំចូលជិត៧,២ម៉ឺនតោន និង ប្រទេសផ្សេងទៀត បាននាំចូលជាង៩,៥ម៉ឺនតោន។
លោក សុង សារ៉ន ប្រធានសហព័ន្ធស្រូវអង្ករកម្ពុជា ថ្លែងក្នុងបទសម្ភាសជាមួយសារព័ត៌មានថ្មីៗកន្លងមកថា សម្រាប់ឆ្នាំ២០២០នេះ កម្ពុជាអាចនាំចេញអង្ករបានយ៉ាងតិច៨០ម៉ឺនតោន ហើយនឹងឈានសម្រេចគោលដៅក្នុងការនាំអង្ករឲ្យបាន១លានតោន នៅឆ្នាំ២០២១។ ប៉ុន្តែលោកបានបញ្ជាក់ថា ការសម្រេចបានលទ្ធផលទាំងនេះ គឺអាស្រ័យលើការបញ្ជទិញពីសំណាក់ប្រទេសចិន ក្នុងការរក្សាបានកំណើនដ៏ខ្ពស់ដដែលនៃការទិញអង្ករពីកម្ពុជា៕
© រក្សាសិទ្ធិដោយ thmeythmey.com