សង្គមអន្តរជាតិ
អន្តរជាតិ
ស្រីលង្កា ផ្ដើមបញ្ជូនសំរាមខុសច្បាប់២៤២កុងទឺន័រត្រលប់ទៅអង់គ្លេសវិញ
×![]()
អាជ្ញាធរស្រីលង្កា បានចាប់ផ្ដើមដឹកបញ្ជូនសំរាម ២៤២ កុងទឺន័រ ត្រលប់ទៅឲ្យចក្រភពអង់គ្លេស វិញ ក្រោយតតាំងរឿងក្តី២ឆ្នាំ។ មន្ត្រីស្រីលង្កា បញ្ជាក់បែបនេះ នៅថ្ងៃទី ៣១ ខែតុលា។ 
កាកសំណល់វេជ្ជសាស្ត្រ ២០ កុងទឺន័រដំបូង ដែលរួមទាំង បំណែកខ្មោចពីបន្ទប់រក្សាសាកសពក្នុងមន្ទីរពេទ្យ ត្រូវបានដឹកតាមនាវាឆ្ពោះទៅកាន់ប្រទេសអង់គ្លេស កាលពីថ្ងៃទី ៣០ ខែតុលា ហើយសំរាម ៦៥កុងទឺន័រផ្សេងទៀត នឹងត្រូវដឹកបញ្ជូនក្នុងរយៈពេលមួយសប្ដាហ៍ខាងមុខផងដែរ។ អ្នកនាំពាក្យនាយកដ្ឋានគយស្រលីង្កា Sunil Jayaratne បានបញ្ជាក់បែបនេះ ។
បើតាមលោក Jayaratne សំរាមទាំង២៤២ កុងទឺន័រនេះ នឹងត្រូវដឹកជាបន្តបន្ទាប់ នៅពេលដែលមាននាវាទំនេរសម្រាប់ដឹកពួកវា។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
តុលាការឧទ្ធរណ៍ស្រីលង្កា កាលពី២សប្ដាហ៍មុន បានចេញបញ្ជាឲ្យដឹកបញ្ជូនត្រលប់ទៅវិញនូវកាកសំណល់ពីមន្ទីរពេទ្យ និងសំរាមប្លាស្ទិករាប់សិបតាន ដែលបាននាំចូលខុសច្បាប់ពីបរទេស។ ការដឹកសំរាមនេះ បានមកដល់ទឹកដីស្រីលង្កា ចន្លោះពីខែកញ្ញា ឆ្នាំ ២០១៧ និង ខែមករា ឆ្នាំ២០១៨។
ក្នុងខែកញ្ញា សំរាមប្រមាណ ២៦០តោន ដែលដាក់ក្នុង២១កុងទឺន័រ ត្រូវបានបញ្ជូនត្រលប់ទៅវិញ ក្រោយចក្រភពអង់គ្លេស យល់ព្រមទទួលយកវិញ។
ម្យ៉ាងវិញទៀត អាជ្ញាធរស្រីលង្កា បានរកឃើញសំរាមថ្មី ក្រោយសកម្មភាពផ្លូវច្បាប់ បានចាប់ផ្ដើមប្រឆាំងនឹងសំរាម២៤២កុងទឺន័រ ដែលស្ថិតក្នុងកំពង់ផែកូឡុំបូ និងតំបន់ពាណិជ្ជកម្មសេរីក្បែររដ្ឋធានី។ ខាងនាយកដ្ឋានគយស្រីលង្កា អះអាងថា កុងទឺន័រទាំងអស់ ដែលបានដឹកចូលប្រទេសខ្លួន គឺខុសច្បាប់។
ការស៊ើបអង្កេតមួយរបស់អាជ្ញាធរស្រីលង្កា ដែលបានធ្វើឡើងកាលពីឆ្នាំមុនលើសំរាមនាំចូលខុសច្បាប់ ៣០០០តោន បានរកឃើញថា អ្នកនាំចូលសំរាម បានបង្វែរទិសដៅដឹកសំរាមពួកគេប្រមាណ ១៨០តោនទៅកាន់ឥណ្ឌា និងឌូបៃ ចន្លោះឆ្នាំ២០១៧ និងឆ្នាំ២០១៨។
ក្រៅពីស្រីលង្កា ប្រទេស ហ្វីលីពីន ឥណ្ឌូណេស៊ី និងម៉ាឡេស៊ី ក៏បានដឹកបញ្ជូនសំរាមខុសច្បាប់រាប់តោនត្រលប់ទៅប្រទេសដើមរបស់ពួកវាផងដែរ៕
© រក្សាសិទ្ធិដោយ thmeythmey.com
