ជាតិ
បុណ្យអុំទូក
សៀមរាប ព្រះសីហនុ និង កំពត ទទួលបានភ្ញៀវទេសចរច្រើនជាងគេ រយៈពេល២ថ្ងៃនៃការឈប់សម្រាក
× របាយការណ៍ពីមន្ទីរទេសចរណ៍រាជធានី-ខេត្ត បានបង្ហាញថា នៅថ្ងៃទី២៩ និងថ្ងៃទី៣០ ខែតុលា ឆ្នាំ២០២០ ខេត្តសៀមរាប ខេត្តព្រះសីហនុ និង ខេត្តកំពត ទទួលបានភ្ញៀវទេសចរជាតិ-អន្តរជាតិច្រើនជាងគេ ក្នុងចំណោមបណ្ដាខេត្តទូទាំងប្រទេស។
ថ្ងៃទី២៩ ខែតុលា ជាថ្ងៃឈប់សម្រាក ក្នុងពិធីរម្លឹកខួប១៦ព្រះវស្សានៃការឡើងគ្រងព្រះបរមសិរីរាជសម្បត្តិរបស់ព្រះបាទ នរោត្តម សីហមុនី ហើយថ្ងៃទី៣០ ខែតុលា ជាថ្ងៃទី១នៃការឈប់សម្រាកក្នុងពិធីអុំទូក អកអំបុក សំពះព្រះខែ បណ្តែងប្រទីប។
បើតាមរបាយការណ៍ ក្នុងរយៈពេល២ថ្ងៃនេះ ខេត្តសៀមរាប ឈរលេខ១ ដែលមានភ្ញៀវទេសចរសរុបជាង៥,៨ម៉ឺននាក់ ហើយខេត្តកំពតឈរលេខ២ ដែលមានភ្ញៀវទេសចរសរុបជាង២ម៉ឺននាក់ ខណៈខេត្តព្រះសីហនុ ស្ថិតនៅលេខ៣ ដែលមានភ្ញៀវទេសចរសរុបជាង១,៨ម៉ឺននាក់។
របាយការណ៍ បានឲ្យដឹងទៀតថា រយៈពេល២ថ្ងៃនេះ ភ្ញៀវទេសចរ ដែលបានដើរកម្សាន្តទូទាំងប្រទេសមានជាង២០ម៉ឺននាក់ ដោយក្នុងនោះ ភ្ញៀវទេសចរបរទេស មានជាង៣,៣ពាន់នាក់។
សូមបញ្ជាក់ថា ក្នុងឆ្នាំនេះ រដ្ឋាភិបាល អនុញ្ញាតឲ្យរៀបចំត្រឹមពិធីអកអំបុក សំពះព្រះខែ បណ្តែតប្រទីបប៉ុណ្ណោះ តែមិនអនុញ្ញាតឲ្យមានការប្រណាំងទូកឡើយ ព្រោះបារម្ភពីការរាលដាលនៃជំងឺកូវីដ-១៩៕
© រក្សាសិទ្ធិដោយ thmeythmey.com