COVID-19
រថយន្ត
អន្តរជាតិ
×![]()
ដោយ: ធីតា
ការពាក់ម៉ាស នៅពេលធ្វើដំណើរតាមរថយន្ត គឺជាលក្ខខណ្ឌតម្រូវរបស់រដ្ឋាភិបាលទុយនីស៊ីក្នុងបរិបទកូវីដ-១៩។ ក្នុងបទអន្តាគមន៍មួយជាមួយបណ្តាញព័ត៌មានជាតិ លោក Khaled Hayouni អ្នកនាំពាក្យក្រសួងមហាផ្ទៃទុយនីស៊ី បានសង្កត់ជាពិសេសចំពោះរថយន្តឯកជន។
រថយន្តឯកជន មានកន្លែងចង្អៀត ហើយអ្នកជិះនៅកៀកគ្នាយ៉ាងខ្លាំង ដោយមិនអាចរក្សាគម្លាតសុវត្ថិភាពបាននោះឡើយ។ លោក Hayouni បានបញ្ជាក់យ៉ាងដូច្នេះទៅកាន់ទូរទស្សន៍ Watania 1 ដើម្បីបង្ហាញពីសារសំខាន់នៃការពាក់ម៉ាសពេលធ្វើដំណើរ។
ទោះបីជាយ៉ាងណាក៏ដោយ អ្នកនាំពាក្យក្រសួងមហាផ្ទៃរូបនេះ បានលើកឡើងថា សម្រាប់ការធ្វើដំណើរតែម្នាក់ឯង ការពាក់ម៉ាសមិនមែនជាលក្ខខណ្ឌកំហិតនោះឡើយ។ លោកបានអះអាងថាយ៉ាងដូច្នេះថា៖ «គោលបំណងរបស់យើង គឺដើម្បីគាំពារសុខភាពសាធារណៈ»។
កាលពីថ្ងៃទី១០ ខែតុលា លោក Hichem Mechichi ដែលជាប្រមុខរដ្ឋាភិបាលទុយនីស៊ី បានតម្រូវឲ្យពលរដ្ឋទាំងអស់ពាក់ម៉ាសនៅទីសាធារណៈ ដោយអ្នកមិនគោរពតាមត្រូវរងពិន័យជាទឹកប្រាក់៦០ឌីណាទុយនីស៊ី (DT) ដែលស្មើជាង២០ដុល្លារអាមេរិក។
គិតមកដល់ពេលនេះ ទុយនីស៊ី មានករណីឆ្លង COVID-19 ជាង៦ម៉ឺនករណី ដែលក្នុងនោះ ស្លាប់ជិត១៤០០នាក់ និងសះស្បើយជាង៥០០០នាក់ ដែលមានន័យថា មនុស្សរាប់ម៉ឺននាក់ទៀតបន្តសម្រាកព្យាបាលនៅមន្ទីរពេទ្យ៕
Tag:
រថយន្ត COVID19
© រក្សាសិទ្ធិដោយ thmeythmey.com
