រដ្ឋសភា អនុម័តយល់ព្រមលើពិធីសារនៃការបោះបង្គោលព្រំដែន ជាមួយវៀតណាម

ជាតិ

ព្រំដែន

សង្គមជាតិ

រដ្ឋសភា អនុម័តយល់ព្រមលើពិធីសារនៃការបោះបង្គោលព្រំដែន ជាមួយវៀតណាម

02, Nov 2020 , 10:59 pm

រូបភាព

លោក វ៉ា គឹមហុង ប្រធានគណៈកម្មាធិការកិច្ចការព្រំដែន ឡើងថ្លែងក្នុងកិច្ចប្រជុំពេញអង្គនៃរដ្ឋសភា នៅព្រឹកថ្ងៃទី២ ខែវិច្ឆិកា ឆ្នាំ២០២០ ពាក់ព័ន្ធនឹងសេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមានិងបោះបង្គោលព្រំដែនរវាងកម្ពុជានិងវៀតណាម។ រូបពីរដ្ឋសភា

ដោយ: សារព័ត៌មានថ្មីៗ

ក្នុងកិច្ចប្រជុំពេញអង្គ នាព្រឹកថ្ងៃទី២ ខែវិច្ឆិកា ឆ្នាំ២០២០ រដ្ឋសភាកម្ពុជា បានអនុម័តសេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។

លោក ឡេង ប៉េងឡុង អគ្គលេខធិការនិងជាអ្នកនាំពាក្យរដ្ឋសភា ប្រាប់សារព័ត៌មានថ្មីៗ តាមទូរស័ព្ទថា សេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងកម្ពុជា និងវៀតណាម គឺជាសេចក្តីព្រាងច្បាប់ ស្តីពីការយល់ព្រម លើការបង្គោលរវាងកម្ពុជានិងវៀតណាមកន្លង។ លោក បន្តថា ពិធីសារនេះ គឺបង្ហាញលម្អិតចំនួន ទីតាំង ពណ៌ និង ទំហំនៃបង្គោលព្រំដែន រួមទាំងនិយាមការផងដែរ។

លោក ពន្យល់ថា ដ្បិតពិធីសារនេះ ត្រូវចុះហត្ថលេខាយល់ព្រមដោយរដ្ឋាភិបាលនៃប្រទេសទាំងពីរក្តី ប៉ុន្តែ ត្រូវឆ្លងកាត់ការបោះឆ្នោតយល់ព្រមពីរដ្ឋសភានិងព្រឹទ្ធសភា ហើយព្រះមហាក្សត្រ ចេញព្រះរាជក្រមប្រកាសឲ្យប្រើប្រាស់សិន ទើបអាចយកមកអនុវត្តបាន។ លោកបញ្ជាក់ថា៖« […] តាមផ្លូវច្បាប់ យើង ត្រូវធ្វើអ៊ីចឹង ទើបចូលជាធរមាន […]»។

បច្ចុប្បន្ន កម្ពុជា-វៀតណាម បានធ្វើខណ្ឌសីមានិងបោះបង្គោលព្រំដែនជាមួយគ្នា បាន៨៤ភាគរយហើយ។ នៅថ្ងៃទី១ ខែសីហា ឆ្នាំ២០២០ គណៈកម្មាធិការកិច្ចការព្រំដែនកម្ពុជានិងវៀតណាម បានចុះហត្ថលេខាលើឯកសារផែនទីថ្មី មានឈ្មោះជាផ្លូវការថា ផែនទីលេខាព្រំដែន ខ្នាត ១/២៥ ០០០ នៅច្រកទ្វារព្រំដែនអន្តរជាតិម៉ុកប៉ៃ ខេត្តតៃនិញ ប្រទេសវៀតណាម។

ផែនទីខ្នាត ១/២៥ ០០០ គឺជាផែនទី ដែលបង្ហាញពីការកំណត់ខណ្ឌសីមានិងការបោះបង្គោលព្រំដែន៨៤ភាគរយនេះឯង។ ផែនទីថ្មីនេះ ត្រូវបានបោះពុម្ពសរុប៥០០ផ្ទាំង ដោយប្រទេសដាណឺម៉ាក។ ២៥០ផ្ទាំង ប្រគល់មកឲ្យកម្ពុជា ហើយ២៥០ផ្ទាំង ប្រគល់ទៅឲ្យវៀតណាម។ ភាគទាំងពីរ ប្តេជ្ញាចិត្តទាំងអស់គ្នា ថានឹងពន្លឿនឲ្យឆាប់ចប់លើការបោះបង្គោលព្រំដែន១៦ភាគរយទៀត ដែលនៅសល់។

អ្នកនាំពាក្យរដ្ឋសភា ថ្លែងថា៖«ពិធីសារហ្នឹង គឺយក [ផែនទី] ខ្នាត ១/២៥ ០០០ ហ្នឹងហើយ»។

អតីតគណបក្សសង្គ្រោះជាតិ បានចេញសេចក្តីថ្លែងការណ៍ពីក្រៅប្រទេសមក ដោយប្រកាសបដិសេធមិនទទួលស្គាល់សេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងកម្ពុជានិងវៀតណាម ដោយអតីតគណបក្សប្រឆាំងដ៏ធំមួយនេះ យល់ថា សេចក្តីព្រាងច្បាប់នេះ គឺខុសច្បាប់ហើយធ្វើឲ្យកម្ពុជា បាត់ដីទៅវៀតណាម។

យ៉ាងណាក៏ដោយ កន្លងមក គណៈកម្មាធិការកិច្ចការព្រំដែន ក៏ដូចជារដ្ឋាភិបាលកម្ពុជា បកស្រាយជាច្រើនដងមកហើយថា ការបោះបង្គោលព្រំដែននិងការធ្វើផែនទីថ្មី មិនធ្វើឲ្យកម្ពុជា បាត់ដីទៅវៀតណាមឡើយ។

ក្នុងពិធីប្រគល់ផែនទីថ្មីខ្នាត ១/២៥ ០០០ ដល់ក្រសួង-ស្ថាប័នពាក់ព័ន្ធចំនួន៣៥ នៅកម្ពុជា ដើម្បីយកទៅប្រើប្រាស់ ដែលរៀបចំឡើងកាលពីថ្ងៃទី២៧ ខែសីហា ឆ្នាំ២០២០ នៅវិមានសន្តិភាព លោក វ៉ា គឹមហុង ប្រធានគណៈកម្មាធិការកិច្ចការព្រំដែន អះអាងថា កម្ពុជា គ្រោងយកផែនទីថ្មីខ្នាត ១/២៥ ០០០ ទៅតម្កល់ទុកនៅអង្គការសហប្រជាជាតិ។ ប៉ុន្តែ លោក ពុំបានបញ្ជាក់ឡើយថា នៅពេលណា។

ផែនទីលេខាព្រំដែនខ្នាត ១/២៥ ០០០ មានទំហំធំជាងផែនទី UTM ខ្នាត ១/៥០ ០០០ និងធំជាងផែនទីបោនខ្នាត ១/១០០ ០០០។

ដើម្បីដឹងពីទំហំតូច-ធំជាងគ្នារវាងផែនទីមួយទៅផែនទីមួយ គឺ គេ មើលទៅលើមាត្រដ្ឋានឬខ្នាតនៃផែនទីទាំងនោះ។ បើមាត្រដ្ឋានឬខ្នាត មានតួលេខកាន់តែតូច គឺផែនទី មានទំហំកាន់តែធំ ហើយផ្ទុយមកវិញ បើមាត្រដ្ឋានឬខ្នាត មានតួលេខកាន់តែធំ គឺផែនទី មានទំហំកាន់តែតូច។ ដូច្នេះ ផែនទីលេខាព្រំដែន ខ្នាត ១/២៥ ០០០ គឺមានទំហំធំជាងផែនទី UTM ខ្នាត ១/៥០ ០០០ ហើយផែនទី UTM ខ្នាត ១/៥០ ០០០ មានទំហំធំជាងផែនទីបោនខ្នាត ១/១០០ ០០០។

១/២៥ ០០០ គឺប្រវែង១សង់ទីម៉ែត្រ លើផែនទី ស្មើនឹង២៥ ០០០ សង់ទីម៉ែត្រ ឬ២៥០ម៉ែត្រ នៅលើដី។ ១/៥០ ០០០ គឺប្រវែង១សង់ទីម៉ែត្រ លើផែនទី ស្មើនឹង៥០ ០០០ សង់ទីម៉ែត្រ ឬ៥០០ម៉ែត្រ នៅលើដី។ ១/១០០ ០០០ គឺប្រវែង១សង់ទីម៉ែត្រ លើផែនទី ស្មើនឹង១០០ ០០០ សង់ទីម៉ែត្រ ឬស្មើនឹង១០០០ម៉ែត្រ ឬស្មើនឹង១គីឡូម៉ែត្រ នៅលើដី៕