ភ្នំពេញ៖ ហុងគ្រី ជាមិត្តដ៏ជិតស្និទ្ធមួយ ដែលយល់ពីស្ថានភាពរបស់កម្ពុជា។ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន ថ្លែងបែបនេះ នៅក្នុងជំនួបលោក ភីធ័រ ហ្សីយាតូ រដ្ឋមន្ត្រីការបរទេស និងពាណិជ្ជកម្មហុងគ្រី នៅថ្ងៃទី៣ វិច្ឆិកា នាទីស្តីការក្រសួង។
មូលហេតុដែលលោក ប្រាក់ សុខុន ហ៊ានអះអាងបែបនេះ ដោយសម្អាងលើជំហររបស់ហុងគ្រី ដែលធ្លាប់ប្រកាសជំទាស់ចំពោះការសម្រេចរបស់គណៈកម្មការអឺរ៉ុប ដែលដកប្រព័ន្ធអនុគ្រោះពន្ធ (EBA)២០ភាគរយ ពីកម្ពុជា។ រដ្ឋមន្ត្រីការបរទេសកម្ពុជា ចាត់ទុកជំហរដ៏ក្លាហានរបស់ហុងគ្រីនេះ សបញ្ជាក់អំពីមិត្តដែលយល់ពីស្ថានភាពរបស់កម្ពុជា ក្នុងការគាំទ្រកម្ពុជាឱ្យទទួលបានយុត្តិធម៌ ដើម្បីឆ្ពោះទៅរកលិទ្ធិប្រជាធិបតេយ្យប្រកបដោយសន្តិភាព និងការអភិវឌ្ឍប្រកបដោយចីរភាព។
ថ្លែងក្នុងសន្និសីទសារព័ត៌មាន ក្រោយជំនួបលោក ភីធ័រ ហ្សីយាតូ រដ្ឋមន្ត្រីការបរទេសហុងគ្រី ដែលធ្វើដំណើរទស្សនកិច្ចនៅកម្ពុជានោះ លោក ប្រាក់ សុខុន បាននិយាយដូច្នេះថា៖«ហុងគ្រីគឺជាមិត្តដ៏ជិតស្និទ្ធមួយរបស់កម្ពុជា។ ហុងគ្រីបានផ្តល់នូវជំនួយ និងការគាំទ្រមកដល់កម្ពុជា នៅពេលដែលប្រទេសយើងកំពុងត្រូវការជំនួយជាចាំបាច់ បន្ទាប់ពីងើបផុតពីភ្លើងសង្គ្រាមនៃរបបខ្មែរក្រហម»។
លោក ភីធ័រ ហ្សីយាតូ មកបំពេញទស្សនកិច្ចនៅកម្ពុជានៅព្រឹកថ្ងៃទី០៣ ខែវិច្ឆិកា ឆ្នាំ២០២០នេះ។ ចុះពីលើយន្តហោះភ្លាម លោកក៏បានធ្វើដំណើរជួបប្រជុំទ្វេភាគីជាមួយលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ។ លោក ភីធ័រ ហ្សីយាតូ ក៏នឹងជួបសម្ដេចនាយករដ្ឋមន្ត្រី ហ៊ុន សែន នៅរសៀលនេះផងដែរ។
ក្រោយជំនួបនេះ ភាគីទាំងពីរ ក៏នឹងចុះហត្ថលេខារួមគ្នាលើកិច្ចព្រមព្រៀងចំនួន៣ រួមមាន៖១ កិច្ចព្រមព្រៀងស្តីពីសេវាដឹកជញ្ជូនតាមផ្លូវអាកាសចរ រវាងរាជរដ្ឋាភិបាលកម្ពុជា និងរដ្ឋាភិបាលហុងគ្រី ,២ អនុស្សរណៈនៃការយោគយល់គ្នាស្តីពីការគ្រប់គ្រងធនធានទឹក រវាងក្រសួងធនធានទឹក និងឧតុនិយមកម្ពុជា និងក្រសួងមហាផ្ទៃហុងគ្រី និងចុងក្រោយ អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យកសិកម្ម រវាងក្រសួងកសិកម្ម រុក្ខាប្រមាញ់ និងនេសាទកម្ពុជា និងក្រសួងកសិកម្មហុងគ្រី។
រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី លោក ភីធើ ស៊ីចាតូ(Péter Szijjártó) មកបំពេញទស្សនកិច្ចផង និងបើកការិយាល័យស្ថានទូតហុងគ្រីជាផ្លូវការនៅកម្ពុជាផង នៅថ្ងៃទី៣វិច្ឆិកា ឆ្នាំ២០២០នេះ។
កម្ពុជា និងហុងគ្រី បានចាប់ផ្ដើមទំនាក់ទំនងការទូតលើកដំបូង តាំងពីឆ្នាំ១៩៥៦មកម្ល៉េះ។ ប៉ុន្តែ២០ឆ្នាំក្រោយទំនាក់ទំនងប្រទេសទាំងពីរ ក៏បានកាត់ផ្ដាច់មួយរយៈ ដោយសារកម្ពុជាស្ថិតនៅក្នុងការគ្រប់គ្រងដោយរបបខ្មែរក្រហម នាឆ្នាំ១៩៧៥។ កម្ពុជា និងហុងគ្រី ក៏បានចាប់ផ្ដើមទំនាក់ទំនងការទូតឡើងវិញនៅឆ្នាំ១៩៧៩ ក្រោយពីដួលរំលំរបប ប៉ុល ពត ។
កន្លងមកសម្តេចនាយករដ្ឋមន្ត្រី ហ៊ុន សែន ក៏ធ្លាប់ធ្វើដំណើរទស្សនកិច្ច២ដងមកហើយ នៅហុងគ្រី មុននឹងលោក Janos Ader ប្រធានាធិបតីហុងគ្រី មកកាន់រាជធានីភ្នំពេញកាលពីឆ្នាំ២០១៩ ៕