អន្តរជាតិ
លោក បៃឌិន៖ យើងនឹងឈ្នះការប្រកួតនេះ បេក្ខជនប្រធានាធិបតីអាមេរិក ចូ បៃឌិន ថ្លែងសារពីរដ្ឋ Delaware ។
× ការរាប់សន្លឹកឆ្នោតនៅរដ្ឋសំខាន់ៗចំនួន៤ កំពុងធ្វើឡើងនៅឡើយ បីថ្ងៃក្រោយការបោះឆ្នោតថ្ងៃទី៣ ខែវិច្ឆិកា។ បេក្ខជនប្រធានាធិបតីបក្សប្រជាធិបតេយ្យ លោក ចូ បៃឌិន មានទំនុកចិត្តថា លោកនឹងឈ្នះការបោះឆ្នោតនេះ នៅពេលដែលលោក ដូណាល់ ត្រាំ ត្រៀមប្ដឹងទៅកាន់តុលាការកំពូលនោះ។ ជាមួយនឹងក្ដីសង្ឃឹមកាន់តែខិតមកដល់ លោក បៃឌិន បានអំពាវនាវឲ្យពលរដ្ឋអាមេរិករួបរួមគ្នា។
លោក ចូ បៃឌិន បានថ្លែងសុន្ទរកថាមួយនៅយប់ថ្ងៃទី៦ ខែវិច្ឆិកា (ម៉ោងអាមេរិក) ពីរដ្ឋកំណើត Delaware ខណៈលោកកំពុងនាំមុខប្រធានាធិបតី ដូណាល់ ត្រាំ ក្នុងការបោះឆ្នោតជ្រើសរើសប្រធានាធិបតីអាមេរិក។ លោក បៃឌិន ដែលជាអនុប្រធានាធិបតីរបស់លោក បារ៉ាក់ អូបាម៉ា មានសុទិដ្ឋនិយមច្រើនក្នុងការទទួលបានជោគជ័យ។
ការរាប់សន្លឹកឆ្នោតកំពុងធ្វើឡើងនៅរដ្ឋសំខាន់ៗចុងក្រោយដូចជា Pennsylvania, Georgia, Nevada និង North Carolina ជាដើម ហើយលទ្ធផលដែលផ្សាយដោយទីភ្នាក់ងារព័ត៌មាន AFP បង្ហាញថា លោក បៃឌិន នាំមុខលោក ត្រាំ ។ បេក្ខជនមកពីបក្សប្រជាធិបតេយ្យដែលមានចំនួនប្រតិភូ២៦៤នាក់ក្នុងដៃស្រាប់នោះ ត្រូវការជ័យជម្នះណាមួយក៏បានក្នុងចំណោមរដ្ឋទាំងបួនខាងលើ ព្រោះបេក្ខជនពីរត្រូវបានចំនួនប្រតិភូ២៧០ ប៉ុណ្ណោះ ដើម្បីឈ្នះ។
ចំពោះមុខអ្នកសារព័ត៌មានជាច្រើន លោក បៃឌិន នៅតែជឿថា លោកនឹងឈ្នះដោយសំឡេងភាគច្រើន ប៉ុន្តែលោកក៏នៅមិនទាន់ប្រកាសជោគជ័យដដែល ដោយរង់ចាំលទ្ធផលផ្លូវការសិន។ លើសពីនោះ លោកករ៏រំពឹងថា អាចឈ្នះចំនួនប្រតិភូលើស៣០០នាក់ផងដែរ។
«តួលេខប្រាប់យើងច្បាស់និងគួរឲ្យជឿ គឺយើងនឹងឈ្នះការប្រកួតនេះ។» លោក បៃឌិន បញ្ជាក់បែបនេះ ហើយបន្ថែមថា លោកឈ្នះលោក ត្រាំ ច្រើនជាងបួនលានសំឡេង ហើយគម្លាតក៏កាន់តែរីកធំជាលំដាប់ដែរ។
ការរាប់សន្លឹកឆ្នោត បានក្លាយជាប្រធានបទក្ដៅក្រោយការបោះឆ្នោត ដោយលោក ត្រាំ ចង់ឲ្យបញ្ឈប់ការរាប់សន្លឹកឆ្នោតដែលមកដល់ក្រោយថ្ងៃបោះឆ្នោត។ សន្លឹកឆ្នោតទាំងនោះ ជាសន្លឹកឆ្នោតដែលបោះមុនថ្ងៃទី៣ វិច្ឆិកា និងសន្លឹកឆ្នោតបោះតាមប្រៃសណីយ៍ ហើយដែលគេជឿថា ជាសន្លឹកឆ្នោតគាំទ្រលោក បៃឌិន ។ បណ្ដឹងរបស់បក្សសាធារណរដ្ឋដែលស្នើឲ្យបញ្ឈប់ភ្លាមៗការរាប់សន្លឹកឆ្នោតនៅរដ្ឋ Pennsylvania ត្រូវបានតុលាការកំពូលទាត់ចោល៕
Tag:
ចូ បៃឌិន
បោះឆ្នោតអាមេរិក
© រក្សាសិទ្ធិដោយ thmeythmey.com