អន្តរជាតិ
ប្រធានាធិបតីឥណ្ឌូណេស៊ី និងនាយករដ្ឋមន្ត្រីម៉ាឡេស៊ី អបអរជ័យជម្នះលោក បៃឌិន ប្រធានាធិបតីឥណ្ឌូណេស៊ី ចូកូ វីដូដូ ចាប់ដៃលោក ចូ បៃឌិន កាលនៅជាអនុប្រធានាធិបតីអាមេរិក។ រូបភាព AFP
× មេដឹកនាំឥណ្ឌូណេស៊ី និងម៉ាឡេស៊ី នៅថ្ងៃទី៨ ខែវិច្ឆិកា បានអបរអរលោក ចូ បៃឌិន ដែលទទួលជោគជ័យក្នុងការបោះឆ្នោតប្រធានាធិបតីអាមេរិក។ លោក បៃឌិន ផ្ដួលប្រធានាធិបតីបច្ចុប្បន្ន ដូណាល់ ត្រាំ ទោះការរាប់សន្លឹកឆ្នោតមិនទាន់ចប់ក្ដី។ មេដឹកនាំប្រទេសអាស៊ានទាំងពីរ ទន្ទឹងធ្វើការជាមួយមេដឹកនាំថ្មីរបស់អាមេរិក។
«ការអបអរដ៏កក់ក្ដៅបំផុតរបស់ខ្ញុំចំពោះលោក ចូ បៃឌិន និងលោកស្រី កាម៉ាឡា ហារីស សម្រាប់ជ័យជម្នះជាប្រវតិ្តសាស្ត្រ។ ចំនួនអ្នកទៅបោះឆ្នោតដ៏ច្រើន បង្ហាញពីក្ដីសង្ឃឹមលើប្រជាធិបតេយ្យ។» នេះជាសំណេររបស់លោក ចូកូ វីដូដូ ប្រធានាធិបតីឥណ្ឌូណេស៊ីលើបណ្ដាញសង្គម Twitter ប៉ុន្មានម៉ោងក្រោយលោក បៃឌិន ត្រូវបានប្រកាសថា បានទទួលចំនួនប្រតិភូគ្រប់គ្រាន់ដើម្បីក្លាយជាប្រធានាធិបតីទី៤៦របស់អាមេរិក។
មេដឹកនាំឥណ្ឌូណេស៊ីរូបនេះ បញ្ជាក់ថា លោកនឹងធ្វើការឲ្យជិតស្និទ្ធដើម្បីពង្រឹងទំនាក់ទំនងយុទ្ធសាស្ត្រឥណ្ឌូណេស៊ី-អាមេរិក ហើយជំរុញកិច្ចសហប្រតិបត្តិការទ្វេភាគីលើផ្នែកសេដ្ឋកិច្ច ប្រជាធិតេយ្យ ពហុភាគីនិយមសម្រាប់ផលប្រយោជន៍ប្រជាជនប្រទេសទាំងពីរ។
នាយករដ្ឋមន្ត្រីម៉ាឡេស៊ី មូហ៊ីឌីន យ៉ាស៊ីន ក៏បានអបអរសាទរលោក បៃឌិន បេក្ខជនប្រធានាធិបតីបក្សប្រជាធិបតេយ្យដែរ។ បើតាមទូរទស្សន៍សិង្ហបុរី CNA លោក យ៉ាស៊ីន លើកឡើងថា ម៉ាឡេស៊ី បានតាមដានដំណើរការបោះឆ្នោតនៅអាមេរិកយ៉ាងដិតដល់ ដែលក្នុងនោះប្រជាជនអាមេរិកបានបោះឆ្នោតគាំទ្រលោក បៃឌិន ឲ្យធ្វើជាប្រធានាធិបតីដោយពួកគេមើលឃើញការដឹកនាំ និងទស្សនវិស័យរបស់លោក បៃឌិន ផ្ទាល់។
«ក្នុងនាមជាប្រទេសកំពុងអភិវឌ្ឍដ៏លឿន ម៉ាឡេស៊ីផ្ដល់សារសំខាន់ខ្ពង់ខ្ពស់លើទំនាក់ទំនងជាមួយអាមេរិក។» លោក យ៉ាស៊ីន បញ្ជាក់បែបនេះ ជាមួយនឹងក្ដីរំពឹងក្នុងការជំរុញទំនាក់ទំនងប្រទេសទាំងពីរ។
មេដឹកនាំបក្សប្រឆាំងម៉ាឡេស៊ី អាន់វ៉ា អ៊ីប្រាហ៊ីម ក៏ចេញសារអបអរលោក បៃឌិន ដែរ។ បើតាមលោក អាន់វ៉ា ជ័យជម្នះលោក បៃឌិន បង្ហាញថា ពលរដ្ឋអាមេរិកជ្រើសរើសការរួបរួមជាជាងការរើសអើង និងរដ្ឋាភិបាលដែលមានការប្ដេជ្ញាចិត្តចំពោះសិទ្ធិមនុស្ស ការការពារសិទ្ធិមនុស្ស និងបរិស្ថាន៕
Tag:
ឥណ្ឌូណេស៊ី
ម៉ាឡេស៊ី
បោះឆ្នោតអាមេរិក
© រក្សាសិទ្ធិដោយ thmeythmey.com