ជាតិ
ពីនេះ ពីនោះ
រូបត្លុក
បើលោក ត្រាំ ចាញ់ឆ្នោត លែងមាន Fake News?
× សុធីរ និងសំណាង លែងបានជួបគ្នាអស់រយៈពេលប្រហែលជា២ខែមកហើយ។ មិនបានជួបគ្នា មិនមែនដោយសារ ក្លើទាំងពីរគ្នារវល់តាមដានការបោះឆ្នោតនៅសហរដ្ឋអាមេរិកនោះទេ តាមពិត ពួកគេរវល់នឹងរកលុយចិញ្ចឹមក្រពះដូចគេដូចឯងដែរហ្នឹង។ បើវិភាគរហូត ហើយអត់ទៅរកលុយមកចាយខ្លះ តើបានប្រាក់មកណាដើម្បីចិញ្ចឹមគ្រួសារ និងខ្លួនឯង។ លុយក៏រក វិភាគក៏វិភាគខ្លះដែរទៅដើម្បីលម្ហែខួរក្បាល។ នៅព្រឹកថ្ងៃចន្ទទី៩ខែវិច្ឆិកាឆ្នាំ២០២០នេះ ពោល គឺក្រោយការបោះឆ្នោតជ្រើសរើសប្រធានធិបតីសហរដ្ឋអាមេរិកជិតមួយសប្តាហ៍មក សុធីរ និងសំណាង ជជែកគ្នាជុំវិញរឿងហ្នឹងបន្តិចដើម្បីកំដរការក្រេបកាហ្វេឲ្យវាមានន័យបន្ថែមទៀត។
សុធីរ៖ តើលទ្ធផលចុងក្រោយនៅអាមេរិកវាទៅជាយ៉ាងម៉េចហើយ អា សំណាង?
សំណាង៖ មិនទាន់ដាច់ស្រេចនៅឡើយទេ។ តែលោក បៃឌិន បានប្រកាសខ្លួនឯងជាប្រធានាធិបតីជាប់ឆ្នោតទៅហើយ ក្រោយពីលោកទទួលបានការគាំទ្រដោយអង្គបោះឆ្នោតជាង២៧០សំឡេង ជាចំនួនសំឡេងកំណត់ការឈ្នះតំណែងប្រធានាធិបតីនៅសហរដ្ឋអាមេរិក។
សុធីរ៖ ចុះលោកប្រធានាធិបតី ត្រាំ មានបានថ្លែងសារស្តីពីការចុះចាញ់ហើយឬនៅ?
សំណាង៖ មិនទាន់មានទេ។ ផ្ទុយទៅវិញលោក ត្រាំ កំពុងឲ្យក្រុមអ្នកច្បាប់របស់លោកប្តឹងជំទាស់ទៅនឹងលទ្ធផលបោះឆ្នោតដែលលោកគិតថា វាមិនប្រក្រតី។ អ៊ីចឹង លទ្ធផលផ្លូវការ អាចនៅអូសបន្លាយយូរបន្តិចដែរមើលទៅ!
សុធីរ៖ បើលោក ត្រាំ មិនទាន់ប្រកាសចុះចាញ់ផង ហេតុអ្វីបានជាសារព័ត៌មានធំៗនៅលើពិភពលោកប្រកាសពីជ័យជម្នះរបស់លោក បៃឌិន? និងម្យ៉ាងទៀត ហេតុអ្វីបានជាមេដឹកនាំធំៗលើពិភពលោកមួយចំនួនផ្ញើសារអបអរសាទរលោក បៃឌិន?
សំណាង៖ នេះហើយ គឺជាសម្ពាធដែលកំពុងទម្លាក់មកលើលោក ត្រាំ ដោយផ្ទាល់ផង និងដោយប្រយោលផង។ បើតាមការសង្កេត លោក ត្រាំ គ្មានជម្រើសណាក្រៅពីទទួលការបរាជ័យឡើយ។
សុធីរ៖ អា សំណាង! អញនៅចាំបានថា ពាក្យថា ព័ត៌មានក្លែងក្លាយ (Fake News) ត្រូវបានបង្កើតឡើងដោយលោកប្រធានាធិបតី ត្រាំ ដែលកាលលោកជាប់ឆ្នោតភ្លាម(២០១៦) លោកច្រើននិយាយថា ព័ត៌មាននេះ ឬនោះ គឺជាព័ត៌មានក្លែងក្លាយ (Fake News) បើទោះបីព័ត៌មាននោះ ពេលខ្លះ ពិតក្នុងកម្រិតណាមួយក៏ដោយចុះ។ ចុះបើលោក ត្រាំ ចាញ់ឆ្នោតនៅពេលនេះ(២០២០) តើពាក្យ Fake News បាត់ទៅវិញដែរឬទេ?
សំណាង៖ ពាក្យនេះ វាបានកើតឡើងរួចទៅហើយ។ ដូច្នេះ វាមិនអាចបាត់ទៅវិញឡើយ បើទោះបីអ្នកបង្កើតពាក្យនេះ បាត់បង់តំណែងទៅវិញក៏ដោយ។ តែទោះជាយ៉ាងណា ពិភពលោកទាំងមូលគួររួមគ្នាកាត់បន្ថយ ឬលុបបំបាត់ព័ត៌មានក្លែងក្លាយឲ្យខាងតែបាន។ រឿងមួយទៀតដែលអញចង់ប្រាប់ឯងដែរនោះ គឺថា ការបោះឆ្នោតកាលពីឆ្នាំ២០១៦ដែលលោក ត្រាំ មកពីគណបក្សសាធារណរដ្ឋឈ្នះឆ្នោតលើលោកស្រី ហ៊ីឡារី ក្លីនតុន ក៏ព្រោះតែមួយផ្នែកដោយសាររូបភាពលោក ត្រាំ គឺជាមហាសេដ្ឋី(អ្នកជំនួញ)មានលុយច្រើនពាន់លានដុល្លារ។ អ្នកបោះឆ្នោតកាលនោះនាំគ្នាគិតមួយផ្នែកថា លោក ត្រាំ ពិតជាអាចដោះស្រាយរឿងស្មុគស្មាញរបស់សហរដ្ឋអាមេរិកបាន ជាពិសេស រឿងសេដ្ឋកិច្ច។ តែលទ្ធផលបោះឆ្នោតឆ្នាំ២០២០នេះ បង្ហាញថា រូបភាពទ្រព្យសម្បតិ្តរបស់លោក ត្រាំ មិនមែនជាកត្តាកំណត់វាសនាសន្លឹកឆ្នោតបានឡើយ៕
© រក្សាសិទ្ធិដោយ thmeythmey.com