ជាតិ
សេដ្ឋកិច្ច
កម្ពុជា នឹងយកពន្ធលើសេវាឌីជីថល ក្រុមហ៊ុនAmazon, Alibaba, Facebook, Google ដែលមិនចុះបញ្ជី
លោកជា វ៉ាន់ដេត រដ្ឋមន្ត្រីក្រសួងប្រៃសណីយ៍(រូបទី៥រាប់ពីឆ្វេង) កំពុងឈរជាមួយលោក គង់ វិបុល អគ្គនាយកនៃអគ្គនាយកដ្ឋានពន្ធដារនិងសហការី ក្នុងដំណើរទស្សនៈកិច្ចស្វែងយល់អំពី«សមិទ្ធផលនៃកំណែទម្រង់វិស័យពន្ធដារ»កាលពីថ្ងៃទី៤វិច្ឆិកា។ រូបថត៖ ក្រសួងប្រៃសណីយ៍
×![]()
ភ្នំពេញ៖ អគ្គនាយកដ្ឋានពន្ធដារ សហការជាមួយក្រសួងប្រៃសណីយ៍និងទូរគមនាគមន៍ ដើម្បីបង្កើនការប្រមូលពន្ធលើសេវាឌីជីថល(Digital)របស់ក្រុមហ៊ុនបច្ចេកវិទ្យាបរទេសមិនចុះបញ្ជីនៅកម្ពុជា។ លោកជា វ៉ាន់ដេត រដ្ឋមន្ត្រីក្រសួងប្រៃសណីយ៍ បានរៀបរាប់ថា ក្រុមហ៊ុនបរទេសដែលលក់សេវាកម្មឌីជីថលនៅទីផ្សារកម្ពុជាដោយគ្មានការចុះបញ្ជីនោះ រួមមាន ក្រុមហ៊ុនNetflix, Amazon, Alibaba, Facebook និង Google ជាដើម។ នេះបើតាមការចុះផ្សាយរបស់ក្រសួងប្រៃសណីយ៍និងទូរគមនាគមន៍។ 
លោក ជា វ៉ាន់ដេត បានអះអាងចំពោះលោក គង់ វិបុល អគ្គនាយកនៃអគ្គនាយកដ្ឋានពន្ធដារ ក្នុងដំណើរទស្សនៈកិច្ចស្វែងយល់អំពី«សមិទ្ធផលនៃកំណែទម្រង់វិស័យពន្ធដារ» នៅអគ្គនាយកដ្ឋានពន្ធដារកាលពីថ្ងៃទី៤វិច្ឆិកា ឆ្នាំ២០២០ ថា ក្រសួងប្រៃសណីយ៍ នឹងបន្តសហការជាមួយអគ្គនាយកដ្ឋានពន្ធដារ ឱ្យបានកាន់តែជិតស្និទ្ធ ដើម្បីបង្កើនប្រាក់ចំណូលពន្ធជូនរដ្ឋ។ ជាពិសេសគឺផ្តោតការប្រមូលពន្ធលើក្រុមហ៊ុនផ្តល់សេវាឌីជីថល និងប្រតិបត្តិករទូរគមនាគមន៍ ដែលរកចំណូលបានពីអ្នកប្រើប្រាស់នៅកម្ពុជា។
លើសពីនេះទៅទៀត រដ្ឋមន្ត្រីក្រសួងប្រៃសណីយ៍និងទូរគមនាគមន៍រូបនេះ ក៏ផ្តោតការយកចិត្តទុកដាក់លើការការពារហេដ្ឋារចនាសម្ព័ន្ធព័ត៌មានពីការគំរាមកំហែងនានា ដើម្បីធានាលំហអ៊ីនធឺណែត(Internet) ឱ្យមានសុវត្ថិភាព និងសន្តិសុខ ព្រមទាំងផ្តល់ការគាំទ្រផ្នែកសន្តិសុខបច្ចេកវិទ្យាព័ត៌មានបន្ថែម ដល់អគ្គនាយកដ្ឋានពន្ធដារ ផងដែរ។
អគ្គនាយកដ្ឋានពន្ធដារ លោក គង់ វិបុល គាំទ្រចំពោះការសហការប្រតិបត្តិការមួយនេះ ដើម្បីបង្កើតចំណូលជូនជាតិ។ លោកគង់ វិបុល ក៏បានគាំទ្រគំនិតផ្តួចផ្តើមរបស់ក្រសួងប្រៃសណីយ៍ក្នុងការរៀបចំឱ្យមានបណ្តុំទិន្នន័យ(Big Data) ដោយធ្វើសមាហរណកម្មទិន្នន័យថ្នាក់ជាតិគ្រប់វិស័យបញ្ចូលគ្នា និងចែករំលែកទិន្នន័យជាមួយក្រសួងស្ថាប័នពាក់ព័ន្ធ។
សារព័ត៌មានថ្មីៗ មិនអាចទាក់ទងលោក គង់ វិបុល អគ្គនាយកដ្ឋានពន្ធដារ ដើម្បីសុំអត្ថាធិប្បាយបន្ថែមលើការយកពន្ធនេះទេ។
សូមជម្រាបថា ក្នុងរយៈពេល៩ខែដើមឆ្នាំ២០២០ ដែលកម្ពុជាស្ថិតនៅក្នុងវិបត្តិកូវីដ-១៩នេះ អគ្គនាយកដ្ឋានពន្ធដារប្រមូលពន្ធ-អាករ បានជិត២,២២៦លានដុល្លារអាមេរិក ស្មើជាង៧៨ភាគរយនៃផែនការប្រចាំឆ្នាំ។ ចំណូលនេះ កើនជិត៤ភាគរយ បើប្រៀបធៀបរយៈពេលដូចគ្នាកាលពីឆ្នាំ២០១៩។ ប៉ុន្តែមានការធា្លក់នៅក្នុងខែកញ្ញាចំនួន១៨.៧៥ភាគរយ ដោយអគ្គនាយកពន្ធដារប្រមូលពន្ធអាករគ្រប់ប្រភេទចូលជាតិ បានត្រឹម២៧៤.២០ពាន់លានរៀល (ប្រមាណ១៨៦.២២លានដុល្លារ) ប៉ុណ្ណោះ៕
Tag:
ពន្ធដារ
© រក្សាសិទ្ធិដោយ thmeythmey.com
