អន្តរជាតិ
នយោបាយអន្តរជាតិ
បក្សប្រជាធិបតេយ្យធ្លាក់ចុះសំឡេងនៅសភាតំណាង ឯបក្សសាធារណរដ្ឋទំនងបន្តកាន់កាប់ព្រឹទ្ធសភា
អាគារសភាអាមេរិក។ រូបភាព៖ AFP
×![]()
លទ្ធផលបោះឆ្នោតបណ្តោះអាសន្ននៃសភាទាំង២ថ្នាក់របស់អាមេរិក បង្ហាញថា បក្សប្រជាធិបតេយ្យទទួលបានសំឡេងភាគច្រើនដាច់ខាតក្នុងការគ្រប់គ្រងសភាតំណាង ខណៈបក្សសាធារណរដ្ឋទំនងជាបន្តកាន់កាប់ព្រឹទ្ធសភា។ ការបោះឆ្នោតព្រឹទ្ធសភាអាមេរិក មិនទាន់បញ្ចប់នៅឡើយទេ ដ្បិតអីអាសនៈព្រឹទ្ធសភាចំនួន២ នៅរដ្ឋ Georgia នឹងត្រូវប្រកួតប្រជែងជុំទី២នៅថ្ងៃទី៥ មករា ២០២១។
បើទោះបីជាការលទ្ធផលផ្លូវការនៃការបោះឆ្នោតសភាតំណាងពុំទាន់ប្រកាសជាផ្លូវការក្តី បក្សប្រជាធិបតេយ្យទទួលបានអាសនៈ២១៨ ដែលជាចំនួនអាសនៈចាំបាច់ក្នុងការគ្រប់គ្រងសភាតំណាងអាមេរិក។ នេះបើតាមលទ្ធផលបណ្ដោះអាសន្ន ដែលរាយការណ៍ដោយប្រព័ន្ធផ្សព្វផ្សាយអាមេរិក។ ចំណែកឯបក្សប្រជាធិបតេយ្យទទួលបានអាសនៈចំនួន២០២។
គិតត្រឹមតួលេខបច្ចុប្បន្ន បក្សប្រជាធិបតយ្យបាត់បង់អាសនៈចំនួន៥ ខណៈបក្សសាធារណៈរដ្ឋទទួលបានអាសនៈបន្ថែមចំនួន៦។ យ៉ាងណាក្តីមានអាសនៈចំនួន១៥ផ្សេងទៀតដែលមិនទាន់ប្រកាសលទ្ធផលដោយសារតែពុំទាន់បានរាប់សន្លឹកឆ្នោតចប់សព្វគ្រប់។ សភាតំណាងអាមេរិក មានតំណាងរាស្ត្រចំនួន៤៣៥រូប និងមានអាណត្តិ២ឆ្នាំ។
ចំណែកលទ្ធផលព្រឹទ្ធសភាវិញបង្ហាញថា បក្សសាធារណរដ្ឋកំពុងនាំមុខដោយទទួលបានអាសនៈចំនួន៥០ ខណៈបក្សប្រជាធិបតេយ្យទទួលបាន៤៨អាសនៈ។ ដើម្បីអាចគ្រប់គ្រងព្រឹទ្ធសភាបាន បក្សនីមួយៗត្រូវកាន់កា់បអាសនៈយ៉ាងហោចណាស់៥១។
អាសនៈ២ទៀតនៅរដ្ឋGeorgia ពុំទាន់ប្រកាសលទ្ធផលដោយសារច្បាប់បោះឆ្នោតក្នុងរដ្ឋនេះតម្រូវឲ្យបេក្ខជនទទួលបានសម្លេងលើសពី៥០ភាគរយ។ ដោយពុំមានបេក្ខជនណាទទួលបានសំឡេងគ្រប់គ្រាន់ ការបោះឆ្នោតមួយជុំទៀតនឹងត្រូវធ្វើឡើងនៅថ្ងៃទី៥ មករា ឆ្នាំ២០២១។ ផ្ទុយពីសភាតំណាង ព្រឹទ្ធសភាអាមេរិក បោះឆ្នោតរើសសមាជិកថ្មីចំនួនតែ១ភាគ៣នៃសមាជិកសរុបដែលមាន ចំនួន១០០រូប ប៉ុណ្ណោះ ហើយសមាជិកនីមួយៗមានអាណត្តិ៦ឆ្នាំ។
នៅអាមេរិក ការអនុម័តច្បាប់ត្រូវការការយល់ព្រមពីសភាតំណាង និងព្រឹទ្ធសភា។ ប៉ុន្តែព្រឹទ្ធសភាអាមេរិក មានអំណាចច្រើនជាងដោយសារតែមានសិទ្ធិក្នុងការបោះឆ្នោតផ្តល់សេចក្តីទុកចិត្តទៅលើបេក្ខភាពចៅក្រម ឧត្តមសេនីយ៍ រដ្ឋមន្ត្រី និងមន្ត្រីរដ្ឋាភិបាលសហព័ន្ធជាន់ខ្ពស់ ដែលស្នើដោយប្រធានាធិបតី។ បើបក្សប្រជាធិបតេយ្យ មិនមានសំឡេងភាគច្រើនក្នុងព្រឹទ្ធសភាទេ នោះរដ្ឋបាលរបស់ប្រធានាធិបតីជាប់ឆ្នោត ចូ បៃឌិន នឹងជួបបញ្ហា និងពិបាកក្នុងការអនុម័តច្បាប់ និងតែងតាំងមន្ត្រីសំខាន់ៗណាស់៕
Tag:
បោះឆ្នោតអាមេរិក
© រក្សាសិទ្ធិដោយ thmeythmey.com
