វគ្គជម្រុះ AFC U-19 ជុំចុងក្រោយ ប្រព្រឹត្តទៅនៅខែមីនា ឆ្នាំ២០២១

កីឡាជាតិ

ជាតិ

វគ្គជម្រុះ AFC U-19 ជុំចុងក្រោយ ប្រព្រឹត្តទៅនៅខែមីនា ឆ្នាំ២០២១

17, Nov 2020 , 7:59 am

រូបភាព

ក្រុមកីឡាករ U19 កម្ពុជា, រូបភាពពី AFC

ដោយ:

សហព័ន្ធកីឡាបាល់ទាត់ទ្វីបអាស៊ី(AFC)បានបង្ហាញកាលបរិច្ឆេទថ្មី នៃការប្រកួតវគ្គជម្រុះជុំចុងក្រោយ នៃព្រឹត្តិការណ៍ AFC U-19 Championship 2020 ដែលបានលើកពេលប្រកួតដោយសារការរាតត្បាតនៃជំងឺកូវីដ-១៩។ បើតាម AFC ការប្រកួតនឹងព្រឹត្តទៅនៅអំឡុងខែមីនា ឆ្នាំ២០២១ ខាងមុខនេះ។

ការរាតត្បាតជាសកលនៃជំងឺកូវីដ-១៩ បានបង្ខំឲ្យសហព័ន្ធកីឡាបាល់ទាត់ទ្វីបអាស៊ី សម្រេចពន្យាពេលការប្រកួតវគ្គ១៦ក្រុមចុងក្រោយនៃព្រឹត្តិការណ៍ AFC U-19 Championship 2020 កាលពីថ្ងៃទី១៥ ខែកញ្ញា ឆ្នាំ២០២០។ តាមគម្រោងការប្រកួតវគ្គជម្រុះជុំចុងក្រោយនេះ គ្រោងធ្វើឡើងចាប់ពីថ្ងៃទី១៤-៣១ ខែតុលា ឆ្នាំ២០២០។

ជាមួយគ្នានេះ កាលពីថ្ងៃទី១០ ខែវិច្ឆិកា ឆ្នាំ២០២០ AFC បានរៀបចំកិច្ចប្រជុំតាមវីដេអូ Zoom ជាមួយសមាជិកប្រតិបត្តិ និងតំណាងប្រទេសសំខាន់ៗមួយចំនួនក្នុងតំបន់អាស៊ី ដើម្បីពិភាក្សាគ្នាក្នុងការកំណត់កាលបរិច្ឆេទប្រកួត។ ជាលទ្ធផល AFC បានសម្រេចឲ្យការប្រកួត AFC U-19 Championship ប្រព្រឹត្តទៅចាប់ពីថ្ងៃទី៣-២០ ខែមីនា ឆ្នាំ២០២១។ តែកាលបរិច្ឆទនេះមានការប្រែប្រួល បើសិនការរាតត្បាតនៃជំងឺកូវីដ-១៩ នៅក្នុងតំបន់អាស៊ីនៅតែបន្តកើនឡើង។

លឹម ពិសុទ្ធ នៃក្រុម U19 កម្ពុជា ប្រជែងដណ្តើមបាល់ជាមួយកីឡាករព្រុយណេ។ រូបថត FFC

សម្រាប់ការប្រកួតនេះ ក្រុមកីឡាបាល់ទាត់ជម្រើសជាតិកម្ពុជាអាយុក្រោម១៩ឆ្នាំកម្ពុជា ស្ថិតនៅពូល A ជាមួយម្ចាស់ផ្ទះអ៊ូសបេគីស្ថាន ឥណ្ឌូណេស៊ី និងអ៊ីរ៉ង់។ កម្ពុជាបានឡើងមកលេងវគ្គ១/៨នៃព្រឹត្តិការណ៍ AFC U-19 Championship ជាប្រវត្តិសាស្ត្រក្នុងនាមក្រុមលេខ២ល្អតំណាងឲ្យពូល G។

នាការប្រកួតវគ្គជម្រុះពូល G ដែលកម្ពុជាធ្វើជាម្ចាស់ផ្ទះ ក្រុម U-19 កម្ពុជាបានយកឈ្នះថៃ ២-១ ឆ្នាំកោះម៉ារីណាខាងជើង ៩-០ ឈ្នះព្រុយណេ ៣-០ តែចាញ់ម៉ាឡេស៊ី ៥-៤៕