ជាតិ
សេដ្ឋកិច្ច
NagaCorp បោះទុន៣៥០លានដុល្លារ បង្កើតរមណីយដ្ឋានលើដីជាង៧០ហិកតានៅសៀមរាប
×![]()
ភ្នំពេញ៖ ក្រុមហ៊ុនណាហ្គា(NAGA CORP) ដែលមានទីស្នាក់ការកណ្តាលនៅហុងកុង បានបោះទុនវិនិយោគចំនួន៣៥០លានដុល្លារលើការសាងសង់រមណីយដ្ឋាន «Angkor Lake of Wonder» (ALOW) លើផ្ទៃដី៧៥ហិកតា ដែលមានចម្ងាយ៥០០ម៉ែត្រពីឧទ្យានអង្គរ ខេត្តសៀមរាប។ ឧទ្យានអង្គរ មានទំហំ៤០១គីឡូម៉ែត្រការ៉េ។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុនណាហ្គា កាលពីថ្ងៃទី១៥វិច្ឆិកា ឆ្នាំ២០២០ ដោយអះអាងថា គម្រោងវិនិយោគដ៏ធំមួយនេះ គឺមិនមែនការបង្កើតកន្លែងលេងល្បែងស៊ីសងប្រភេទណាមួយឡើយ។ 
ក្នុងសេចក្តីប្រកាសព័ត៌មានបានរៀបរាប់ថា គម្រោងអភិវឌ្ឍថ្មីរបស់ក្រុមហ៊ុនណាហ្គាខប នៅក្នុងខេត្តសៀមរាបតម្លៃជាង៣០០លានដុល្លារនេះ នឹងសាងសង់សណ្ឋាគារមួយដែលមានរចនាប័ទ្មបែបវប្បធម៌ និងប្រពៃណីខ្មែរ នៅចំកណ្តាលគម្រោង។ លើសពីនេះ នឹងមានបង្កើតឧទ្យានទឹក, បង្កើត Siem Reap China Town, បង្កើតឧទ្យានប្រវត្តិសាស្ត្រ និងវប្បធម៌ខ្មែរបែប4D, 5D, Augmented Reality (AR) និង Virtual Reality (VR) រួមទាំងបង្កើតសួនវប្បធម៌ជាដើម...។ គម្រោងវិនិយោគដ៏ធំមួយនេះ នឹងបញ្ចប់ការសាងសង់ទាំងស្រុងនៅក្នុង២០២៥។
រដ្ឋាភិបាលកម្ពុជា សម្រេចជួលដីទំហំ៧៥ហិកតា ដែលមានទីតាំងស្ថិតនៅភាគខាងត្បូងចម្ងាយ៥០០ម៉ែត្រពីឧទ្យានអង្គរនេះ ទៅឱ្យក្រុមហ៊ុនណាហ្គា ចំនួន៥០ឆ្នាំ។ ពោលគឺចាប់ ពីខែមករា ឆ្នាំ២០២០ ដល់ឆ្នាំ២០៧០។ នេះបើការលើកឡើងរបស់ក្រុមហ៊ុនណាហ្កា ដោយអះអាងថា គម្រោងអភិវឌ្ឍថ្មីមួយនេះ នឹងជួយទាក់ទាញភ្ញៀវទេសចរមកខេត្តសៀមបានកាន់តែច្រើន ក្នុងគោលដៅលើកកកម្ពស់វិស័យទេសចរណ៍នៅកម្ពុជា។
ក្រុមហ៊ុនណាហ្គាបាននិយាយដូច្នេះ៖« តាមគម្រោងអភិវឌ្ឍនេះក្រុមហ៊ុននឹងបង្កើតយុទ្ធសាស្ត្រនៃការធ្វើការងារ ជាមួយទីភ្នាក់ទេសចរនៅប្រទេសចិន និងប្រទេសនានាទៀត តាមប្រព័ន្ធអ៊ីនធឺណែត[Internet] ដើម្បីនាំភ្ញៀវទេសចរមកកាន់ខេត្តសៀមរាប និងរាជធានីភ្នំពេញ»៕
Tag:
រមណីយដ្ឋាន
NAGA CORP
ឧទ្យានអង្គរ
សៀមរាប
© រក្សាសិទ្ធិដោយ thmeythmey.com
