សង្គមអន្តរជាតិ
អន្តរជាតិ
ប្រមុខការទូតអាមេនីចុះចេញពីតំណែង ព្រោះមិនពេញចិត្តកិច្ចព្រមព្រៀងជាមួយរុស្ស៊ីនិងអាស៊ែបៃហ្សង់ លោក Zohrab Mnatsakanyan រដ្ឋមន្ត្រីការបរទេសអាមេនីដែលលាលែងពីតំណែង។ រូបភាព៖AFP
× រដ្ឋមន្ត្រីការបរទេសអាមេនីលោក Zohrab Mnatsakanyan លាលែងចេញពីតំណែងនៅថ្ងៃទី១៦ វិច្ឆិកា។ ការលាលែងនេះ ត្រូវបានមើលឃើញថា ជាការបង្ហាញពីការមិនពេញចិត្តនឹងកិច្ចព្រមព្រៀងដែលចុះហត្ថលេខាជាមួយរុស្ស៊ី និងអាស៊ែបៃហ្សង់បញ្ចប់ជម្លោះក្នុងតំបន់ Nagorno-Karabakh ប៉ុន្តែទឹកដីក្នុងតំបន់នេះមួយចំនួនដែលធ្លាប់គ្រប់គ្រងដោយក្រុមឧទ្ទាមផ្ដាច់ខ្លួនអាមេនីទៅឲ្យរដ្ឋាភិបាលអាស៊ែបៃហ្សង់។
លោក Zohrab Mnatsakanyan បានចុះចេញពីតំណែងរដ្ឋមន្ត្រីការបរទេសអាមេនី ប៉ុន្មានថ្ងៃក្រោយអាមេនី ចុះហត្ថលេខាកិច្ចព្រមព្រៀងឈប់បាញ់ជាមួយអាស៊ែបៃហ្សង់ក្រោមការជ្រោមជ្រែងរបស់របស់រុស្ស៊ី។ កិច្ចព្រមព្រៀងនេះ ត្រូវបានមើលឃើញថា ជាបរាជ័យសម្រាប់អាមេនី ព្រោះទឹកដីខ្លះដែលក្រុមឧទ្ទាមដែលខ្លួនគាំទ្រនៅ Nagorno-Karabakh ត្រូវប្រគល់ឲ្យអាស៊ែបៃហ្សង់។
មិនមានមូលហេតុបញ្ជាក់ពីការលាលែងនេះឡើយ ប៉ុន្តែអាចទាក់ទិននឹងកិច្ចព្រមព្រៀងឈប់បាញ់ និងការប្រគល់ទីក្រុងឲ្យអាស៊ែបៃហ្សង់។ អ្នកនាំពាក្យរដ្ឋមន្ត្រីការបរទេសអាមេនី អះអាងថា ការបោះបង់ក្រុង Shusha ដែលជាក្រុងសំខាន់ទី២ ក្នុងតំបន់ Nagorno-Karabakh ពុំដែលស្ថិតក្នុងរបៀបវារៈណាមួយនៃការចចារសន្តិភាពជាមួយអាស៊ែបៃហ្សង់ឡើយ។ នេះបើតាមទីភ្នាក់ងារព័ត៌មានReuters។
ក្រោយចុះកិច្ចព្រមព្រៀងខាងលើ រដ្ឋាភិបាលលោកនាយករដ្ឋមន្ត្រី Nikol Pashinyan រងការទិតៀនពីសំណាក់សាធារណមតិក្នុងស្រុក ដោយបាតុកររាប់ពាន់នាក់ធ្វើបាតុកម្មទាមទារឲ្យលោកPashinyan ចុះចេញពីតំណែង។ ដូចគ្នានេះដែរ ប្រធានាធិបតីអាមេនីលោក Armen Sarkissian បាននិយាយថារដ្ឋាភិបាលរបស់លោកPashinyan គួរណាស់តែត្រូវរំលាយចោល ដើម្បីបើកផ្លូវឲ្យមានការបោះឆ្នោតសភាមុនអាណត្តិ។
ក្នុងសុន្ទរកថាថ្លែងទៅកាន់ប្រជាជាតិ លោកSarkissian និយាយថា៖« ដោយផ្អែកទៅលើស្ថានការណ៍បច្ចុប្បន្ន ការទាមទាររបស់សាធារណៈជន និងដើម្បីបញ្ចៀសវិបត្តិនយោបាយ ការបោះឆ្នោតសភាមុនអាណត្តិ ជារឿងដែលមិនអាចជៀសផុត»។ លោកបន្តថា អាមេនីគួរមានរដ្ឋាភិបាលរួបរួមជាតិបណ្តោះអាសន្នមួយ។ យ៉ាងណាក្តី ការលើកឡើងរបស់ប្រធានាធិបតីអាមេនីពុំមានអំណាចចាប់បង្ខំឲ្យរដ្ឋាភិបាលឲ្យគោរពតាមឡើយ ដោយការលើកឡើងទាំងអស់នេះគ្រាន់តែជាអនុសាសន៍ប៉ុណ្ណោះ។
ចំណែកនាយករដ្ឋមន្ត្រី Pashinyn បានច្រានចោល ការទាមទារឲ្យចុះចេញពីតំណែងដែរ។ លោក Pashinyan ថែមទាំងបានលើកឡើងថា សង្គ្រាមជាមួយអាស៊ែបៃហ្សង់អាចនឹងត្រូវបានបញ្ចៀស បើសិនជាពេលនោះអាមេនីស្ម័គ្រចិត្តបោះបង់តំបន់ចំនួន៧ជុំវិញទឹកដី Nagorno-Karabakh នឹងទីក្រុងShushi។ ប៉ុន្តែលោកថា អាមេនីសុខចិត្តធ្វើសង្គ្រាម។
សូមរំលឹកផងដែរថា កាលពីថ្ងៃទី១០ វិច្ឆិកា អាមេនី អាស៊ែបៃហ្សង់ និងរុស្ស៊ី បានចុះកិច្ចព្រមព្រៀងសន្តិភាពមួយសម្រាប់តំបន់ Nagorno-Karabakh។ កិច្ចព្រមព្រៀងនោះ អនុញ្ញាតឲ្យអាស៊ែបៃហ្សង់កាន់កាប់ទឹកដីដែលខ្លួនវាយយកបានក្នុងតំបន់ជម្លោះ។ រុស្ស៊ី បានពង្រាយកងរក្សាសន្តិភាព២ពាន់នាក់ដើម្បីឃ្លាំមើលបទឈប់បាញ់ខាងលើ។ តំបន់ Nagorno-Karabakh ទទួលស្គាល់ជាអន្តរជាតិជាទឹកដីរបស់អាស៊ែបៃហ្សង់ ប៉ុន្តែគ្រប់គ្រងដោយជនជាតិភាគតិចអាមេនីតាំងតែពីឆ្នាំ១៩៩៤៕
Tag:
អាមេនី
អាស៊ែបៃហ្សង់
© រក្សាសិទ្ធិដោយ thmeythmey.com