ភ្នំពេញ៖ លោក វេង សាខុន រដ្ឋមន្ត្រីកសិកម្ម រុក្ខាប្រមាញ់ និងនេសាទ បានបញ្ជាមន្ត្រីជំនាញរបស់ខ្លួន ចុះទៅស្រាវជ្រាវរកករណីកាប់ព្រៃឈើខុសច្បាប់របស់ក្រុមហ៊ុនMacle Logistics នៅក្នុងព្រះវិហារ។ ការចុះស្រាវជ្រាវនេះ ធ្វើឡើងក្រោយពីមានសារព័ត៌មានក្នុងស្រុក ចុះផ្សាយថា ក្រុមហ៊ុនMacle Logistics កំពុងកាប់ឈើខុសច្បាប់ នៅព្រះវិហារ។
ក្នុងករណីព្រៃឈើនៅខេត្តព្រះវិហារនេះ លោក វេង សាខុន បានបញ្ជូនលោក អ៊ុង សំអាត រដ្ឋលេខាធិការក្រសួងកសិកម្ម, លោកកែវ អូម៉ាលីស្ស ប្រធានរដ្ឋបាលព្រៃឈើ និងមន្ត្រីជំនាញឯទៀតនៃក្រសួងកសិកម្ម ដោយមានអមនឹងព្រះរាជអាជ្ញា ទៅពិនិត្យលើភាពជាក់ស្តែង និងស្រាវជ្រាវរកការពិតនៃការកាប់ឈើរបស់ក្រុមហ៊ុនMacle Logistics រយៈពេល៣ថ្ងៃមកហើយ ។ លើសពីនេះលោក វេង សាខុន ក៏ប្រាប់ឲ្យមន្ត្រីខ្លួន អញ្ជើញអ្នកកាសែត ដែលចុះផ្សាយព័ត៌មានពីការកាប់ឈើនោះ មកជជែកពិភាក្សាគ្នាផងដែរ។
ថ្លែងប្រាប់សារព័ត៌មានថ្មីៗនៅថ្ងៃទី១៨ វិច្ឆិកា រដ្ឋមន្ត្រីក្រសួងកសិកម្មរូបនេះ បាននិយាយដូច្នេះថា៖«យើងកំពុងតែស្រាវជ្រាវរកការពិត[លើករណីកាប់ឈើនៅព្រះវិហារនេះ] ព្រោះឥឡូវមានអ្នកកាសែតមួយចំនួនបានបញ្ជូនព័ត៌មានតៗគ្នា ដែលមិនមែនជាការពិត ចាំចាប់ជំរិតទារលុយយើង។ យើងស្រាវជ្រាវរកការពិតអស់៣-៤ថ្ងៃមកហើយ…។ ខ្ញុំបញ្ជាដាច់ខាត ត្រូវនាំខ្លួនអ្នករាយការណ៍[អ្នកកាសែត] ឱ្យទៅជួបគ្នា និយាយនៅមុខព្រះរាជអាជ្ញា ដើម្បីរកឱ្យឃើញភាពខុសត្រូវហ្នឹង ថា វាយ៉ាងម៉េច»។
បើតាមរដ្ឋមន្ត្រីកសិកម្មរូបនេះ លទ្ធផលឬរបាយការណ៍ជាក់ស្តែង នៃករណីកាប់ឈើនៅខេត្តព្រះវិហារនេះ នឹងចេញជាផ្លូវការ នៅថ្ងៃទី១៩ វិច្ឆិកា។
កាលពីថ្ងៃទី១៣ វិច្ឆិកា រដ្ឋបាលព្រៃឈើនៃក្រសួងកសិកម្ម បានចេញសេចក្តីប្រកាសព័ត៌មានថា ក្រុមហ៊ុនMacle Logistics ទទួលបានការអនុញ្ញាតឱ្យបង់ថ្លៃសួយសារ និងបុព្វលាភជូនរដ្ឋ និងកាប់ប្រមូលផល អនុផលព្រៃឈើ ក្នុងអនុតំបន់II, III និងអនុតំបន់IV នៃសម្បទានដីសេដ្ឋកិច្ចរបស់ក្រុមហ៊ុន PLT.Co.Ltd ដែលស្ថិតនៅក្នុងឃុំរៀបរយ ស្រុករវៀង ខេត្តព្រះវិហារ។
ក្នុងសេចក្តីប្រកាសព័ត៌មានដដែលនេះ បានបញ្ជាក់ថា ការបង់ថ្លៃសួយសារ និងបុព្វលាភជូនរដ្ឋ និងកាប់ប្រមូលផល អនុផលព្រៃឈើ របស់ក្រុមហ៊ុនMacle Logistics ក្នុងតំបន់ខាងលើនេះ គឺស្របតាមលទ្ធផលសារពើភ័ណ្ឌប៉ាន់ស្មានធនធានព្រៃឈើរបស់រដ្ឋបាលព្រៃឈើ ដោយត្រូវអនុវត្តតាមនីតិវិធីជាធរមាន ។
លោក កែវ អូម៉ាលីស្ស ប្រធានរដ្ឋបាលព្រៃឈើ បានបន្ថែមប្រាប់សារព័ត៌មានថ្មីៗតាមទូរស័ព្ទថា ក្រុមហ៊ុន Macle Logistics បានបង់ថ្លៃសួយសារ និងបុព្វលាភជូនរដ្ឋ ជាង២៧ម៉ឺនដុល្លារ ក្នុងការប្រមូលផល អនុផលព្រៃឈើ លើដីសម្បទានដីសេដ្ឋកិច្ច ទំហំ៣,៤០០ហិកតានេះ ទៅឱ្យក្រុមហ៊ុន PLT.Co.Ltd។
ប្រធានរដ្ឋបាលព្រៃឈើរូបនេះ បានអះអាងថា ក្រុមហ៊ុន Macle Logistics គឺទើបតែចុះប្រមូលផល និងអនុផលព្រៃឈើនៅក្នុងតំបន់នេះ កាលពីថ្ងៃទី១២វិច្ឆិកា ឆ្នាំ២០២០ ហើយក៏មានសារព័ត៌មានមួយចំនួន បានចុះផ្សាយថា ការប្រមូលផលរបស់ក្រុមហ៊ុននេះ ជាការលួចកាប់ព្រៃឈើខុសច្បាប់ និងចោទប្រកាន់ទៅអាជ្ញាធរថាបើកដៃក្រុមហ៊ុនបំផ្លាញសម្បត្តិធម្មជាតិជាតិ។ បើតាម លោកកែវ អូម៉ាលីស្ស ដីក្នុងនៅតំបន់នេះ ត្រូវបានក្រសួងកសិកម្ម សម្បទានឱ្យក្រុមហ៊ុន PLT.Co.Ltd តាំងឆ្នាំ២០០៨មកម្លេះ សម្រាប់វិនិយោគលើការដាំដំណាំកសិឧស្សាហកម្ម ដូចជា ដាំដើមចន្ទន៍ក្រស្នា, ដាំស្វាយចន្ទី និងដាំកៅស៊ូ ជាដើម។
ជាមួយគ្នានេះ សារព័ត៌មានថ្មីៗមិនអាចសុំការអត្ថាធិប្បាយ ឬការបញ្ជាក់ណាមួយពីក្រុមហ៊ុនMacle Logistics នាថ្ងៃទី១៨ វិច្ឆិកាបានឡើយ ដោយបុគ្គលិកនៃក្រុមហ៊ុននេះអះអាងថា មិនទាន់ទទួលបានអនុញ្ញាតពីម្ចាស់ក្រុមហ៊ុន៕