ភ្នំពេញ៖ សម្ដេច ហ៊ុន សែន បានប្រកាសឲ្យពលរដ្ឋរៀបចំអាពាហ៍ពិពាហ៍ធម្មតាឡើងវិញ ក្រោយពីអ្នកជាប់ពាក់ព័ន្ធព្រឹត្តិការណ៍៣ វិច្ឆិកា ជាង១ពាន់នាក់ អវិជ្ជមានកូវីដ-១៩ នៅពេលធ្វើតេស្តសុខភាពចុងក្រោយនេះ។ នេះបើតាមសារសំឡេងរបស់នាយករដ្ឋមន្ត្រី ហ៊ុន សែន។
សម្ដេច ហ៊ុន សែន ក៏បានបញ្ជាឲ្យអាជ្ញាធរមូលដ្ឋាន ជួយសម្របសម្រួលដល់ការរៀបអាពាហ៍ពិពាហ៍របស់ពលរដ្ឋផងដែរ។ ជាពិសេសការរៀបចំឲ្យមានការអនុវត្តតាមវិធានការរបស់ក្រសួងសុខាភិបាលឲ្យត្រឹមត្រូវ សម្រាប់ភ្ញៀវចូលរួមអាពាហ៍ពិពាហ៍នោះ។
ចំពោះលទ្ធផលអ្នកធ្វើតេស្ត ដែលនឹងត្រូវប្រកាសនោះ រួមមានអ្នកធ្វើតេស្តនៅភ្នំពេញ ១៥៦៩នាក់ (មានជនជាតិហុងគ្រីចំនួន៥នាក់) ,ខេត្តកណ្តាល ៦៧នាក់ ,ខេត្តពោធិសាត់ ៤០នាក់ ,ខេត្តព្រៃវែង ២៣នាក់ និងខេត្តកំពង់ធំ ៣នាក់ ដែលក្រសួងសុខាភិបាលនឹងត្រូវប្រកាសនៅថ្ងៃទី១៩ វិច្ឆិកា ។ លទ្ធផលអ្នកធ្វើតេស្តនៅខេត្តកំពង់ឆ្នាំង១១នាក់ នឹងត្រូវប្រកាស ថ្ងៃទី២១ វិច្ឆិកា ។ ចំណែកអ្នកធ្វើតេស្តនៅខេត្តកែប ១៨នាក់ ,ខេត្តព្រះសីហនុ ៤០នាក់ ខេត្តកំពង់ចាម១នាក់ នឹងត្រូវបង្ហាញលទ្ធផលនៅថ្ងៃទី២៣ វិច្ឆិកា។ រីឯលទ្ធផលអ្នកធ្វើតេស្តនៅខេត្តព្រះវិហារ ២០នាក់ ខេត្តរតនគិរី១០នាក់ នឹងត្រូវប្រកាសនាថ្ងៃទី២៥ វិច្ឆិកា។
បើតាមសម្ដេច ហ៊ុន សែន ការបិទបញ្ចប់ព្រឹត្តិការណ៍ ៣ វិច្ឆិកា នៃការទប់ស្កាត់ជំងឺកូវីដ-១៩ នេះ នឹងអាចប្រកាសជាផ្លូវការនៅថ្ងៃទី២៥ វិច្ឆិកា ។
ការធ្វើតេស្ត៣លើកកន្លងមក គឺមានមនុស្ស៤នាក់ប៉ុណ្ណោះ វិជ្ជមានកូវីដ-១៩ រួមមានលោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា, លោក ស ចិត្រា អគ្គលេខាធិការរងក្រសួងកសិកម្ម និងទូតហុងគ្រីប្រចាំកម្ពុជា និងវៀតណាម រួមទាំងអង្គរក្សម្នាក់។ ប៉ុន្តែលោក សួស យ៉ារ៉ា បានជាសះស្បើយពីកូវីដ-១៩ហើយ កាលពីថ្ងៃទី១៦ វិច្ឋិកា។
គិតត្រឹមថ្ងៃទី១៨វិច្ឆិកា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ចំនួន៣០៤នាក់ ដោយក្នុងនោះ មាន៣០៤នាក់ បានជាសះស្បើយ និង១៣នាក់ទៀត កំពុងព្យាបាល៕