សង្គមអន្តរជាតិ
អន្តរជាតិ
មន្ត្រីបក្សសាធារណរដ្ឋ ទទូចឲ្យរដ្ឋបាលអាមេរិកធ្វើការសិ្នទ្ធជាមួយសម្ព័ន្ធមិត្តដើម្បីខ្ទប់ឥទ្ធិពលចិន
ប្រធានគណៈកម្មាធិការព្រឹទ្ធសភាទទួលបន្ទុកកិច្ចការបរទេស មកពីបក្សសាធារណរដ្ឋ លោក Jim Risch ។ រូបភាព៖ AFP
×![]()
២ខែមុនប្រធានាធិបតី ដូណាល់ ត្រាំ ចាកចេញពីសេតវិមាន ប្រធានគណៈកម្មាធិការកិច្ចការបរទេស ព្រឹទ្ធសភាមកពីបក្សសាធារណរដ្ឋ លោក Jim Risch បានចេញរបាយការណ៍មួយនៅថ្ងៃទី១៨ ខែវិច្ឆិកា ដោយទទូចឲ្យក្រុងវ៉ាស៊ីនតោនធ្វើការឲ្យកាន់តែជិតស្និទ្ធជាមួយសម្ព័ន្ធមិត្តអឺរ៉ុប ក្នុងគោលដៅរាំងខ្ទប់ឥទ្ធិពលចិន។ 
«ខ្ញុំចាត់ទុកបញ្ហាគោលនយោបាយការបរទេសជាអាទិភាពចម្បងដាច់គេក្នុងអាណត្តិយើង»។ លោក Jim Risch អះអាងបែបនេះ មុននឹងចោទចិនថាព្យាយាមបំផ្លាញវឌ្ឍនភាព សន្តិសុខ និងអភិបាលកិច្ចល្អនៅគ្រប់ច្រករហកទាំងអស់នៅជុំវិញសកលលោក។
ក្នុងនាមជាប្រធានគណៈកម្មាធិការបន្ទុកកិច្ចការបរទេសរបស់ព្រឹទ្ធសភាដ៏មានឥទ្ធិពល លោក Risch លើកយោបល់ថា សហរដ្ឋអាមេរិក ត្រូវត្រៀមលក្ខណៈធ្វើការឲ្យកាន់តែជិតស្និទ្ធជាមួយដៃគូនិងសម្ព័ន្ធមិត្តរបស់ខ្លួន ដើម្បីរាំងខ្ទប់ឥទ្ធិពលចិន។
លោក ដូណាល់ ត្រាំ ប្រធានាធិបតីជិតអស់អាណត្តិ បានចាត់ជំហររឹងត្អឹងជាមួយក្រុងប៉េកាំង តែក៏បានរិះគន់សម្ព័ន្ធមិត្តនៅអឺរ៉ុប និងអាស៊ីដែរ។ លោក ត្រាំ ចោទប្រទេសទាំងនោះថា កេងចំណេញថ្លៃការពារជាតិពីអាមេរិក ហើយដាក់សម្ពាធពួកគេបង្កើនការចំណាយយោធាបន្ថែម។ ចំណែក លោក បៃឌិន ដែលនឹងស្បថចូលកាន់តំណែងនាថ្ងៃទី ២០ ខែមករា បានប្រកាសជំហរស្តារទំនាក់ទំនងជាមួយសម្ព័ន្ធមិត្តអាមេរិក ដែលលោកចាត់ទុកជាប្រភពស្នូលនៃកម្លាំងក្នុងការទប់ទល់នឹងរដ្ឋាភិបាលក្រុងប៉េកាំង ។
តាមការចុះផ្សាយរបស់ទីភ្នាក់ងារព័ត៌មាន Reuters លោក David McAllister សមាជិកសភាអឺរ៉ុប បានលើកឡើងថា វាដល់ពេលសម្រាបស្តារភាពជាដៃគូ និងពង្រឹងចំណងទាក់ទងរវាងអឺរ៉ុបនិងអាមេរិក។ ម្យ៉ាងទៀត លោកក៏ទទូចឲ្យក្រុងវ៉ាស៊ីនតោនបង្កើនការចូលរួមក្នុងអង្គការអន្តរជាតិ ដូចជា អង្គការសុខភាពពិភពលោក ជាដើម ដែលលោកត្រាំបានប្រកាសដកចេញក្នុងឆ្នាំនេះ។
របាយការណ៍របស់លោក Risch បានបញ្ជាក់ទៀតថា បណ្ដាប្រទេសប្រជាធិបតេយ្យ ត្រូវធ្វើសកម្មភាពបន្ថែមទៀតដើម្បីប្រយុទ្ធប្រឆាំងព័ត៌មានក្លែងក្លាយ បង្កើសមត្ថភាពអ្នកជំនាញលើប្រទេសចិន និងការពារភាពថ្លៃថ្នូរនៃស្ថាប័នអន្តរជាតិ ដូចជា អង្គការសហប្រជាជាតិ នៅចំពោះមុខកំណើននៃឥទ្ធិពលចិន។
លោក Risch ទើបតែជាប់ឆ្នោតឡើងវិញជាសមាជិកព្រឹទ្ធសភាមកពីរដ្ឋ Idaho ។ លោក នឹងបន្តរក្សាកៅអីជាប្រធានគណៈកម្មាធិការព្រឹទ្ធសភាទទួលបន្ទុកកិច្ចការបរទេស ប្រសិនបើបក្សសាធារណរដ្ឋបន្តកាន់កាប់សំឡេងភាគច្រើនក្នុងព្រឹទ្ធសភា។ លទ្ធផលបោះឆ្នោតសមាជិកព្រឹទ្ធសភា នឹងត្រូវរង់ចាំដល់ខែមករា នៅពេល Georgia រៀបចំការបោះឆ្នោតម្ដងទៀតដើម្បីជ្រើសរើសសមាជិកព្រឹទ្ធសភា២រូបចុងក្រោយ៕
Tag:
ចិន
សហរដ្ឋអាមេរិក
ព្រឹទ្ធសភា
ដូណាល់ ត្រាំ
© រក្សាសិទ្ធិដោយ thmeythmey.com
