សៀមរាប៖ កាលពីពេលថ្មីៗនេះ ក្រុមហ៊ុនណាហ្គាខប (NAGA CORP)ដែលគេស្គាល់ថាជាក្រុមហ៊ុនយក្សមួយនៅកម្ពុជា បានប្រកាសពីគម្រោងអភិវឌ្ឍន៍ថ្មីដ៏ធំមួយក្នុងតម្លៃ ៣៥០លានដុល្លារ លើទំហំផ្ទៃដី៧៥ហិកតា ក្នុងខេត្តសៀមរាប។ យោងតាមសេចក្ដីប្រកាសព័ត៌មាន ការវិនិយោគដែលមានច្រើនផ្នែកនេះ សង់មិនឆ្ងាយប៉ុន្មានពីឧទ្យានជាតិអង្គរ គឺត្រឹម៥០០ម៉ែត្រប៉ុណ្ណោះ គិតពីព្រំដីក្នុងឧទ្យានអង្គរដែលមានទំហំ ៤០១គីឡូម៉ែត្រក្រឡា។ ក្រុមហ៊ុននេះបានបញ្ជាក់ច្បាស់ថា ការអភិវឌ្ឍនៅលើទឹកដីបេតិកភណ្ឌនេះ គឺគ្មានការវិនិយោគបើកកន្លែងល្បែងស៊ីសងទេ។
ទោះបីជាក្រុមហ៊ុនណាហ្គាខបបានប្រកាសពីការវិនិយោគដ៏ធំក្នុងខេត្តសៀមរាបក្នុងកាលៈទេសៈជំងឺកូវីដ១៩នេះក្ដី តែដំណឹងនេះបានធ្វើឱ្យមានការរំជើបរំជួលមួយដល់សាធារណជន និងមានក្ដីរំពឹងថា គម្រោងអភិវឌ្ឍន៍ថ្មីនេះ នឹងជួយសេដ្ឋកិច្ចខេត្តសៀមរាបឱ្យកាន់តែល្អប្រសើរ និងធ្វើឱ្យវិស័យទេសចរណ៍ក្នុងខេត្តបេតិកភណ្ឌនេះកាន់តែសម្បូរបែប។ ក្នុងសេចក្ដីប្រកាសព័ត៌មានចេញផ្សាយថ្ងៃទី១៥ វិច្ឆិកា ក្រុមហ៊ុនណាហ្គាខប ថាក្នុងគម្រោងថ្មីនេះ ខ្លួននឹងវិនិយោគជាសណ្ឋាគារខ្នាតធំមាន ៥០០បន្ទប់ ឧទ្យានទឹក China Town ឧទ្យានប្រវត្តិសាស្ដ្រ វប្បធម៌បែបទំនើប។ល។ ក្រុមហ៊ុននេះបញ្ជាក់ថា ខ្លួនបានជួលដីពីរាជរដ្ឋាភិបាលក្នុងរយៈពេល ៥០ឆ្នាំ ស្ថិតនៅខាងត្បូងចម្ងាយ៥០០ម៉ែត្រពីឧទ្យានជាតិអង្គរ។
សាវតានៃផ្ទៃដីឧទ្យានជាតិអង្គរ
គេត្រូវដឹងថា ផ្ទៃដីសរុបចំនួន ៤០១ គីឡូម៉ែត្រក្រឡា គឺជាតំបន់ដែលត្រូវការការពារ និងត្រូវបានគេឱ្យឈ្មោះថា «ឧទ្យានជាតិអង្គរ ឬរមណីយដ្ឋានអង្គរ»។ តំបន់នេះ ត្រូវបានបង្កើតឡើងដោយព្រះរាជ្យក្រឹត្យ ហើយមានអាជ្ញាធរជាតិអប្សរាជាអ្នកគ្រប់គ្រង។ ក្នុងន័យនេះ គេមិនអាចអភិវឌ្ឍន៍អ្វីបានទាំងអស់ តែរក្សាខ្នងផ្ទះរបស់ប្រជាពលរដ្ឋដែលរស់នៅពីដូនតាមក។ ឧទ្យានអង្គរ ចែកជា៥តំបន់សំខាន់ៗ គឺតំបន់១ (តំបន់មានប្រាសាទ) តំបន់២ (តំបន់បុរាណវត្ថុដែលត្រូវការពារ) តំបន់៣ (តំបន់ទេសភាពវប្បធម៌ត្រូវការពារ) តំបន់៤ (ចំណុចមានសារៈសំខាន់ផ្នែកបុរាណវត្ថុវិទ្យា នរវិទ្យា ឬប្រវត្តិវិទ្យា) និងតំបន់៥ (បរិវេណអភិវឌ្ឍន៍សង្គមសេដ្ឋកិច្ច និងវប្បធម៌នៃតំបន់សៀមរាបអង្គរ)។ នេះបើយោងតាមព្រះរាជ្យក្រឹត្យ ស្ដីពីការកំណត់និងការចាត់ចែងគ្រប់គ្រងតំបន់សៀមរាបអង្គរ ឆ្នាំ១៩៩៤។
ដីជាកម្មសិទ្ធិរបស់រដ្ឋនៅខេត្តសៀមរាប
ក្នុងបំណងគ្រប់គ្រង និងការរៀបចំសំណង់នៅលើទឹកដីប្រាសាទ រាជរដ្ឋាភិបាលកម្ពុជានៅឆ្នាំ ១៩៩៥ បានសម្រេចបង្កើត «បុរីសណ្ឋាគារ» ដែលពេលនោះមានទំហំ ៥៦០ ហិកតា ស្ថិតនៅប៉ែកខាងត្បូងឧទ្យានជាតិអង្គរ។ នៅឆ្នាំ ១៩៩៩ រាជរដ្ឋាភិបាលបានចេញអនុក្រឹត្យ ពង្រីកផ្ទៃដីបុរីសណ្ឋាគារបន្ថែមចំនួន ៤៤៧.២ហិកតា ដែលសរុប ផ្ទៃដីបុរីសណ្ឋាគារ មានចំនួន ១,០០៧ ហិកតា។ ដីនេះជាកម្មសិទ្ធិរបស់រដ្ឋ និងប្រគល់សិទ្ធិឱ្យអាជ្ញាធរជាតិអប្សរា ក្នុងការគ្រប់គ្រងនិងចាត់ចែងធ្វើជាបុរីសណ្ឋាគារ។ ក្រៅពីនេះ អាជ្ញាធរជាតិអប្សរាក៏មានសិទ្ធិត្រូវថែរក្សាការពារមិនឱ្យមានការចាប់យកដីថ្មី និងរៀបចំដាក់ឱ្យធ្វើអាជីវកម្មដីធ្លី។ ដីក្នុងបុរីនេះអាចប្រើប្រាស់សម្រាប់សង់សណ្ឋារគារ ភោជនីយដ្ឋាន មជ្ឈមណ្ឌលបម្រើទេសចរណ៍ និងផ្តល់ព័ត៌មានសម្រាប់ទេសចរណ៍។ល។
ក្នុងន័យនេះ គម្រោងអភិវឌ្ឍន៍ដែលប្រកាសដោយក្រុមហ៊ុនណាហ្គាខប ទំនងស្ថិតក្នុងបរិវេណដីបុរីសណ្ឋាគារ គឺស្ថិតនៅខាងត្បូងនៃឧទ្យានជាតិអង្គរ ស្ថិតនៅតាមបណ្ដោយផ្លូវ៦០ម៉ែត្រ ឬវិថីសម្ដេចវិបុលបញ្ញា សុខ អាន ចាប់ពីរង្វង់មូលអប្សរា ឆ្ពោះទៅទិសខាងកើត។ កន្លងមក មានក្រុមហ៊ុនវិនិយោគមួយចំនួនបានជួលដីបុរីសណ្ឋាគារសម្រាប់វិនិយោគ ក្នុងនោះមានសណ្ឋាគារ សុខា សៀមរាប សារមន្ទីរសព្វទស្សន៍អង្គររបស់កូរ៉េជាដើម។
ជុំវិញគម្រោងអភិវឌ្ឍន៍នេះ អគ្គនាយកអាជ្ញាធរជាតិអប្សរា លោក ហង់ ពៅ សុំមិនអត្ថាធិប្បាយនោះទេ ដោយលោកប្រាប់ថា មិនពាក់ព័ន្ធក្នុងតំបន់ឧទ្យានជាតិអង្គរនោះទេ។
ចំណែកឯអភិបាលរងខេត្តសៀមរាប ទទួលបន្ទុកការងារទេសចរណ៍ក៏សុំមិននិយាយពីគម្រោងនេះដែរ ដោយលោកប្រាប់ថា មិនបានដឹងពីគម្រោងនេះពីមុនមកទេ។ លោក ពៅ ពិសិដ្ឋ ប្រាប់ថា អាចជាគម្រោងថ្នាក់ជាតិ ដូច្នេះអាជ្ញាធរខេត្តមិនបានដឹងពីការវិនិយោគក្នុងទំហំធំនេះទេ។
រីឯអ្នកនាំពាក្យក្រសួងទេសចរណ៍លោក តុប សុភ័ក្ដ្រ ក៏មិនបានដឹងពីគម្រោងវិនិយោគតម្លៃ ៣៥០លានដុល្លារនេះដែរ តែលោកបានសាទរ និងរំពឹងថា ការវិនិយោគរបស់ក្រុមហ៊ុនណាហ្គាខប នឹងជំរុញឱ្យខេត្តទេសចរណ៍សៀមរាប កាន់តែមានសក្កានុពល ពន្លឿនការអភិវឌ្ឍផ្នែកវិស័យទេសចរណ៍ស្របតាមផែនការមេអភិវឌ្ឍន៍វិស័យទេសចរណ៍ក្នុងខេត្តសៀមរាបក្នុងឆ្នាំ ២០៣០ ដែលនឹងមានទេសចរអន្តរជាតិ៧លាននាក់ក្នុងមួយឆ្នាំៗ។ លោកបន្ថែមថា ក្រុមហ៊ុននេះអាចវិនិយោគសម្រាប់គោលដៅវែងឆ្ងាយ និងសម្លឹងឱកាសធំៗនៅពេលអនាគត។ លោក តុប សុភ័ក្ដ្រ រំពឹងថា ការវិនិយោគនេះនឹងជួយបង្កើតការងារដល់ប្រជាពលរដ្ឋជាច្រើននៅតំបន់ជុំវិញខេត្តសៀមរាប។
គម្រោងអភិវឌ្ឍន៍ថ្មីរបស់ក្រុមហ៊ុនណាហ្គាខបនៅខេត្តសៀមរាបមានឈ្មោះថា បឹងអង្គរអច្ឆរិយៈ (Angkor Lake of Wonder) ដែលក្រុមហ៊ុននេះបានទទួលសិទ្ធិវិនិយោគលើដីរដ្ឋក្នុងខេត្តសៀមរាបចំនួន ៥០ឆ្នាំ រាប់ពីខែមករា ឆ្នាំ ២០២០ រហូតដល់ឆ្នាំ ២០៧០។ ក្រុមហ៊ុនបញ្ជាក់ថា គម្រោងនេះនឹងបញ្ចប់នៅឆ្នាំ ២០២៥។
គម្រោងនេះនឹងត្រូវរចនាដោយក្រុមហ៊ុនដែលមានមូលដ្ឋាននៅសហរដ្ឋអាមេរិក Steelman Partners និង Gensler។ Sleelman ក៏ជាក្រុមហ៊ុនដែលរចនាប្លង់ NagaWorld ផងដែរ៕