COVID-19
ជាតិ
របាយការណ៍៖ កម្ពុជាលេខ៣ក្នុងពិភពលោក, លេខ១នៅអាស៊ី ក្នុងការគ្រប់គ្រងការឆ្លងកូវីដ១៩
× កម្ពុជាគឺជាកូនសិស្សល្អម្នាក់ក្នុងចំណោមប្រទេសទាំង១៦៦នៅលើពិភពលោក ដែលស្ថិតនៅក្នុងបញ្ជីវាយតម្លៃរបស់ការិយាល័យចក្ខុវិស័យសេដ្ឋកិច្ចរបស់ប្រទេសសេណេហ្កាល់ (Le Bureau de Prospective Economique) ស្តីអំពីសន្ទស្សន៍នៃស្ថានភាពធ្ងន់ធ្ងរនៃជំងឺកូវីដ-១៩។
កម្ពុជាបានជាប់ចំណាត់ថ្នាក់លេខ៣ក្នុងកម្រិតពិភពលោក (ចំណោម១៦៦ប្រទេស) និងស្ថិតនៅលើលេខរៀងលើគេនៅក្នុងកម្រិតអាស៊ី ដែលត្រូវបានទទួលស្គាល់ថា ជាប្រទេសដែលមានស្ថានភាពគ្រប់គ្រងការឆ្លងរាលដាល និងការគ្រប់គ្រងផលប៉ះពាល់បានល្អជាងគេ។ លទ្ធផលនេះត្រូវបានប្រកាសដោយការិយាល័យចក្ខុវិស័យសេដ្ឋកិច្ចរបស់ប្រទេសសេណេហ្កាល់កាលពីថ្ងៃទី១៦ខែវិច្ឆិកាកន្លងទៅថ្មីៗនេះ។
ចំណាត់ថ្នាក់លេខ១ និងលេខ២ បានទៅលើប្រទេស សាំងឃីត និង ណេវីស (Saint Kitts and Nevis) និង ប្រទេស សីស្ហែល (Seychelles)។ រីឯប្រទេសដែលជាប់ចំណាត់ថ្នាក់នៅបន្ទាប់ពីកម្ពុជា គឺប្រទេសនូវែលកាឡេដូនី (Nouvelle Calédonie) និងប្រទេសស៊ូដង់ខាងត្បូង។ ផ្ទុយទៅវិញ ក្នុងចំណោមប្រទេសទាំង១៦៦ ដែលត្រូវបានជ្រើសរើសយកមកវាយតម្លៃ ប្រទេសដែលជាប់ចំណាត់ថ្នាក់អាក្រក់ជាងគេគឺ ហ្ស៊កដានី, អេស្ប៉ាញ, អាហ្វ្រិកខាងត្បូង, បារាំងជាដើម។
ពិន្ទុល្អរបស់កម្ពុជាក្នុងកម្រិតពិភពលោក បានធ្វើឱ្យកម្ពុជាឈរនៅលំដាប់ថ្នាក់លេខមួយជាសិស្សល្អក្នុងការគ្រប់គ្រងការឆ្លងរាលដាលជំងឺកូវីដ១៩បានល្អ នៅក្នុងទ្វីបអាស៊ី។ ប្រទេសថៃ ព្រុយណេ និងប្រទេសអ៊ូសបេគីស្ថានបានជាប់ចំណាត់ថ្នាក់លេខ២ លេខ៣ និងលេខ៤ ក្រោយកម្ពុជានៅក្នុងតំបន់អាស៊ី។
ការវាយតម្លៃត្រូវបានធ្វើឡើងលើមូលដ្ឋានទិន្នន័យរបស់អង្គការសុខភាពពិភពលោក។ នេះបើតាមការបញ្ជាក់របស់អ្នកសរសេររបាយការណ៍គឺលោក មូបារ៉ាក់ ឡូ (Moubarack LO)ជាអគ្គនាយក និងលោក អាម៉ៃយេ ស៊ី (Amaye SY) ជាអ្នកជំនាញជាន់ខ្ពស់របស់ការិយាល័យចក្ខុវិស័យសេដ្ឋកិច្ច។
អ្នកនិពន្ធរបាយការណ៍បានពន្យល់បន្ថែមថា ការវាយតម្លៃត្រូវបានធ្វើឡើងលើធាតុសំខាន់បី គឺស្ថានភាពនៃការឆ្លងមេរោគ ស្ថានភាពនៃការជាសះស្បើយ និងករណីមរណភាព៕
កម្ពុជារកឃើញករណីផ្ទុកជំងឺកូវីដ១៩ដំបូង នៅក្នុង ខែ មករា ឆ្នាំ ២០២០ លើជនជាតិចិន ក្នុងខេត្តព្រះសីហនុ។ ពុំមានករណីឆ្លងរាលដាលនៅក្នុងសហគមន៍ឡើយ។ បច្ចុប្បន្ននេះកម្ពុជាមានអ្នកជំងឺ កូវីដ -១៩ ចំនួន ៣០៤ នាក់ ក្នុងនោះ មានអ្នកជាសះស្បើយ ២៩៤ នាក់ ខណៈអ្នកជំងឺកូវីដ ៩ នាក់ ទៀតកំពុងសម្រាកព្យាបាលនៅមន្ទីរពេទ្យ៕
© រក្សាសិទ្ធិដោយ thmeythmey.com