សង្គមអន្តរជាតិ
អន្តរជាតិ
ទីប្រឹក្សាសន្តិសុខលោក ត្រាំ៖ ទំនាក់ទំនងអាមេរិក-វៀតណាម កំពុងរឹងមាំ និងកាន់តែរឹងមាំនៅថ្ងៃខាងមុខ ទីប្រឹក្សាសន្តិសុខប្រធានាធិតីអាមេរិក លោក Robert O'Brien ជល់កែងដៃជាមួយរដ្ឋមន្រ្តីការបរទេសវៀតណាម ផាម ប៊ិញមិញ។ រូបភាពវេបសាយរដ្ឋាភិបាលវៀតណាម
× ទីប្រឹក្សាសន្តិសុខជាតិរបស់ប្រធានាធិបតីអាមេរិក លោក Robert O’Brien បាននិយាយនៅថ្ងៃទី២២ ខែវិច្ឆិកា ថា ទំនាក់ទំនងរវាងអាមេរិក និងវៀតណាម កំពុងតែរឹងមាំ ហើយកាន់តែរឹងមាំថែមទៀតនៅថ្ងៃខាងមុខ។ លោកនិយាយបែបនេះក្នុងជំនួបជាមួយនិស្សិតវៀតណាមអំឡុងទស្សនកិច្ចនៅទីក្រុងហាណូយ ដើម្បីអបអរខួប២៥ឆ្នាំនៃការស្ដារទំនាក់ទំនងការទូតរវាងអតីតសត្រូវទាំងពីរក្នុងសង្គ្រាមវៀតណាម។
អំឡុងទស្សនកិច្ចបីថ្ងៃនៅវៀតណាម លោក Robert O’Brien ទីប្រឹក្សាសន្តិសុខប្រធានាធិបតីអាមេរិក ដូណាល់ ត្រាំ បានជួបជាមួយថ្នាក់ដឹកនាំជាច្រើនរាប់ទាំងនាយករដ្ឋមន្ត្រី ង្វៀន ស៊ួនហ្វុក និងរដ្ឋមន្ត្រីការបរទេស ផាម ប៊ិញមិញ ។ លោក ក៏បានទៅថ្លែងសុន្ទរកថានៅបណ្ឌិត្យសភាការទូតវៀតណាម ដោយបានលើកឡើងពីការកសាងទំនុកចិត្តរវាងអាមេរិក និងវៀតណាមកាលពីឆ្នាំ១៩៩៥ ពេលដែលទំនាក់ទនងទ្វេភាគីត្រូវបានភ្ជាប់ឡើងវិញ។
បើតាមវេបសាយរដ្ឋាភិបាលវៀតណាម លោក O’Brien និយាយថា កាលពី២៥ឆ្នាំមុន អាមេរិក និងវៀតណាម បានទុកភាពមិនត្រូវមួយឡែក ហើយបង្កើតមិត្តភាពដែលបានរីកលូតលាស់ទៅជាភាពជាដៃគូគ្រប់ជ្រុងជ្រោយ និងរឹងមាំ ដោយឈរលើគោលការណ៍ទុកចិត្ត និងយល់ពីគ្នាទៅវិញទៅមក។ លោកបន្តទៀតថា អាមេរិកបន្តធ្វើកិច្ចសហប្រតិបត្តិការជិតស្និទ្ធជាមួយវៀតណាមលើការរក្សាសន្តិសុខ និងសន្តិភាពក្នុងតំបន់។
«លោកអះអាងថា អាមេរិកឲ្យតម្លៃលើភាពជាដៃគូរបស់វៀតណាម និងការសម្របសម្រួលជិតស្និទ្ធលើបញ្ហាជាក្ដីបារម្ភរួមដូចជាការរក្សាសន្តិសុខ និងស្ថិរភាពនៅសមុទ្រខាងកើត និងមេគង្គ។» វេបសាយរដ្ឋាភិបាលវៀតណាមស្រង់សម្ដីទីប្រឹក្សាសន្តិសុខអាមេរិកផ្សាយបែបនេះ។ សមុទ្រខាងកើត ជាឈ្មោះវៀតណាមហៅសមុទ្រចិនខាងត្បូង។
ដោយឡែកនាជំនួបជាមួយលោក ផាម នៅថ្ងៃទី២១ ខែវិច្ឆិកា មន្ត្រីទាំងពីរឯកភាពគ្នាថា ទំនាក់ទំនងទ្វេភាគីឈានដល់ចំណុចកំពូល និងល្អមិនធ្លាប់មាន។ ប្រមុខការទូតវៀតណាមថែមទាំងនិយាយថា វៀតណាម និងសមាជិកអាស៊ានឯទៀត នឹងបន្តការគាំទ្រ និងការសម្របសម្រួលជាមួយអាមេរិក និងប្រទេសផ្សេងទៀតក្នុងការរួមចំណែកវិជ្ជមានដើម្បីរក្សាសន្តិភាព សន្តិសុខ ស្ថិរភាព កិច្ចសហប្រតិបត្តិការ និងសណ្ដាប់ធ្នាប់ផ្អែកតាមច្បាប់នៅតំបន់ និងពិភពលោក៕
Tag:
អាមេរិក
វៀតណាម
Robert O’Brien
© រក្សាសិទ្ធិដោយ thmeythmey.com