ថៃ បន្តដាក់ប្រទេសក្នុងភាពអាសន្នដល់ពាក់កណ្តាលខែមករា ២០២១

COVID-19

អន្តរជាតិ

ថៃ បន្តដាក់ប្រទេសក្នុងភាពអាសន្នដល់ពាក់កណ្តាលខែមករា ២០២១

23, Nov 2020 , 5:29 pm

រូបភាព

ទាហានថៃពាក់ម៉ាស់។ រូបភាព៖ AFP

ដោយ:

គណៈរដ្ឋមន្ត្រីថៃនៅថ្ងៃទី២៣ វិច្ឆិកានេះ អនុម័តសម្រេចដាក់ប្រទេសក្នុងស្ថានភាពអាសន្នរយៈពេល៤៥ថ្ងៃបន្ថែមទៀត ពោលគឺរហូតដល់ថ្ងៃទី១៥ ខែមករា ឆ្នាំ២០២១។

គណៈរដ្ឋមន្ត្រីថៃ បានយល់ព្រមលើការសម្រេចពន្យារពេលបន្តដាក់ប្រទេសក្នុងស្ថានភាពអាសន្នជាលើកទី៨ ក្រោយការប្រជុំរបស់មណ្ឌលរដ្ឋបាលស្ថានការណ៍ COVID-19 ដែលដឹកនាំដោយលោកនាយករដ្ឋមន្ត្រី ប្រាយុទ្ធ ចន្ទអូច កាលពីថ្ងៃទី១៨ វិច្ឆិកា។ នេះបើយោងតាមកាសែត The Bangkok Post។

ការព្យារពេលនេះចាប់ផ្តើមពីថ្ងៃទី១ ធ្នូហូតដល់ថ្ងៃទី១៥ មករា ឆ្នាំ២០២១។ លោក Anucha Burapachaisri អ្នកនាំពាក្យរដ្ឋាភិបាលថៃបញ្ជាក់បែបនេះ។ ការពន្យារពេលលើកនេះ មានរយៈពេល១៥ថ្ងៃលើសពីការពន្យារពេលលើកមុន ដើម្បីក្តោបពិធីបុណ្យចូលឆ្នាំសាកល ដែលប្រជាជនធ្វើដំណើរច្រើន ដែលការប្រឈមនៃការផ្ទុះឡើងនៃជំងឺមានកម្រិតខ្ពស់។ ភាពអាសន្នបច្ចុប្បន្ន នឹងផុតនៅថ្ងៃទី៣០ ខែវិច្ឆិកា។

រដ្ឋាភិបាលថៃ បានចេញក្រឹត្យដាក់ប្រទេសក្នុងស្ថានការណ៍អាសន្នតាំងតែពីថ្ងៃទី២៦ មីនាមកម្ល៉េះដើម្បីផ្តល់អំណាចឲ្យរដ្ឋាភិបាលក្នុងការធ្វើចត្តាឡីស័ក ចេញបញ្ជាបិទប្រទេស ក៏ដូចជាដាក់បម្រាមគោចរនៅពេលយប់ផងដែរ។ អ្វីដែលគួរឲ្យកត់សម្គាល់ ការដាក់ប្រទេសក្នុងស្ថានការណ៍អាសន្នរហូតមកដល់ពេលនេះ ស្របពេលដែលបាតុករជានិស្សិត និងយុវជនចេញបាតុកម្មប្រឆាំងរដ្ឋាភិបាល ទាមទារឲ្យលោកប្រាយុទ្ធចុះចេញពីតំណែង កំណែទម្រង់រដ្ឋធម្មនុញ្ញ និងរបបរាជានិយម។ ក្រុមបាតុករ បានអះអាងថានឹងជួបជុំគ្នាជាថ្មីនៅថ្ងៃទី២៥ វិច្ឆិកាខាងមុខ។

គិតរហូតមកដល់ពេលនេះ ថៃមានករណីឆ្លងចំនួន៣,៩២០ករណី សះស្បើយ៣,៧៦៦ករណី និងស្លាប់ចំនួន៦០នាក់៕