ច្បាប់ / សិទិ្ធមនុស្ស / តុលាការ
ជាតិ
តុលាការបារាំងនឹងបើកសវនាការសំណុំរឿង«បរិហាកេរ្តិ៍» ដែលសម្ដេច ហ៊ុន សែន ប្ដឹងលោក សម រង្ស៊ី នៅឆ្នាំ២០២២
× ភ្នំពេញ៖ តុលាការបារាំង នឹងដំណើការសំណុំរឿង«បរិហាកេរ្តិ៍» របស់ប្រមុខរដ្ឋាភិបាលកម្ពុជា ដែលប្ដឹងលោក សម រង្ស៊ី មេដឹកនាំអតីតគណបក្សសង្គ្រោះជាតិ នៅថ្ងៃទី១ កញ្ញា ឆ្នាំ២០២២ខាងមុខ។ ព័ត៌មាននេះ ត្រូវបានសម្ដេច ហ៊ុន សែន បង្ហើបប្រាប់សាធារជន នៅក្នុងជំនួបសំណេះសំណាលជាមួយក្រុមមេធាវីស្ម័គ្រចិត្តរបស់រដ្ឋាភិបាល នៅព្រឹកថ្ងៃទី២៥ វិច្ឆិកានេះ។
សំណុំរឿង«បរិហាកេរ្តិ៍»នេះ ត្រូវបានមេធាវីរដ្ឋាភិបាល ដាក់ពាក្យប្ដឹងលោក សម រង្ស៊ី កាលពីឆ្នាំ២០១៩មកម្ល៉េះ ក្រោយពីមេដឹកនាំអតីតបក្សប្រឆាំងរូបនេះ បានចោទរដ្ឋាភិបាល ថា សម្លាប់លោក ហុក ឡង់ឌី អតីតអគ្គស្នងការដ្ឋាននគរបាល កាលពីឆ្នាំ២០០៨ រួមទាំងមេសហជីព និងអ្នកសិល្បៈផ្សេងទៀតផងដែរ។
ចំពោះការតវ៉ាក្តីនេះ សម្ដេច ហ៊ុន សែន បានត្រៀមមេធាវីបរទេស៣រូបផងដែរ ដោយមេធាវី១នាក់ សម្ដេច ត្រូវចំណាយថវិកា៤០០អឺរ៉ូ (ប្រមាណ៤៧៦ដុល្លារ) ក្នុងមួយម៉ោង។ ដ្បិតដំណើរការក្តីនៅសល់ពេលវែងឆ្ងាយក្តី ប៉ុន្តែសម្ដេច ហ៊ុន សែន ហាក់ដូចជាមានជំនឿថា សម្ដេច នឹងអាចឈ្នះក្តីនេះ។ សម្ដេច ក៏បានរម្លឹកពីជោគជ័យប្ដឹងកាសែតបារាំងមួយ នៅតុលាការបារាំងកាលពីជាង២០ឆ្នាំមុនផងដែរ។
«ខ្ញុំធ្លាប់ឈ្នះក្តីលើកាសែតបារាំង Le Figaro ដោយឈ្នះក្តីបាន៥០០០០ហ្វ្រង់ កាលពីឆ្នាំ១៩៩៧។ តែគ្រាន់តែខ្ញុំចំណាយលើមេធាវីវិញអស់១២០០០០ហ្វ្រង់ »។ នេះជាការរម្លឹករបស់ប្រមុខរដ្ឋាភិបាលកម្ពុជា ដែលបានបន្ថែមថា បើសម្ដេចឈ្នះក្តីលើលោក សម រង្ស៊ី នោះ គឺសម្ដេចទាសំណងតែ១អឺរ៉ូ (ជាង១ដុល្លារ)តែប៉ុណ្ណោះ។
ក្រោយលើកឡើងបែបនេះហើយ នាយករដ្ឋមន្រ្តី ហ៊ុន សែន ក៏ឆ្លៀតរិះគន់លើដំណើការក្តីរបស់តុលាការបារាំងថា មានភាពយឺតយ៉ាវផងដែរ ។ នោះក៏ព្រោះតែសំណុំរឿងសម្ដេច ដែលប្ដឹងលោក សម រង្ស៊ី តាំងពីឆ្នាំ២០១៩ ប៉ុន្តែតុលាការបារាំងយកទៅដោះស្រាយនៅឆ្នាំ២០២២ទៅវិញ។ ត្រង់ចំណុចនេះប្រមុខរដ្ឋាភិបាលកម្ពុជា ឆ្លៀតផ្លែផ្កាទៀតថា តុលាការបារាំង ក៏ចេះយឺតយ៉ាវក្នុងដំណើរការក្តីដែរ ដូច្នេះមិនគួរណាបរទេសមកបង្ខំតុលាការខ្មែរ ឲ្យពន្លឿនដំណើរការក្តីជនជាប់ចោទតាមចិត្តខ្លួននោះទេ។
កាលពីថ្ងៃទី២ មិថុនា ឆ្នាំ២០១៩ លោក សម រង្ស៊ី បានសរសេរលើហ្វេសប៊ុកថា សម្ដេច ហ៊ុន សែន ជាអ្នកសម្លាប់លោក ហុក ឡង់ឌី តាមរយៈការដាក់គ្រាប់បែកឲ្យផ្ទុះក្នុងឧទ្ធម្ភាគចក្រ (Helicopter) នៅពេលដែលកំពុងតែហោះហើរលើខេត្តស្វាយរៀង កាលពីថ្ងៃទី ០៩ ខែវិច្ឆិកា ឆ្នាំ ២០០៨។ លោក សម រង្ស៊ី ថែមទាំងអះអាងថា សម្ដេច ហ៊ុន សែន បានសម្រេចចិត្តសម្លាប់លោក ហុក ឡង់ឌី ដោយសារតែអតីតស្នងការនគរបាលជាតិរូបនេះ បានដឹងរឿងអាក្រក់របស់សម្ដេច ហ៊ុន សែន ច្រើនពេក។ ជាពិសេសកាលណោះលោក ហុក ឡង់ឌី ត្រៀមលាតត្រដាងអំពីបញ្ជា ដែលគាត់បានទទួលពីសម្ដេច ហ៊ុន សែន ឲ្យសម្លាប់លោក ជា វិជ្ជា អតីតមេដឹកនាំសហជីពដ៏ខ្លាំងក្លាមួយរូប កាលពីឆ្នាំ ២០០៤ជាដើម៕
Tag:
ហ៊ុន សែន
សម រង្ស៊ី
បារាំង
© រក្សាសិទ្ធិដោយ thmeythmey.com