ចិន៖ អាជ្ញាធរក្រុងធានជីន អះអាងថា មានអ្នកឆ្លងកូវីដ-១៩ ពីក្បាលជ្រូកនាំចូល

COVID-19

អន្តរជាតិ

ចិន៖ អាជ្ញាធរក្រុងធានជីន អះអាងថា មានអ្នកឆ្លងកូវីដ-១៩ ពីក្បាលជ្រូកនាំចូល

25, Nov 2020 , 3:46 pm

រូបភាព

មន្រ្តីសុខាភិបាលចិន យកសំណាកពីប្រជាជនចិន ដើម្បីតេស្តរកកូរ៉ូណាវីរុស។ រូបភាព៖ Xinhua

ដោយ: ធៀន ភារិន្ទ

អាជ្ញាធរក្រុងធានជីន (Tianjin) ប្រទេសចិន នៅថ្ងៃទី២៤ ខែវិច្ឆិកា អះអាងថា ករណីកូវីដ-១៩ ចំនួនពីរករណី បានឆ្លងមកពីវីរុសមកពីក្បាលជ្រូកដែលនាំចូលពីទ្វីបអាមេរិកខាងជើង។

ថ្លែងនៅក្នុងសន្និសីទសារព័ត៌មានមួយ លោក Zhang Ying មន្ត្រីនៃមជ្ឈមណ្ឌលទប់ស្កាត់ និងគ្រប់គ្រងជំងឺឆ្លងក្រុងធានជីន បានអះអាងថា អាជ្ញាធរមិន បានធ្វើតេស្តលើក្បាលជ្រូកក្លាសេឡើយ ក្នុងពេលនាំចូលដំបូង។ ប៉ុន្តែនៅពេលអាជ្ញាធរបានធ្វើតេស្តនៅកន្លែងជញ្ជូនក្បាលជ្រូកចេញពីឃ្លាំងក្លាសេ ក៏បានរកឃើញថា មានកូវីដ-១៩ ។ ក្បាលជ្រូកទាំងនេះ ត្រូវបាននាំចូលពីទ្វីបអាមេរិកខាងជើង។

សំណាកមានលទ្ធផលវិជ្ជមាននេះ គឺដូចគ្នានឹងសំណាក់ករណីផ្ទុកកូវីដ-១៩ ចំនួនពីរករណី ដែលបានកើតឡើងនៅក្នុងទីក្រុងធានជីនកន្លងមក។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។

ថ្មីៗនេះ អាជ្ញាធរចិន ប្រកាសថា នឹងធ្វើតេស្តនៅឃ្លាំងក្លាសេ និងបុគ្គលិក នៅកន្លែងមួយចំនួន បន្ទាប់ពីមានករណីឆ្លងកើតឡើងលើបុគ្គលិកម្នាក់ធ្វើការនៅក្នុងឃ្លាំងក្លាសេសាច់ជ្រូកដែលនាំចូលមកពីអាល្លឺម៉ង់។ ទាក់ទិននឹងបញ្ហានេះ អាជ្ញាធរចិននៅតែអះអាងថា ខ្លួននៅតែបន្តរកឃើញកូរ៉ូណាវីរុសនៅក្នុងសាច់នាំចូល និងកញ្ចប់ទំនិញ។

គិតមកត្រឹមថ្ងៃនេះ ចិន មានករណីឆ្លងកូវីដ-១៩ សរុបចំនួន ៨៦៤៦៩ករណី និងអ្នកស្លាប់មានចំនួន ៤៦៣៤នាក់។ ចំណែកអ្នកជាសះស្បើយមានចំនួន ៨១៥៣០ករណី៕