ក្រសួងសម្រេចព្យួរអាជ្ញាបណ្ណចំនួន៣ របស់ក្រុមហ៊ុនអ៊ីនធឺណិត Chuan Wei

ជាតិ

ក្រសួងសម្រេចព្យួរអាជ្ញាបណ្ណចំនួន៣ របស់ក្រុមហ៊ុនអ៊ីនធឺណិត Chuan Wei

25, Nov 2020 , 9:59 pm

រូបភាព

លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ ដឹកនាំកិច្ចប្រជុំ ស្តីពីការរៀបចំក្របខណ្ឌគោលនយោបាយរដ្ឋាភិបាលឌីជីថលកម្ពុជា កាលពីថ្ងៃទី២២ ខែកក្កដា ឆ្នាំ២០២០។ រូបពីក្រសួងប្រៃសណីយ៍

ដោយ: ឡាយ សុភាវតី

ភ្នំពេញ៖ ក្រសួងប្រៃសណីយ៍និងទូរគមនាគមន៍ សម្រេចលុបអាជ្ញាបណ្ណចំនួន៣ របស់ក្រុមហ៊ុនអ៊ីនធឺណិតមួយឈ្មោះ Chuan Wei(Cambodia) Co.,Ltd ដោយសារជាប់បំណុលរដ្ឋ។

សេចក្ដីប្រកាសព័ត៌មានរបស់ក្រសួងប្រៃសណីយ៍បានបញ្ជាក់ អាជ្ញាបណ្ណទាំង៣ មានសេវាសំឡេងតាមរយៈពិធីការអ៊ីនធឺណិត, អាជ្ញាបណ្ណសេវាទូរសព្ទចល័ត៤G និងអាជ្ញាបណ្ណសេវាបណ្ដាញខ្សែកាប្លិ៍អុបទិកក្រោមបាតសមុទ្រ។ ដោយឡែក អាជ្ញាបណ្ណសេវាអ៊ីនធឺណេត(ISP) ក្រសួងនឹងរក្សាទុកឲ្យក្រុមហ៊ុនមួយនេះ បន្តធ្វើអាជីវកម្មដដែល ប្រសិនបើក្រុមហ៊ុនសងបំណុលដែលជំពាក់រដ្ឋ។

កន្លងមកក្រសួងប្រៃសណីយ៍បានលុបនិងព្យួរអាជ្ញាបណ្ណរបស់ប្រតិបបត្តិករទូរគមនាគមន៍១៧ក្រុមហ៊ុនហើយ ដោយសារគេចវេះមិនអនុវត្តតាមច្បាប់, មិនគោរពតាមលក្ខខណ្ឌនៃអាជ្ញាបណ្ណ ,មិនប្រតិបត្តិការ ,មិនផ្ដល់ឯកសារហិរញ្ញវត្ថុនិងបច្ចេកទេស និងមិនបង់ចំណូលជូនរដ្ឋជាដើម។ ជាមួយគ្នាដែរ ក្រសួងបានបញ្ជាក់ថា ក្រុមការងារជំនាញនឹងចុះចាត់វិធានការលុបនិងព្យួរអាជ្ញាបណ្ណរបស់ប្រតិបត្តិករទូរគមនាគមន៍ទាំងឡាយណា ដែលមានបំណងចង់គេចវេះនិងមិនអនុវត្តតាមច្បាប់បន្តទៀត៕

អត្ថបទទាក់ទង

ក្រុមហ៊ុនអ៊ីនធឺណិតចំនួន១៧ ត្រូវលុបចោលនិងព្យួរអាជ្ញាបណ្ណ