អន្តរជាតិ
កូរ៉េខាងត្បូងនិងចិន ប្តេជ្ញាសហការជាមួយគ្នាបន្ថែមទៀតលើបញ្ហាកូរ៉េខាងជើង និងកូវីដ-១៩
លោកវ៉ាង យី រដ្ឋមន្រ្តីការបរទេសចិន (ខាងឆ្វេង) ជាមួយសមភាគីកូរ៉េខាងត្បូង លោកស្រី Kang Kyung-wha នាទីក្រុងសេអ៊ូល នៅថ្ងៃទី២៦ ខែវិច្ឆិកា ឆ្នាំ២០២០។ រូបភាព៖ EPA-EFE
×![]()
ដោយ: ធៀន ភារិន្ទ
ប្រមុខការទូតកូរ៉េខាងត្បូង លោកស្រី កាង ឃ្យុងវ៉ា និងសមភាគីចិន លោក វ៉ាង យី នៅថ្ងៃទី២៦ ខែវិច្ឆិកា បានសន្យាសហការជាមួយគ្នាបន្ថែមទៀត ដើម្បីពង្រឹងទំនាក់ទំនងទ្វេភាគី ដើម្បីដោះស្រាយបញ្ហាកូរ៉េខាងជើង និងបញ្ហាសកលដូចជា កូវីដ-១៩ ជាដើម។ 
ប្រមុខការទូតចិន លោកវ៉ាង យី បានទៅដល់កូរ៉េខាងត្បូង នៅថ្ងៃទី២៥ ខែវិច្ឆិកា បន្ទាប់ពីចាកចេញពីជប៉ុន។ ក្នុងដំណើរទស្សនកិច្ចនេះ លោកវ៉ាង និងសមភាគីកូរ៉េខាងត្បូង លោកស្រី កាង ឃ្យុងវ៉ា បានជជែកគ្នាលើបញ្ហាជាច្រើន ក្នុងនោះមានដូចជាបញ្ហាតំបន់ កូវីដ-១៩ សេដ្ឋកិច្ច និងពង្រឹងទំនាក់ទំនងទ្វេភាគី។
លោក វ៉ាង បានអះអាងថា ដំណើរទស្សនកិច្ចរបស់លោក បង្ហាញពីសារៈសំខាន់នៃទំនាក់ទំនងទ្វេភាគី ក៏ដូចជាសហប្រតិបត្តិការរវាងប្រទេសទាំងពីរ ដែលអាចចាត់ទុកបានជា «ដៃគូយុទ្ធសាស្ត្រ» ក្នុងការការពារស្ថិរភាព និងសន្តិភាពនៅក្នុងតំបន់។ «វិបត្តិកូវីដ-១៩ មិនអាចយកឈ្នះលើប្រជាជននៃប្រទេសទាំងពីរបានទេ»។ លោកវ៉ាង បានបន្តបែបនេះ ដោយពន្យល់ទៀតថា ទំនាក់ទំនងទ្វេភាគីកូរ៉េខាងត្បូង និងចិន អាចយកឈ្នះលើកូវីដ-១៩ ហើយបង្ហាញពីកម្លាំង និងថាមពលបន្ថែមទៀត។
ជាការឆ្លើយតបនឹងប្រមុខការទូតចិន លោកស្រី កាង បានសម្តែងសេចក្តីអរគុណចំពោះដំណើរទស្សនកិច្ច ក្នុងវិបត្តិកូវីដ-១៩ ហើយ សង្ឃឹមថា ការផ្តោះប្តូរគំនិត ឬយោបល់រវាងប្រទេសទាំងពីរ នឹងពង្រឹងកិច្ចសហប្រតិបត្តិការបន្ថែមទៀត ជាពិសេសបញ្ហាកូរ៉េខាងជើង, ជំងឺរាតត្បាតសកល និងការស្តារសេដ្ឋកិច្ចឡើងវិញជាដើម។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្នុងជំនួបដដែលនេះ លោកស្រីប្រមុខការទូតកូរ៉េខាងត្បូង បានបន្តទៀតថា កូរ៉េខាងត្បូង ក៏កំពុងរកមើលកិច្ចចរចាបន្ថែមទៀតផងដែរ ដើម្បីធ្វើឲ្យឧបទ្វីបកូរ៉េមានស្ថិរភាព និងអាចកសាងសន្តិភាពបានរៀងរហូត។
ក្រៅពីបញ្ហាខាងលើ ជំនួបរវាងរដ្ឋមន្ត្រីការបរទេសចិន និងកូរ៉េខាងត្បូងនេះ ក៏មានរបៀបវារៈស្តីពីដំណើរទស្សនកិច្ចរបស់ប្រធានាធិបតីចិន លោក ស៊ី ជិនភីង ទៅកូរ៉េខាងត្បូងផងដែរ ដើម្បីចូលរួមក្នុងកិច្ចប្រជុំត្រីភាគី កូរ៉េខាងត្បូង ចិន និងជប៉ុន មុនដំណាច់ឆ្នាំ២០២០។ យ៉ាងណាមិញ លោក វ៉ាង បានបញ្ជាក់ប្រាប់អ្នកសារព័ត៌មានថា ប្រធានាធិបតីចិន អាចធ្វើទស្សនកិច្ចទៅកូរ៉េខាងត្បូងបាន ទាល់តែស្ថានភាពកូវីដ-១៩ ស្ថិតនៅក្រោមការគ្រប់គ្រងរបស់រដ្ឋាភិបាលទីក្រុងសេអ៊ូល។
សូមបញ្ជាក់ថា បន្ទាប់ពីជំនួបជាមួយប្រមុខការទូតកូរ៉េខាងត្បូង លោក វ៉ាង ត្រូវមានជំនួបជាមួយប្រធានាធិបតីកូរ៉េខាងត្បូង លោក មូន ចេអ៊ីន បន្តទៀត ដើម្បីជជែកឲ្យបានស៊ីជម្រៅលើបញ្ហាមួយចំនួន៕
Tag:
កូរ៉េខាងត្បូង
ចិន
© រក្សាសិទ្ធិដោយ thmeythmey.com
