ក្លិបកោះកុងរំពឹងវត្តមានលោក ហុក សុជីវ័ន ជួយចម្លងយុវជនឲ្យឈានរកកម្រិតអាជីពកាន់តែច្រើន

កីឡាជាតិ

ជាតិ

ក្លិបកោះកុងរំពឹងវត្តមានលោក ហុក សុជីវ័ន ជួយចម្លងយុវជនឲ្យឈានរកកម្រិតអាជីពកាន់តែច្រើន

08, Dec 2020 , 1:11 pm

រូបភាព

លោក_ហុក_សុជីវ័ន_ត្រូវបានតែងតាំងឲ្យធ្វើជានាយកបច្ចេកក្លិបបាល់ទាត់ខេត្តកោះកុង

ដោយ:

លោក ហុក សុជីវ័ន អតីតគ្រូបង្វឹកក្លិបបាល់ទាត់វិសាខា ត្រូវបានតែងតាំងឲ្យធ្វើជានាយកបច្ចេកទេសក្លិបបាល់ទាត់ខេត្តកោះកុង។ ថ្នាក់ដឹកនាំក្លិបនេះ បានបង្ហាញអារម្មណ៍រំភើបរីយរាយចំពោះវត្តមានរបស់លោក សុជីវ័ន ហើយរំពឹងថា លោកនឹងជួយអភិវឌ្ឍក្លិបឲ្យកាន់តែមានភាពរីកចម្រើន និងឈានទៅរកកម្រិតអាជីព។

ក្លិបបាល់ទាត់ខេត្តកោះកុងនៅថ្ងៃទី៨ ខែធ្នូ ឆ្នាំ២០២០ នេះ បានប្រកាសនៅលើទំព័រហ្វេសប៊ុកផ្លូវការរបស់ខ្លួន ស្តីពីការតែងតាំងលោក ហុក សុជីវ័ន ជានាយកបច្ចេកទេសក្លិប។ ក្រៅពីកិច្ចការងារបច្ចេកទេស អតីតគ្រូបង្វឹកក្លិបបាល់ទាត់វិសាខារូបនេះ ក៏មានតួនាទីជួយជ្រើសរើស និងអភិវឌ្ឍន៍កីឡាករយុវជនរបស់ក្លិបផងដែរ។

លោក សូ សំណាង អគ្គលេខាធិការក្លិបបាល់ទាត់ខេត្តកោះកុងបានលើកឡើងថា មូលហេតុដែលក្លិបជ្រើសរើសលោក ហុក សុជីវ័ន ឲ្យធ្វើជានាយកបច្ចេកទេសមានសមត្ថភាព និងពោរពេញដោយបទពិសោធន៍ក្នុងវិស័យមួយនេះ ដ្បិតលោកបានអភិវឌ្ឍន៍ខ្លួនតាំងពីកីឡាកររហូតដល់គ្រូបង្វឹក។ ម្យ៉ាងទៀត ក្លិបមានទស្សនៈវិស័យចង់អភិវឌ្ឍន៍ធនធានបាល់ទាត់ក្នុងខេត្តកោះកុងឲ្យកាន់តែសម្បូរបែប។

ទន្ទឹមនឹងបង្ហាញអារម្មណ៍រីករាយជាមួយវត្តមានលោក ហុក សុជីវ័ន អគ្គលេខាធិការខាងលើរំពឹងថា វត្តមានរបស់អតីតគ្រូបង្វឹកក្លិបបាល់ទាត់វិសាខារូបនេះនឹងជួយអភិវឌ្ឍន៍វិស័យកីឡាបាល់ទាត់ក្នុងខេត្តកោះកុងឲ្យកាន់តែរីកចម្រើនថែមទៀត។ ជាពិសេសអាចជួយសម្រេចគោលបំណងរបស់ក្លិប ដែលដាក់គោលដៅឈានដល់វគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រក្នុងពានរង្វាន់សម្តេច ហ៊ុន សែន ថ្នាក់ខេត្ត។

លោករំពឹងផងដែរថា លោក ហុក សុជីវ័ន នឹងក្លាយជាចលករក្នុងការជំរុញឲ្យកីឡាករយុវជនក្នុងក្លិបខេត្តកោះកុងឲ្យយល់កាន់តែច្បាស់ពីកីឡាករកម្រិតអាជីព។ មួយវិញទៀត លោក សង្ឃឹមថា លោក សុជីវ័ន នឹងធ្វើស្ពានក្នុងការចម្លងកីឡាករយុវជនរបស់ខេត្តកោះកុងឲ្យឈានទៅប្រកបអាជីពជាមួយក្លិបធំៗក្នុងក្របខណ្ឌមិត្តហ្វូនខេមបូឌានលីគកាន់តែច្រើន។

គួររំលឹកថា លោក ហុក សុជីវ័ន ត្រូវបានក្លិបបាល់ទាត់វិសាខាបញ្ចប់កិច្ចសន្យានៅពាក់កណ្តាលរដូវកាលឆ្នាំ២០១៩ ក្រោយលោកដឹកនាំក្លិបនេះបញ្ចប់ក្នុងចំណាត់ថ្នាក់លេខ៥ ក្រោយចប់ជើងទី១។ លោក បានជួយឲ្យក្លិបនេះឈ្នះកៅអីឡើងទៅលេងលីគកំពូលនៅឆ្នាំ២០១៨ ក្រោយឈ្នះជើងឯកលីគទី២ឆ្នាំ២០១៧។ នៅឆ្នាំ២០១៨ លោក បានដឹកនាំវិសាខាបញ្ចប់ចំណាត់ថ្នាក់លេខ៣ក្នុងពានរង្វាន់លីគកំពូល៕