កីឡាជាតិ
ជាតិ
ក្រោយចូលដឹកនាំក្លិបកោះកុងលោក ហុក សុជីវ័ន សង្កេតឃើញកីឡាករមានការផ្លាស់ប្តូរច្រើន
× ក្រោយចូលកាន់តួនាទីជានាយកបច្ចេកទេសក្លិបកោះកុងអេហ្វស៊ី បានមួយរយៈ លោក ហុក សុជីវ័ន សង្កេតឃើញថា កីឡាករមានការផ្លាស់ប្តូរច្រើនទាំងវិន័យ និងការហ្វឹកហាត់។ បច្ចុប្បន្ន ក្រុមកោះកុង កំពុងលេងក្នុងក្របខណ្ឌលីគ២ ដែលត្រូវបានផ្អាកដោយសារការឆ្លងរីករាលដាលនៃជំងឺកូវីដ-១៩ ក្នុងសហគមន៍ ត្បិតក្លិបនេះដាក់គោលដៅប្រជែងដណ្តើមជើងឯកក្នុងពានរង្វាន់សម្តេច ហ៊ុន សែន នៅរដូវកាលក្រោយ។
លោក ហុក សុជីវ័ន នាយកបច្ចេកទេសក្លិបបាល់ទាត់កោះកុងអេហ្វស៊ី សង្កេតឃើញកីឡាករក្នុងក្លិបនេះ មានការវិវត្តន៍គួរឲ្យកត់សម្គាល់ក្រោយលោកចូលកាន់តំណែងបានមួយរយៈ ពោលគឺកីឡាករមានការផ្លាស់ប្តូរច្រើនទាំងការគោរពវិន័យ និងការហ្វឹកហាត់។ ការផ្លាស់ប្តូរនេះ កើតឡើងក្រោយ លោក ផ្លាស់ប្តូរទម្លាប់ និងកាលវិភាគហ្វឹកហាត់មួយចំនួនរបស់កីឡាករ។
ទន្ទឹមនឹងបង្ហាញអារម្មណ៍សប្បាយរីករាយជាមួយតំណែងជានាយកបច្ចេកទេសក្លិបកោះកុង អតីតគ្រូបង្វឹកក្លិបបាល់ទាត់វិសាខារូបនេះ បានរៀបរាប់ពីការវិវត្តន៍របស់កីឡាយ៉ាងដូច្នេះថា៖«ខ្ញុំសង្កេតឃើញថា ពួកគាត់មានការផ្លាស់ប្តូរច្រើនទាំងការរៀបចំខ្លួន ការហ្វឹកហាត់ ការគោរពពេលវេលា និងវិន័យ គឺឃើញគាត់ល្អច្រើន ហើយការទៀតសោត គាត់មានការខិតខំប្រឹងប្រែងខ្លាំង»។
អតីតគ្រូបង្វឹកដឹកនាំក្លិបវិសាខាឲ្យឡើងពីលីគ២ទៅលេងនៅក្របខណ្ឌលីគកំពូលរូបនេះ ជឿជាក់ថា ក្រុមកោះកុងអេហ្វស៊ី នឹងអាចសម្រេចតាមផែនការរបស់ខ្លួន បើកីឡាករបន្តរក្សាការខិតខំប្រឹងប្រែងហ្វឹកហាត់ដូចបច្ចុប្បន្ន។ លោក បានបន្ថែមថា គោលបំណងរបស់ក្លិបនៅឆ្នាំក្រោយ គឺករប្រជែងដណ្តើមជើងឯកក្នុងពានរង្វាន់សម្តេច ហ៊ុន សែន ថ្នាក់ខេត្ត និងក្របខណ្ឌលីគ២។
បើតាមលោក សូ សំណាង អគ្គលេខាធិការក្លិបបាល់ទាត់កោះកុងអេហ្វស៊ី ក្លិបពុំទាន់ហ៊ានដាក់គោលដៅខ្ពស់ឈានទៅគ្រងជើងឯកពានសម្តេច ហ៊ុន សែន ឬលីគ២នោះទេ ពោលគឺត្រឹមឈានដល់វគ្គ៨ក្រុមចុងក្រោយ ឬពាក់កណ្តាលផ្តាច់ព្រ័ត្រតែប៉ុណ្ណោះ។ តែយ៉ាងណា លោក មានការជឿជាក់ខ្លាំងលើសមត្ថភាពរបស់លោក ហុក សុជីវ័ន ក្នុងការជួយអភិវឌ្ឍន៍ក្រុមឲ្យកាន់តែមានភាពល្អប្រសើរ។
លោក រំពឹងថា ក្រោមការដឹកនាំ និងរៀបចំរបស់អតីតគ្រូបង្វឹកក្រុមវិសាខាខាងលើនឹងជួយឲ្យវិស័យកីឡាបាល់ទាត់ក្នុងខេត្តកោះកុងកាន់តែមានភាពរីកចម្រើន និងមានយុវជនក្នុងខេត្តនេះកាន់តែច្រើនលេងឲ្យក្លិបអាជីពក្នុងក្របខណ្ឌលីគកំពូលកម្ពុជា ដ្បិតក្លិបសម្រេចជ្រើសរើសលោក ហុក សុជីវ័ន ឲ្យធ្វើជានាយកបច្ចេកទេស ក្នុងគោលបំណងអភិវឌ្ឍន៍ធនធានកីឡាករយុវជន។
លោក ហុក សុជីវ័ន ត្រូវបានតែងតាំងឲ្យធ្វើជានាយកបច្ចេកក្លិបបាល់ទាត់កោះកុងអេហ្វស៊ីកាលពីថ្ងៃទី២ ធ្នូ ឆ្នាំ២០២០។ លោក ត្រូវបានក្លិបបាល់ទាត់វិសាខាបញ្ចប់កិច្ចសន្យាពាក់កណ្តាលរដូវកាលឆ្នាំ២០១៩ ក្រោយដឹកនាំក្លិបបញ្ចប់ក្នុងចំណាត់ថ្នាក់លេខ៥ ក្នុងជើងទី១។ លោក បានជួយឲ្យក្លិបនេះឈ្នះកៅអីឡើងទៅលេងលីគកំពូលនៅឆ្នាំ២០១៨ ក្រោយឈ្នះជើងឯកលីគទី២ឆ្នាំ២០១៧។ នៅឆ្នាំ២០១៨ លោក បានដឹកនាំវិសាខាបញ្ចប់ចំណាត់ថ្នាក់លេខ៣ក្នុងពានរង្វាន់លីគកំពូល៕
Tag:
បាល់ទាត់
ហុក សុជីវ័ន
កោះកុងអេហ្វស៊ី
© រក្សាសិទ្ធិដោយ thmeythmey.com