COVID-19
កីឡាជាតិ
ជាតិ
×![]()
កីឡាករកីឡាការិនីជម្រើសជាតិស្ថិតក្នុងក្រុមមនុស្សអាទិភាព ដែលទទួលបានការចាក់វាំងសាំងការពារជំងឺកូវីដ-១៩ ពីរាជរដ្ឋាភិបាលកម្ពុជា ។ អត្តពលិកអាចនឹងមានពេលគ្រប់គ្រាន់ក្នុងការប្រមូលផ្តុំហ្វឹកហាត់ពង្រឹងបច្ចេកទេសនិងសមត្ថភាព សម្រាប់ត្រៀមការប្រកួតអន្តរជាតិផ្សេងៗ បើពួកគេចាក់វ៉ាក់សាំងការពារជំងឺកូវីដ-១៩ រួចរាល់។ 
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាមានប្រសាសន៍ថា សម្តេចនាយករដ្ឋមន្ត្រី ហ៊ុន សែន បានផ្តល់អាទិភាពដល់កីឡាករកីឡាការិនីជម្រើសជាតិ ក្នុងការទទួលបានការចាក់វ៉ាក់សាំងការពារជំងឺកូវីដ-១៩។ សម្តេច យល់ថា ពួកគេជាក្រុមមនុស្ស ដែលប្រឈមខ្លាំងក្នុងការឆ្លងជំងឺរាតត្បាតមួយនេះ ដ្បិតពួកគេត្រូវហ្វឹកហាត់ជុំគ្នា និងចេញទៅប្រកួតនៅក្រៅប្រទេសជាដើម។ នេះបើតាមការលើកឡើងរបស់លោក វ៉ាត់ ចំរើន។
ក្នុងបទសម្ភាសជាមួយសារព័ត៌មានថ្មីៗតាមសារអេឡិចត្រូនិកលោក វ៉ាត់ ចំរើន បានបញ្ជាក់យ៉ាងដូច្នេះថា៖«វាជាវ៉ាក់សាំងរបស់រាជរដ្ឋាភិបាលយើង ដែល សម្តេច ផ្តល់អាទិភាព(ចាក់វ៉ាក់សាំង)ដល់កីឡាករ ដោយសារកីឡាករកីឡាការិនីជម្រើសជាតិប្រឈមនឹងការងាររបស់ខ្លួន គឺអត់មានពេលហាត់គ្រប់គ្រាន់ អត់បានប្រមូលផ្តុំហ្វឹកហាត់គ្រប់គ្រាន់ដោយសារកូវីដ-១៩»។
សកម្មភាពពេលសម្តេច_ហ៊ុន_សែន_ចូលរួមកម្មវិធីជួបជុំមហាគ្រួសារកីឡាកាលពីពេលកន្លងទៅ
កីឡាករកីឡាការិនីនឹងមានអារម្មណ៍កក់ក្តៅក្នុងការហ្វឹកហាត់ពង្រឹងបច្ចេកទេស និងសមត្ថភាព ដើម្បីត្រៀមការប្រកួតអន្តរជាតិផ្សេងៗ រួមទាំងការប្រកួតកីឡាអូឡាំពិកនៅឆ្នាំក្រោយបើពួកគេទទួលបានការចាក់វ៉ាក់សាំងរួចរាល់។ ព្រោះពួកគេអាចមានពេលហ្វឹកហាត់គ្រប់គ្រាន់ និងប្រមូលផ្តុំហ្វឹកហាត់ជាប់លាប់ ដោយមិនចាំបាច់រំសាយការប្រមូលផ្តុំដូចឆ្នាំនេះ។
«បើគ្នាបានហ្វឹកហាត់ជាប់លាប់ទៅ ធានាក្នុងការប្រកួតបាន។ មួយវិញទៀតនៅឆ្នាំក្រោយ យើងត្រូវចេញទៅប្រកួតកីឡាអូឡាំពិក ប្រកួតអីៗច្រើន អ៊ីចឹងទេបើយើងបាន(ចាក់វ៉ាក់សាំង)មានអារម្មណ៍កក់ក្តៅក្នុងការអភិវឌ្ឍន៍បច្ចេកទេស»។ នេះជាការលើកឡើងរបស់លោក វ៉ាត់ ចំរើន។
ក្រុមកីឡាករជម្រើសជាតិត្រូវបានរំសាយការប្រមូលផ្តុំហ្វឹកហាត់ជាច្រើនលើក ដោយសារការរាតត្បាតនៃជំងឺកូវីដ-១៩។ បញ្ហានេះបានធ្វើឲ្យប៉ះពាល់ដល់ការអភិវឌ្ឍបច្ចេកទេស និងសមត្ថភាពកីឡាករក្នុងការត្រៀមចូលរួមប្រកួតនានា ជាពិសេសការប្រកួតកីឡាស៊ីហ្គេមនៅវៀតណាមឆ្នាំ២០២១ និងស៊ីហ្គេមឆ្នាំ២០២៣ នៅកម្ពុជា។ ព្រោះការរាតត្បាតនេះ បានធ្វើឲ្យកម្ពុជាពន្យាពេលជាច្រើនលើកច្រើនសាក្នុងការបញ្ជូនកីឡាករកីឡាការិនីទៅហ្វឹកហាត់នៅក្រៅប្រទេស៕
Tag:
វ៉ាត់ ចំរើន
កូវីដ-១៩
© រក្សាសិទ្ធិដោយ thmeythmey.com
