ជាតិ
សង្គមជាតិ
កម្ពុជានឹងបន្តចុះត្រជាក់ដល់ថ្ងៃទី២៩ ធ្នូ ហើយខេត្តចំនួនមានភ្លៀងធ្លាក់ រូបភាពពីសហការីនៃសារព័ត៌មានថ្មីៗ២៥
× ភ្នំពេញ៖ ក្រសួងធនធានទឹក និងឧតុនិយមបានព្យាករ ថាភាគខាងជើងនៃកម្ពុជា ចាប់ពីថ្ងៃទី២៣-២៤ ខែធ្នូ នឹងទទួលរងឥទ្ធិពលពីទ្រនុងសម្ពាធខ្ពស់ និងភាគខាងត្បូងនៃកម្ពុជា ទទួលឥទ្ធិពលសម្ពាធទាបសកម្មក្រវាញ លើកទី២៣។ ចាប់ពីថ្ងៃទី២៥-២៩ ខែធ្នូ កម្ពុជាទាំងមូលនឹងទទួលរងឥទ្ធិពលខ្យល់មូសុងឦសានមធ្យម។ ឥទ្ធិពលទាំងនេះនឹងធ្វើឲ្យបណ្តាខេត្តមួយចំនួនមានភ្លៀងធ្លាក់ និងចុះត្រជាក់ដល់១៧អង្សា។
ក្រសួងធនធានទឹក និងឧតុនិយមបានបញ្ជាក់ថា បណ្តាខេត្តនៅតំបន់វាលទំនាបកណ្តាល ចាប់ពីថ្ងៃទី២៣-២៥ ខែធ្នូ នឹងមានភ្លៀងធ្លាក់ក្នុងកម្រិតខ្សោយទៅបង្គួរ និងមានសីតុណ្ហភាពអប្បបរមាពី១៩-២២អង្សា និងសីតុណ្ហភាពអតិបរមាពី២៥-២៨អង្សា។
ចំពោះបណ្តាខេត្ត ជាប់ជួរភ្នំដងរែក និងខ្ពង់រាបឦសានវិញ ចាប់ពីថ្ងៃទី២៣-២៥ ខែធ្នូ នឹងមានភ្លៀងធ្លាក់ក្នុងកម្រិតខ្សោយទៅមធ្យម។ សីតុណ្ហភាពអប្បបរមា ពី១៧-២០អង្សា និងសីតុណ្ហភាពអតិបរមាពី២៤-២៧អង្សា។
ចំណែកបណ្តាខេត្តជាប់តំបន់មាត់សមុទ្រ ចាប់ពីថ្ងៃទី២៣-២៤ ខែធ្នូ នឹងមានភ្លៀងធ្លាក់ក្នុងកម្រិតពីខ្សោយទៅបង្គួរ។ សីតុណ្ហភាពអប្បបរមាពី២០-២៣អង្សា និងសីតុណ្ហភាពអតិបរមាពី២៤-២៨អង្សា។ រួមទាំងនៅលើផ្ទៃសមុទ្រអាចនឹងមានខ្យល់បក់បោកខ្លាំង និងរលកសមុទ្រខ្ពស់ៗ។
ហេតុដូច្នេះក្រសួងធនធានទឹក និងឧតុនិយមអំពាវនាវដល់ពលរដ្ឋជាអ្នកធ្វើដំណើរ និងអ្នកនេសាទទាំងអស់ បង្កើនការប្រុងប្រយ័ត្នខ្ពស់ចំពោះខ្យល់បក់បោក និងរលកសមុទ្រខ្ពស់ៗ៕
© រក្សាសិទ្ធិដោយ thmeythmey.com