COVID-19
ជាតិ
ចាប់តាំងពីដើមឆ្នាំមក មនុស្សជាង៦០០០នាក់ហើយដែលបានឡើងភ្នំឱរ៉ាល់
× វិបត្តិកូវីដ-១៩ បានធ្វើឲ្យវិស័យទេសចរណ៍កម្ពុជាធ្លាក់ចុះ ពិសេសភ្ញៀវទេសចរបរទេស។ ទោះបីជាយ៉ាងនោះក្ដី លំហូរទេសចរឡើងភ្នំឱរ៉ាល់ ដែលជាភ្នំខ្ពស់ជាងគេនៅកម្ពុជា មានជាង៦ពាន់នាក់ គិតត្រឹមថ្ងៃទី ២១ ធ្នូនេះ។ ចំនួននេះច្រើនជាងឆ្នាំ២០១៩ ជិត១,៥០០នាក់ឯណោះ។ នេះបើតាមលោក ឈឺន ឈីម មគ្គុទេ្ទសក៍ទេសចរនាំភ្ញៀវភ្នំឱរ៉ាល់។
គិតមកដល់ថ្ងៃទី២១ ខែធ្នូ ឆ្នាំ២០២០នេះ ភ្ញៀវទេសចរដែលបានទៅឡើងភ្នំឱរ៉ាល់មានចំនួន៦,០១៤នាក់ ក្នុងនោះមានទេសចរអន្តរជាតិ មានត្រឹម២០ភាគរយប៉ុណ្ណោះ។ បើតាមលោក ឈឺន ឈីម មគ្គុទេ្ទសក៍ទេសចរ នាំភ្ញៀវភ្នំឱរ៉ាល់ បានប្រាប់ThmeyThmey25 ដូច្នេះថា៖«ក្នុងឆ្នាំ២០២០នេះ បើទោះបីជាមានបញ្ហាវិបត្តិកូវីដ-១៩ និងគ្រោះទឹកជំនន់ពិតមែន តែភ្នំឱរ៉ាល់ មិនថយភ្ញៀវទេសចរទេ តែកើនលើសឆ្នាំ២០១៩ ជាង១ពាន់នាក់»។
នៅឆ្នាំ២០១៨ មានភ្ញៀវទេសចរទៅឡើងភ្នំឱរ៉ាល់ចំនួន ៣៣៥០នាក់ ក្នុងនោះមានទេសចរបរទេស៥០ភាគរយ។ ចំណែកឯឆ្នាំ២០១៩ មានភ្ញៀវទេសចរចំនួន៤៥៣០នាក់ មានបរទេស៣០ភាគរយ។ រហូតមកដល់ឆ្នាំ២០២០នេះ ភ្ញៀវទេសចរ កើនបានចំនួន៦០១៤នាក់ តែមានភ្ញៀវអន្តរជាតិត្រឹម២០ភាគរយប៉ុណ្ណោះ។ នេះបើតាមលោក ឈឺន ឈីម មគ្គុទេ្ទសក៍ទេសចរនាំភ្ញៀវភ្នំឱរ៉ាល់។
មគ្គុទេ្ទសក៍ទេសចររូបនេះ បញ្ជាក់ដូច្នេះថា ភ្នំឱរ៉ាល់ជាភ្នំមានកម្ពស់ខ្ពស់ជាងគេ ដូច្នេះអ្នកដែលមកឡើងភ្នំនេះ អាចទស្សនាទេសភាពធម្មជាតិស្អាតៗជាច្រើនកន្លែង នៅតាមផ្លូវឡើង និងនៅលើកំពូលភ្នំ។ លោក ឈីមបន្តថា ភ្ញៀវទេសចរដែលចង់ទៅឡើងភ្នំឱរ៉ាល់ គួរទៅនៅចន្លោះចាប់ខែមករា ដល់ខែមីនា ព្រោះអាកាសធាតុមិនសូវត្រជាក់ខ្លាំងនៅលើកំពូលភ្នំ។
ចំណែកឯចន្លោះពីខែមេសា ដល់ខែមិថុនា ជារដូវភ្លៀង ដូច្នេះពិបាកក្នុងការធ្វើដំណើរឡើងភ្នំបន្តិច។ រីឯចន្លោះពីខែកក្កដា ដល់ខែតុលា ក៏ជារដូវកាលសមស្របសម្រាប់ទេសចរផងដែរ។ ដោយឡែកសម្រាប់វិច្ឆិកា និងខែធ្នូ អាកាសធាតុត្រជាក់ខ្លាំង អាចពិបាកបន្តិចនៅពេលទៅដល់កំពូលភ្នំ។ លោក ឈីម លើកទឹកចិត្តទេសចរឲ្យចំណាយពេលយ៉ាងហោចណាស់៣-៤ថ្ងៃ ដើម្បីកម្សាន្តនៅភ្នំឱរ៉ាល់ ព្រោះមានកន្លែងជាច្រើននៅទីនោះដែលទេសចរមិនគួររំលង៕
Tag:
ភ្នំឱរ៉ាល់
ឈឺន ឈីម
© រក្សាសិទ្ធិដោយ thmeythmey.com