ការធ្វេសប្រហែសរួមផ្សំជាមួយការមើលស្រាលសមត្ថភាពដៃគូ ជាមូលហេតុនៃការបរាជ័យរបស់កីឡាករ ចាន់ រតនា ក្រោមថ្វីដៃកីឡាករចិន Xie Wei នាការប្រកួតគុនចម្រុះក្នុងព្រឹត្តិការណ៍ ONE: Collision Course នៅប្រទេសសិង្ហបុរី។ ប៉ុន្តែវាជាបទពិសោធន៍មួយសម្រាប់ រតនា ដើម្បីអភិវឌ្ឍន៍ខ្លួនក្នុងការត្រៀមដណ្តើមយកជ័យជម្នះនៅលើកក្រោយៗទៀត។
អ្នកលេងគុនចម្រុះជួរមុខរបស់កម្ពុជាកីឡាករ ចាន់ រតនា បានប្រាប់ពីមូលហេតុដែលធ្វើឲ្យរូបគេប្រកួតចាញ់កីឡាករ Xie Wei ក្នុងទឺកទី៣ នាការប្រកួតគុនចម្រុះក្នុងព្រឹត្តិការណ៍ ONE: Collision Course។ រតនា អះអាងថា ការមើលស្រាលសមត្ថភាពគូប្រកួតក្រោយស្ទាប់ស្ទង់ដឹងពីកម្រិតសមត្ថភាព និងការធ្វេសប្រហែសជាបញ្ហាចម្បងនៃការបរាជ័យរបស់ខ្លួន។
ទូតសុច្ឆន្ទៈក្រុមហ៊ុនសែលកាតរូបនេះ ប្រាប់ពីមូលហេតុ ដែលធ្វើឲ្យខ្លួនបរាជ័យយ៉ាងដូច្នេះថា៖«បន្ទាប់ពីខ្ញុំស្ទង់ដឹងសមត្ថភាពរបស់ដៃគូពីរទឹករួចមក ខ្ញុំអាចយល់ពីសមត្ថភាពរបស់ដៃគូ។ ខ្ញុំដូចជាមើលស្រាលដៃគូនៅទឹក៣ ហើយក៏មិនសូវប្រុងប្រយ័ត្ន ដែលត្រូវដៃគូវ៉ៃដៃឆ្វេងត្រូវ។ នេះជាមេរៀនមួយដែលខ្ញុំត្រូវប្រុងប្រយ័ត្នទៅថ្ងៃក្រោយ»។
ក្រោយបរាជ័យក្រោមថ្វីដៃកីឡាករចិន Xie Wei ដោយអាជ្ញាកណ្តាលបញ្ឈប់ក្នុងទឹកទី៣ កីឡាករ ចាន់ រតនា បានសរសេរសារលើទំព័រហ្វេសប៊ុកផ្លូវការ សុំទោសប្រជាពលរដ្ឋកម្ពុជា ចំពោះកំហុស ដែលខ្លួនមិនអាចស្វែងរកជ័យជម្នះពីព្រឹត្តិការណ៍ដ៏ធំប្រចាំតំបន់អាស៊ីជូនប្រទេសជាតិ។ សម្រាប់ប្រជាពលរដ្ឋកម្ពុជា ជាពិសេសអ្នកគាំទ្រកីឡាមិនត្រឹមតែមិនខឹងនោះទេ ថែមទាំងផ្ញើសារលើកទឹកចិត្តកីឡាករ ចាន់ រតនា កុំឲ្យបាក់ទឹកចិត្ត និងបន្តការខិតខំប្រែងរបស់ខ្លួនបន្ថែមទៀត។
សារលើកទឹកចិត្តពីអ្នកគាំទ្រ បានក្លាយជាចលករជួយជំរុញឲ្យកីឡាករវ័យ៣៤ឆ្នាំរូបនេះ មានទឹកចិត្តកាន់តែខ្លាំងថែមទៀតក្នុងការអភិវឌ្ឍសមត្ថភាព។ ម្ចាស់ក្លិបក្បាច់គុន«សិល្បៈ»រូបនេះបានបង្ហាញការតាំងចិត្តយ៉ាងមុតមាំថា រូបគេនឹងប្រឹងប្រែងអភិវឌ្ឍន៍សមត្ថភាព ដើម្បីស្វែងរកជ័យជម្នះក្នុងការប្រកួតក្រោយៗ។
កីឡាករ ចាន់ រតនា បានបង្ហាញពីអារម្មណ៍យ៉ាងដូច្នេះថា៖«ខ្ញុំមានអារម្មណ៍សប្បាយចិត្ត និងមានកម្លាំងចិត្តដើម្បីខិតខំប្រឹងប្រែងបន្តទៀត។ ខ្ញុំតាំងចិត្តធ្វើឲ្យបានល្អលើសមុន ព្រោះមិនចង់ឲ្យបងប្អូនខកបំណង។ ខ្ញុំសូមអរគុណច្រើនដល់បងប្អូនទាំងអស់ដែលបានឧបត្ថម្ភគាំទ្រ និងលើកទឹកចិត្ត។ ខ្ញុំពិតជាត្រេកអរដែលនៅតែគាំទ្រខ្ញុំ ទោះជាខ្ញុំចាញ់ក៏ដោយ»។
នាការប្រកួតគុនចម្រុះក្នុងព្រឹត្តិការណ៍ ONE: Collision Course នៅកីឡដ្ឋាន Singapore Stadium នៅប្រទេសសិង្ហបុរី កាលពីថ្ងៃទី១៨ ខែធ្នូ ឆ្នាំ២០២០ កីឡាករ ចាន់ រតនា ត្រូវបានអាជ្ញាកណ្តាលបញ្ឈប់ការប្រកួតត្រឹមទឹកទី៣ ក្រោយកីឡាករចិន Xie Wei ជិះពីលើ ហើយវាយឲ្យបាត់បង់ការគ្រប់គ្រង។
នេះជាលើកទី៣ហើយដែលរូបគេបានបរាជ័យក្រោមថ្វីដៃកីឡាករចិន បន្ទាប់ពីរូបគេបានប្រកួតកីឡាករ Ma Haobin ដោយពិន្ទុក្នុងព្រឹត្តិការណ៍ ONE: Heroes of the World នៅកោះម៉ាកាវប្រទេសចិន កាលពីឆ្នាំ២០១៦ និងចាញ់កីឡាករ Xei Bin ក្នុងទឹកទី២នាព្រឹត្តិការណ៍ ONE: Kings of Destiny នៅទីក្រុងម៉ានីល ប្រទេសហ្វីលីពីន កាលពីឆ្នាំ២០១៧៕