COVID-19
អន្តរជាតិ
សិង្ហបុរី រកឃើញកូវីដ-១៩ទម្រង់ថ្មី១ករណី ដែលជានិស្សិតខ្លូនរៀននៅអង់គ្លេស ពលរដ្ឋសិង្ហបុរី ដែលធ្វើដំណើរពីក្រុង ឡុងដ៍ប្រទេស អង់គ្លេស នៅព្រលានយន្តហោះអន្តរជាតិមួយ កាលពីថ្ងៃទី ២២ ខែធ្នូ ។ រូបពី Straits Times
× សិង្ហបុរី បានរកឃើញកូវីដ-១៩ទម្រង់ថ្មីមួយករណីដំបូង ដែលកំពុងរាលដាលក្នុងចក្រភពអង់គ្លេស។ បើតាមក្រសួងសុខាភិបាលសិង្ហបុរី នៅថ្ងៃទី ២៣ ខែធ្នូ អ្នកជំងឺ គឺជាសិស្សស្រី ដែលបន្តការសិក្សានៅអង់គ្លេសតាំងពីខែសីហា។
សិស្សស្រីអាយុ ១៧ឆ្នាំ បានត្រលប់ទៅកាន់ប្រទេសសិង្ហបុរី នៅថ្ងៃទី ៦ ខែធ្នូ ហើយបានធ្វើចត្តាឡីស័កនៅកន្លែងដែលរដ្ឋរៀបចំ។ បើតាមក្រសួងសុខាភិបាលសិង្ហបុរី អ្នកដំណើររូបនេះ មានអាការៈក្តៅខ្លួន នៅថ្ងៃទី ៧ ខែធ្នូ ហើយបានរកឃើញថាឆ្លងកូវីដ-១៩ មួយថ្ងៃបន្ទាប់។ នាងក៏ត្រូវរាប់បញ្ចូលក្នុងករណីនាំចូល ដែលបានរាយការណ៍នៅថ្ងៃដដែលនោះផងដែរ។
«អ្នកដែលបានប៉ះពាល់ផ្ទាល់ជាមួយនាង ត្រូវបានដាក់ធ្វើចត្តាឡីស័ក ហើយមានលទ្ធផលតេស្តអវិជ្ជមានកូវីដ-១៩ នៅថ្ងៃបញ្ចប់នៃការធ្វើចត្តាឡីស័ករបស់ពួកគេ»។ ក្រសួងសុខាភិបាលសិង្ហបុរី បញ្ជាក់បែបនេះ ដែលដកស្រង់ចុះផ្សាយដោយទូរទស្សន៍ CNA ។
ក្រសួងសិង្ហបុរី លើកឡើងទៀតថា បច្ចុប្បន្ន ពុំទាន់មានភស្តុតាងណាបញ្ជាក់ថា ទម្រង់ថ្មីដែលកើតចេញពីការបំប្លែងខ្លួនរបស់ជំងឺកូវីដ-១៩ ដែលហៅថាB117 កំពុងឆ្លងរាលដាលក្នុងសហគមន៍សិង្ហបុរីឡើយ។
ការរកឃើញកូវីដ-១៩ទម្រង់ថ្មីមួយករណីនេះ គឺក្រោយពីមន្ទីរពិសោធន៍សុខភាពសាធារណៈជាតិរបស់សិង្ហបុរី បានពិនិត្យមើលបែបវិទ្យាសាស្ត្រទៅលើអ្នកជំងឺកូវីដ-១៩ ដែលបានធ្វើដំណើរពីអឺរ៉ុបកាលពីថ្មីៗនេះ។ ករណីនាំចូលពីអឺរ៉ុបសរុប៣១ករណី ដែលមកដល់សិង្ហបុរីចន្លោះថ្ងៃទី ១៧ ខែវិច្ឆិកា និងថ្ងៃទី ១៧ ខែធ្នូ ត្រូវបានរកឃើញថា ឆ្លងកូវីដ-១៩ ក្នុងខែធ្នូ។ ករណីនិស្សិតស្រី ក៏ស្ថិតក្នុងបញ្ជីនេះផងដែរ។ ក្នុងចំណោមអ្នកជំងឺ៣០សេសសល់ ១២នាក់អត់ឆ្លងកូវីដ-១៩ទម្រង់ថ្មីឡើយ។
ដើម្បីកាត់បន្ថយហានិភ័យឆ្លងរាលដាលកូវីដ-១៩ទម្រង់ថ្មីនេះ រដ្ឋាភិបាលសិង្ហបុរី បានបិទព្រំដែនជាមួយអង់គ្លេស ចាប់ពីថ្ងៃទី២៤ ខែធ្នូតទៅ។ ការសម្រេចចិត្តនេះ ធ្វើឡើងក្រោយមានរបាយការណ៍ថា អ្នកវិទ្យាសាស្ត្រអង់គ្លេស បានរកឃើញវត្តមានទម្រង់ថ្មីរបស់ជំងឺកូវីដ-១៩ ក្នុងខ្លួនអ្នកជំងឺម្នាក់ កាលពីខែកញ្ញា កន្លងទៅ ហើយនាយករដ្ឋមន្ត្រី អង់គ្លេស បូរីស ចនសុន បង្ហាញថា ទម្រង់ថ្មីនៃកូវីដ-១៩ មានល្បឿនឆ្លងលឿនជាងទម្រង់ចាស់រហូតដល់៧០ភាគរយ។
យ៉ាងណាមិញ អង្គការសុខភាពពិភពលោក (WHO) អះអាងថា ទម្រង់ថ្មីរបស់ជំងឺកូវីដ-១៩ ដែលកើតមាននៅក្នុងចក្រភពអង់គ្លេស ជាផ្នែកធម្មតានៃការវិវត្តរបស់ជំងឺរាតត្បាតសកលមួយ។ ទន្ទឹមនេះ WHO ថា មិនទាន់មានភស្តុតាងណាបញ្ជាក់ទម្រង់ថ្មីរបស់កូវីដ-១៩នេះធ្វើឲ្យជំងឺនេះកាន់តែធ្ងន់ធ្ងរ ឬធន់នឹងវ៉ាក់សាំងដែលមាននៅពេលបច្ចុប្បន្នឡើយ៕
Tag:
សិង្ហបុរី
កូវីដ-១៩
© រក្សាសិទ្ធិដោយ thmeythmey.com