COVID-19
ជាតិ
សម្ដេច ហ៊ុន សែន ប្រាប់ពលរដ្ឋឲ្យប្រារព្ធគ្រីស្ទម៉ាស ដោយការប្រយ័ត្នខ្ពស់ក្នុងវិបត្តិកូវីដ-១៩
× ភ្នំពេញ៖ សម្ដេច ហ៊ុន សែន ប្រាប់ពលរដ្ឋឲ្យប្រារព្ធគ្រីស្ទម៉ាស ដោយការប្រយ័ត្នខ្ពស់ក្នុងវិបត្តិកូវីដ-១៩។ថ្ងៃទី២៥ ខែធ្នូ នេះ ជាថ្ងៃបុណ្យគ្រីស្ទម៉ាស(Christmas) ដែលជាបុណ្យដ៏សំខាន់របស់គ្រីស្ទបរិស័ទ (Christian)។
សម្ដេច ហ៊ុន សែន មិនបានហាមអ្នកកាន់សាសនាគ្រិស្ទ និងពលរដ្ឋខ្មែរ ប្រារព្ធបុណ្យគ្រីស្ទម៉ាស នោះទេ។ ប៉ុន្តែសម្ដេច អនុញ្ញាតឲ្យប្រារព្ធពិធីបុណ្យនេះ ដោយការប្រុងប្រយ័ត្នខ្ពស់ ចំពោះជំងឺឆ្លងកូវីដ-១៩។ប្រមុខរដ្ឋាភិបាល បានសរសេរលើហ្វេសប៊ុកនៅថ្ងៃទី២៥ ធ្នូ យ៉ាងដូច្នេះថា៖«ដោយសារប្រទេសយើងកំពុងតែស្ថិតក្នុងការប្រុងប្រយ័ត្នប្រយុទ្ធប្រឆាំងទប់ស្កាត់ការរីករាលដាលជំងឺឆ្លងកូវីដ-១៩ ដូច្នេះហើយបងប្អូនគ្រីស្ទបរិស័ទយើងមិនបានប្រារព្ធពិធីនេះឲ្យបានអធិកអធ័មនោះទេ ប៉ុន្តែគឺធ្វើជាលក្ខណៈគ្រួសារនៅតាមគេហដ្ឋានរៀងៗខ្លួនដោយមានការប្រុងប្រយ័ត្នខ្ពស់»។
នាយករដ្ឋមន្ត្រី ហ៊ុន សែន បន្តអំពាវនាវឲ្យពលរដ្ឋយកចិត្តទុកដាក់ការពារកុំឲ្យឆ្លងកូវីដ-១៩ ដោយពាក់ម៉ាស និងឧស្សាហ៍ដុសលាងសម្អាតដៃជាមួយសាប៊ូ ជែល ទឹកអាល់កុល រក្សាគម្លាតសុវត្ថិភាព ។ ចំណែកពលរដ្ឋដែលកំពុងធ្វើចត្តាឡីស័ក ត្រូវអនុវត្តឲ្យបានខ្ជាប់ខ្ជួនត្រឹមត្រូវ តាមការណែនាំរបស់ក្រសួងសុខាភិបាល។
ជារៀងរាល់ឆ្នាំនៅថ្ងៃទី២៥ខែធ្នូ ប្រជាពលរដ្ឋនៅទូទាំងពិភពលោកដែលជាអ្នកប្រកាន់យកសាសនាគ្រឹស្តតែងតែប្រារព្ធពិធីបុណ្យ Christmas ដែលមានលម្អផ្ទះដោយដើមឈើ Christmasនិងផ្តល់អំណោយដល់គ្នាទៅវិញទៅមក។ ការអនុវត្តនេះ បានធ្វើឡើងតាំងពីថ្ងៃទី២៥ធ្នូ ក្នងឆ្នាំ៣៣៦នៃគ្រឹស្តសករាជមកម្ល៉េះ។ យ៉ាងណាមិញថ្ងៃបុណ្យ Christmas បច្ចុប្បន្ននេះត្រូវបានយុវវ័យភាគច្រើននាំគ្នាប្រារព្ធ ទោះបីពួកគេមិនមែនជាអ្នកប្រកាន់យកសាសនាគ្រឹស្តក៏ដោយ។
គិតត្រឹមព្រឹកថ្ងៃទី២៥ ធ្នូនេះ មានអ្នកឆ្លងជំងឺកូវីដ-១៩ ទូទាំងពិភពលោក ជាង៧៩លាននាក់ហើយ ក្នុងនោះជាសះស្បើយជាង៥៦លាននាក់ និងស្លាប់១,៧លាននាក់។ ចំណែកនៅកម្ពុជាវិញ មានអ្នកជំងឺកូវីដ-១៩ ចំនួន ៣៦៣នាក់ ក្នុងនោះមាន៣៥៤នាក់បានសះស្បើយ និង៩នាក់ទៀតកំពុងសម្រាកនៅមន្ទីរពេទ្យ៕
Tag:
ពលករខ្មែរ
កូរ៉េខាងត្បូង
© រក្សាសិទ្ធិដោយ thmeythmey.com