COVID-19
អន្តរជាតិ
ហុងកុង បង្កើនរយៈពេលធ្វើចត្តាឡីស័កអ្នកមកពីបរទេសដល់២១ថ្ងៃ ស្លាកសញ្ញារក្សាគម្លាតសុវត្ថិភាពនៅអាកាសយានដ្ឋានហុងកុង។ រូបភាព៖ Reuters
× ហុងកុង បានបង្កើនរយៈពេលធ្វើចត្តាឡីស័កលើអ្នកដំណើរមកពីបរទេសទាំងអស់រហូតដល់២១ថ្ងៃ ខណៈកន្លងមកអនុវត្តត្រឹមតែ ១៤ថ្ងៃប៉ុណ្ណោះ។ ចំណាត់ការបែបនេះ ធ្វើឡើងដើម្បីទប់ស្កាត់ការរាតត្បាតរបស់ក្រុមវីរុសថ្មី ដែលមានអត្រាឆ្លងកម្រិតខ្ពស់។ អ្នកដំណើរមកពីចិន និងតៃវ៉ាន់ បន្តធ្វើចត្តាឡីស័ក១៤ថ្ងៃដដែល។
កន្លងមក វិធានការដាក់ចត្តាឡីស័ករបស់ហុងកុងមានរយៈពេលតែ ១៤ថ្ងៃប៉ុណ្ណោះ សម្រាប់ដាក់អ្នកដែលត្រលប់មកពីបរទេស។ ប៉ុន្តែដោយមានករណីឆ្លងក្នុងស្រុកកើនឡើង ស្របពេលផ្ទុកក្រុមវីរុសថ្មី ហុងកុង បានសម្រេចបន្ថែមរយៈពេលការធ្វើចត្តាឡីស័កពី១៤ថ្ងៃទៅ២១ថ្ងៃ នៅតាមទីតាំងដែលបានកំណត់ដោយអាជ្ញាធរ។
នៅក្នុងសេចក្តីថ្លែងការណ៍មួយ រដ្ឋាភិបាលហុងកុង បានលើកឡើងថា រយៈពេលនៃការចេញរោគសញ្ញាកូវីដ-១៩ មានរយៈពេល ១៤ថ្ងៃ ប៉ុន្តែអ្នកជំនាញជឿថា មនុស្សមួយក្រុមតូច អាចចេញរោគសញ្ញាក្នុងរយៈពេលលើសពី ១៤ថ្ងៃ។
«ហុងកុង នឹងមិនអាចអនុញ្ញាតឲ្យមានការថ្លោះធ្លោយឡើយ»។ រដ្ឋាភិបាលហុងកុង បានលើកឡើងបែបនេះ ដោយបន្ថែមថា វិធានការ ដែលដាក់ឲ្យធ្វើចត្តាឡីស័ករយៈពេល ២១ថ្ងៃនេះ គឺដើម្បីធានា និងបង្ការវីរុស ដែលអាចចេញរោគសញ្ញាលើសពី១៤ថ្ងៃ។ យ៉ាងណាក៏ដោយ អាជ្ញាធរហុងកុង ក៏បានលើកលែងចំពោះអ្នកដែលត្រលប់មកពីចិន តៃវ៉ាន់ និងម៉ាកាវផងដែរ ដោយអ្នកទាំងនោះអាចបន្តដាក់ចត្តាឡីស័កនៅផ្ទះក្នុងរយៈពេល ១៤ថ្ងៃបាន។
ចំណាត់ការរបស់អាជ្ញាធរហុងកុងបែបនេះ បានដាក់ចេញ ស្របពេលប្រទេសមួយចំនួនដូចជាអង់គ្លេស អាហ្វ្រ៊ិកខាងត្បូង បានរកឃើញក្រុមវីរុសប្រភេទថ្មី ដែលមានអត្រាឆ្លងខ្លាំងជាងទម្រង់វីរុសមុន។ នៅអង់គ្លេស វីរុសទម្រង់ថ្មី មានល្បឿនឆ្លងលឿនជាងទម្រង់ចាស់រហូតដល់ ៧០ភាគរយ។ ហុងកុង ក៏បានបិទជើងហោះហើរទាំងអស់ជាមួយអង់គ្លេសដែរ។
នៅថ្ងៃទី២៤ ខែធ្នូ ហុងកុង មានករណីឆ្លងចំនួន ៧១ករណី ដោយក្នុងនោះ ៦១ករណី ជាករណីឆ្លងក្នុងស្រុក។ ៣០ករណីនៃការឆ្លងក្នុងស្រុក មិនទាន់រកឃើញប្រភពចម្លងឡើយ។ អាជ្ញាធរហុងកុង បានអំពាវនាវឲ្យប្រជាជន កុំឲ្យមានការជួបប្រជុំគ្នា នៅក្នុងពិធីបុណ្យណូអែល ឬថ្ងៃចូលឆ្នាំថ្មីខាងមុខ ដើម្បីបង្ការការកើនឡើងនៃករណីឆ្លង។ គិតមកត្រឹមពេលនេះ ហុងកុង មានករណីឆ្លងសរុបចំនួន ៨៤២៥ករណី និងអ្នកស្លាប់មានចំនួន ១៣៥នាក់។ ចំណែកអ្នកជាសះស្បើយមានចំនួន ៧២០៣នាក់៕
© រក្សាសិទ្ធិដោយ thmeythmey.com