បុគ្គលិកសុខាភិបាលជួរមុខនៅម៉ិកស៊ិក និងស៊ីលី ស្ថិតក្នុងចំណោមក្រុមមនុស្សដំបូង ដែលទទួលការចាក់វ៉ាក់សាំងប្រឆាំងកូវីដ-១៩ នៅថ្ងៃទី ២៤ ខែធ្នូ ។ កូស្ដារីកា ក៏បានចាប់ផ្ដើមកម្មវិធីចាក់វ៉ាក់សាំង ខណៈប្រទេសមួយចំនួនទៀតក្នុងតំបន់អាមេរិកឡាទីននេះ កំពុងរៀបចំចាត់ចែងទិញវ៉ាក់សាំងផងដែរ។
«វាជាអំណោយដ៏ល្អបំផុត ដែលខ្ញុំអាចទទួលបានក្នុងឆ្នាំ២០២០» ។ គិលានុបដ្ឋាកជនជាតិម៉ិកស៊ិក អ្នកស្រី Maria Irene Ramirez និយាយបែបនេះ ខណៈអ្នកស្រីបានចាក់វ៉ាក់សាំងនៅមន្ទីរពេទ្យមួយក្នុងរដ្ឋធានី ម៉ិកស៊ីកូ នៅមួយថ្ងៃមុនបុណ្យណូអែល។ គិលានុបដ្ឋាយិកាវ័យ៥៩ឆ្នាំរូបនេះ បញ្ជាក់ទៀតថា ការចាក់សាំងនេះ ធ្វើឲ្យអ្នកស្រីមានសុវត្ថិភាពជាងមុន និងមានកម្លាំងជាងមុន ដើម្បីបន្តប្រយុទ្ធក្នុងសង្គ្រាមប្រឆាំងសត្រូវអរូបី។
ការចាក់វ៉ាក់សាំងកូវីដ-19 របស់ម៉ិកស៊ិក ដែលក៏មានចាក់ផ្សាយលើកញ្ចក់ទូរទស្សន៍ផងនោះ ធ្វើឡើងមួយថ្ងៃប៉ុណ្ណោះក្រោយវ៉ាក់សាំង៣០០០ដូសដំបូងរបស់ក្រុមហ៊ុនអាមេរិក-អាល្លឺម៉ង់ Pfizer-BioNTech ត្រូវបានដឹកតាមរយៈយន្តហោះពីបែលហ្ស៊ិក។ គិតត្រឹមថ្ងៃទី ២៥ ខែធ្នូ ម៉ិកស៊ិក មានអ្នកស្លាប់ដោយសារកូវីដ-១៩សរុប១២ម៉ឺននាក់ហើយ ដែលខ្ពស់បំផុតលំដាប់ទី៤លើពិភពលោក បន្ទាប់ពីសហរដ្ឋអាមេរិក ប្រេស៊ីល និងឥណ្ឌា ។
នៅស៊ីលីវិញ ជំនួយការគិលានុបដ្ឋាក អ្នកស្រី Zulema Riquelme ជាមនុស្សដំបូងដែលចាក់វ៉ាក់សាំងមុនគេក្នុងប្រទេសអ្នកស្រី ពោលគឺប៉ុន្មានម៉ោងប៉ុណ្ណោះក្រោយវ៉ាក់សាំងរបស់ក្រុមហ៊ុន Pfizer-BioNTech ១ម៉ឺនដូសដំបូង បានដឹកទៅដល់ប្រទេសនេះតាមយន្តហោះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
«ខ្ញុំមានអារម្មណ៍រំភើបផង និងភ័យផង»។ ស្ត្រីវ័យ៤៦ឆ្នាំរូបនេះ បញ្ជាក់បែបនេះ ក្រោយចាក់វ៉ាក់សាំងរួចក្នុងមន្ទីរពេទ្យមួយក្នុងរដ្ឋធានី សាន់ត្យាហ្គោ ដោយមានវត្តមានរបស់ប្រធានាធិបតី Sebastian Pinera ផងដែរ។ លោកប្រធានាធិបតី Pinera ប្រាប់អ្នកស្រី Riquelme ថា អ្នកស្រីជាក្តីសង្ឃឹមរបស់មនុស្សរាល់គ្នា។
ម៉ិកស៊ិក ជាប្រទេសទីមួយក្នុងតំបន់អាមេរិកកណ្ដាល និងឡាទីន ដែលទទួលវ៉ាក់សាំងកូវីដ-១៩របស់ក្រុមហ៊ុន Pfizer-BioNTech ហើយតាមពីក្រោយដោយស៊ីលី ក៏ដូចជា កូស្ដារីកា ដែលក៏បានចាប់ផ្ដើមកម្មវិធីចាក់វ៉ាក់សាំងនៅថ្ងៃទី ២៤ ខែធ្នូ។ «វាប្រហែលជាការចាប់ផ្ដើមនៃអវសានរបស់ជំងឺរាតត្បាតសកលនេះហើយ» ។ ប្រធានាធិបតីកូស្ដារីកា លោក Carlos Alvarado បញ្ជាក់បែបនេះ។
ប្រេស៊ីល ដែលមានអ្នកស្លាប់ដោយសារកូវីដ-១៩សរុប ១៩ម៉ឺននាក់ នៅតែបន្តចរចាទិញវ៉ាក់សាំងកូវីដ-១៩ ចំនួន៣៥០លានដូស សម្រាប់ឆ្នាំ២០២១។ ការចាក់វ៉ាក់សាំង ត្រូវបានទាញធ្វើជារឿងនយោបាយ ហើយប្រធានាធិបតីស្ដាំនិយម ជែ បុលសូណារ៉ូ ម្ដងហើយម្ដងទៀត បាននិយាយថា លោកនឹងអត់ចាក់វ៉ាក់សាំងកូវីដ-១៩ឡើយ។
ចំណែក អាហ្សង់ទីន បានទទួលវ៉ាក់សាំង ៣០ម៉ឺនដូសដំបូងរបស់ក្រុមហ៊ុនរុស្ស៊ី Sputnik V នៅថ្ងៃទី ២៤ ខែធ្នូ តាមរយៈជើងហោះហើរពិសេសមួយពីទីក្រុងមូស្គូ ។ មកទល់បច្ចុប្បន្ន អាហ្សង់ទីន ជាប្រទេសក្នុងតំបន់អាមេរិកឡាទីនតែមួយគត់ ដែលបានអនុម័តលើការប្រើវ៉ាក់សាំងរបស់រុស្ស៊ី ដែលប្រឈមការរិះគន់ ព្រោះតែវ៉ាក់សាំងនេះត្រូវបានចុះបញ្ជី មុនពេលចាប់ផ្ដើមការពិសោធដំណាក់កាលចុងក្រោយ។ អាហ្សង់ទីន និងម៉ិកស៊ិក ក៏មានកិច្ចព្រមព្រៀងជាមួយក្រុមហ៊ុនឱសថអង់គ្លេស AstraZeneca ដើម្បីផ្គត់ផ្គង់វ៉ាក់សាំងផងដែរ។
ក្រសួងការបរទេសម៉ិកស៊ិក អះអាងថា វ៉ាក់សាំងរបស់ក្រុមហ៊ុន Pfizer-BioNTech ១,៤លានដូស ទៀតនឹងដឹកទៅដល់ប្រទេសខ្លួននាថ្ងៃទី៣១ ខែមករា ។ ចំនួននេះ ជាផ្នែកមួយនៃវ៉ាក់សាំងសរុប ៣៤,៤លានដូស ដែលក្រុមហ៊ុនអាមេរិកបានព្រមលក់ឲ្យម៉ិកស៊ិក។ ចំណែក ស៊ីលី វិញ បានបញ្ជាទិញវ៉ាក់សាំងកូវីដ-១៩ ៣០លានដូស ដែលគ្រប់គ្រាន់សម្រាប់ចាក់មនុស្ស១៥លានក្នុងចំណោមពលរដ្ឋសរុប ១៨លាននាក់ ត្រឹមពាក់កណ្ដាលឆ្នាំ២០២១៕