ជាតិ
សង្គមជាតិ
អឺរ៉ុប បារាំង និង អាល្លឺម៉ង់ ផ្ដល់ហិរញ្ញប្បទាន១១៦លានដុល្លារ ដល់កម្ពុជា សម្រាប់អភិវឌ្ឍតាមជនបទ ផ្លូវរងការខូចខាតនៅជនបទ (រូបពីក្រសួងអភិវឌ្ឍន៍ជនបទ)
× ភ្នំពេញ៖ សហភាពអឺរ៉ុប ធនាគារអភិវឌ្ឍន៍អាល្លឺម៉ង់ (KfW) និង ទីភ្នាក់ងារអភិវឌ្ឍន៍បារាំង (FDA) បានរួមគ្នាផ្ដល់ហិរញ្ញប្បទាន៩៥,៨ លានអឺរ៉ូ (១១៦លានដុល្លារ) ដើម្បីអភិវឌ្ឍហេដ្ឋារចនាសម្ព័ន្ធតាមជនបទ ក្នុងខេត្ត៥នៅកម្ពុជា។
សេចក្ដីប្រកាសព័ត៌មានរបស់ស្ថាប័នទាំង៣ ចេញកាលពីថ្ងៃកាលពីថ្ងៃទី២៣ ខែធ្នូនេះ បានបញ្ជាក់ថា គម្រោងកម្មវិធីអភិវឌ្ឍន៍ហេដ្ឋារចនាសម្ព័ន្ធជនបទសម្រាប់កម្ពុជា (RID4CAM) គឺមានគោលបំណងជួយដល់ការអភិវឌ្ឍន៍ផ្លូវជនបទ ហើយលើកកម្ពស់ការអភិវឌ្ឍន៍មូលដ្ឋានក្រីក្រតាមរយៈការបំពេញបន្ថែមលើផ្នែកអនាម័យ កសិកម្ម សុខភាព និង ប្រព័ន្ធអប់រំ ជាដើម។
ក្នុងកិច្ចសម្ភាសន៍ជាមួយសារព័ត៌មានថ្មីៗ លោក ចាន់ ដារ៉ុង រដ្ឋលេខាធិការ និងជាអ្នកនាំពាក្យក្រសួងអភិវឌ្ឍន៍ជនបទ ថ្លែងថា គម្រោងនេះ មានរយៈពេល៦ឆ្នាំ សម្រាប់កែលម្អផ្លូវនៅជនបទប្រវែង៥៥០គីឡូម៉ែត្រ ហើយនឹងត្រូវក្រាលកៅស៊ូពីរជាន់ (DBST)។ លោកបញ្ជាក់ថា ផ្លូវ៥៥០គីឡូម៉ែត្រនេះ ស្ថិតនៅក្នុងខេត្តបាត់ដំបង ព្រះវិហារ សៀមរាប កំពង់ធំ និងខេត្តកណ្ដាល។
អ្នកនាំពាក្យក្រសួងអភិវឌ្ឍន៍ជនបទរូបនេះ បន្តថា កន្លងមកក្រសួងអភិវឌ្ឍន៍ជនបទគ្រោងចំណាយថវិកាជាង៩១,៩លានដុល្លារ ដើម្បីស្ដារផ្លូវជាង៦០០ខ្សែនិងអណ្ដូងទឹកជាង៤ពាន់កន្លែង ក្រោយរងផលប៉ះពាល់ដោយសារទឹកជំនន់។ លោក បន្ថែមថា ថវិកាចំណាយជាង៩១,៩លានដុល្លារនេះ គឺជាការប៉ាន់ស្មានបឋមដែលត្រូវចំណាយដើម្បីស្ដារផ្លូវនិងអណ្ដូងទឹកនៅជនបទ ខណៈក្រសួងសេដ្ឋកិច្ច នឹងទម្លាក់ប្រាក់១៥លានដុល្លារ សម្រាប់ស្ដារឡើងវិញ។
នៅអំឡុងខែតុលានិងខែវិច្ឆិកាកន្លងទៅ ផ្លូវតាមជនបទនៅកម្ពុជាបានរងផលប៉ះពាល់ជាង៦០០ខ្សែ។ ទន្ទឹមនឹងនេះ អណ្ដូងទឹកជាង៤០០០ បានរងផលប៉ះពាល់និងតាមការប៉ាន់ស្មានគឺត្រូវការថវិកាប្រមាណ៩០ម៉ឺនដុល្លារដើម្បីស្ដារឡើងវិញ៕
Tag:
អឺរ៉ុប
បារាំង
អាល្លឺម៉ង់
ហិរញ្ញប្បទានបរទេស
អភិវឌ្ឍជនបទ
© រក្សាសិទ្ធិដោយ thmeythmey.com